Arĩa tũtaraga marĩ Aira a Jehova nĩ arĩa mahunjagia ũhoro mwega wa Ũthamaki wa Ngai o mweri. (Mathayo 24:14) Acio nĩ arĩa mabatithĩtio magatuĩka Aira a Jehova o hamwe na arĩa makoragwo magĩrĩire kũhunjia, o na gũtuĩka matibatithĩtio.

 Aca. Mũhothi ndũrĩ handũ ũũkagĩra nĩguo mũndũ atuĩke Mũira wa Jehova kana ehokerũo wĩra mũna o na kana aheo mweke mũna ndini-inĩ itũ. (Atũmwo 8:18-20) Ũhoro wa ma nĩ atĩ, ti kaingĩ andũ mamenyaga nũũ waruta mũhothi. Aira a Jehova mahũthagĩra mahinda, hinya, na indo ciao kũnyita mbaru wĩra wa kũhunjia meyendeire, o mũndũ kũringana na ũhoti wake.—2 Akorintho 9:7.

 O mweri, Aira a Jehova nĩ marutaga riboti kĩũngano-inĩ kĩao ya wĩra wao wa kũhunjia. Riboti ĩno ĩrutagwo na kwĩyendera.

 Riboti icio icokaga igacokanĩrĩrio, na mũigana wacio ũgatũmwo kũrĩ wabici ya rũhonge ĩrĩa ĩrũgamĩrĩire kũu. Wabici ya rũhonge nayo ĩgatũma mũigana wa riboti cia o bũrũri kana gĩcigo gĩa kũhunjia kũrĩ wabici nene ya Aira a Jehova.

 O mwaka wa ũtungata a ũgĩthira, Aira a Jehova nĩ mamenyekaga nĩ aigana harĩ o bũrũri mwaka-inĩ ũcio. Mũigana wao nĩ ũturanagĩrũo hamwe nĩguo mamenyeke nĩ aigana thĩinĩ wa thĩ yothe. Riboti irĩ na ũhoro makĩria wa o bũrũri, hamwe na maũndũ monetwo wĩra-inĩ wa kũhunjia, no cioneke thĩinĩ wa gacunjĩ getagwo “Thĩinĩ wa Thĩ Yothe” Website-inĩ itũ. Riboti icio nĩ itwĩkĩraga ngoro, o ta ũrĩa Akristiano a tene meekĩragwo ngoro nĩ riboti ta icio.—Atũmwo 2:41; 4:4; 15:3.

 O na gũtuĩka acio tũtimataraga marĩ Aira a Jehova, nĩ tũmanyitaga ũgeni ciũngano-inĩ citũ. Aingĩ ao nĩ mokaga Kĩririkano kĩa o mwaka gĩa gĩkuũ gĩa Kristo, kwoguo no tũmenye andũ acio nĩ ta aigana ũguo, tũngĩrutithania mũigana wa andũ arĩa othe mokĩte Kĩririkano na mũigana wa Aira a Jehova. Mwaka wa 2023, arĩa mookire Kĩririkano maarĩ 20,461,767.

 Andũ aingĩ arĩa matahotaga kũnyitanĩra na ithuĩ rĩrĩa tũrathathaiya nĩ magunĩkaga mũno nĩ mũbango witũ wa kũruta andũ Bibilia hatarĩ marĩhi. Mwaka-inĩ wa 2023, twarĩ na arutwo a Bibilia ta 7,281,212 o mweri, na amwe ao meerutaga marĩ makĩria ma mũndũ ũmwe.

 Kaingĩ andũ a thirikari arĩa mataranaga matuaga mũigana wa andũ na njĩra ya kũmooria nĩ a ndini ĩrĩkũ. Kwa ngerekano, Rũhonge rwa Gũtara Andũ rwa Amerika (US) ruoigire atĩ ũthuthuria wao “warĩ kũmenya kana andũ moigaga nĩ manyitaga ndini mbaru,” na atĩ mũigana ũrĩa ruonire wakoniĩ “mawoni ma andũ no ti ũũma wa ũhoro.” Mũgarũ na ũguo, arĩa mahunjagia na makaruta riboti nĩo tũtaraga marĩ Aira a Jehova, no ti arĩa moigaga tu atĩ o nĩ Aira a Jehova.