Aira a Jehova manahũthĩra Bibilia nyingĩ itiganĩte. No thiomi-inĩ iria ikoragwo na Bibilia ya New World Translation of the Holy Scriptures, nĩ twendete kũmĩhũthĩra tondũ nĩ ĩhũthagĩra rĩĩtwa rĩa Ngai, nĩ ĩrĩ ũhoro mũrũngĩrĩru, na nĩ ĩtaũkĩkaga wega.

•   Kũhũthĩra rĩĩtwa rĩa Ngai. Acabi amwe a Bibilia nĩ magaga gũtĩithia ũrĩa waandĩkithirie Bibilia. Kwa ngerekano, Bibilia ĩmwe nĩ ĩkoragwo na marĩĩtwa makĩria ma 70 ma andũ arĩa maanyitire itemi harĩ kũrutwo kwa Bibilia ĩyo. O na kũrĩ ũguo, Bibilia ĩyo ndĩkoragwo na rĩĩtwa rĩa ũrĩa waandĩkithirie Bibilia, Jehova Ngai.

   No Bibilia ya New World Translation ĩkoragwo ĩcoketie rĩĩtwa rĩa Ngai maita ngiri nyingĩ kũrĩa rĩarĩ maandĩko-inĩ marĩa maandĩkirũo kĩambĩrĩria-inĩ, no marĩĩtwa ma kamĩtĩ ĩrĩa yarutĩire Bibilia ĩyo wĩra mationanĩtio.

•   Ũhoro mũrũngĩrĩru. Ti Bibilia ciothe iheanaga ndũmĩrĩri ya Bibilia na njĩra nũngĩrĩru. Kwa ngerekano, Bibilia ĩmwe ĩtaũrĩte Mathayo 7:13 ũũ: “Tonyerai mũromo ũrĩa mũceke, tondũ mũromo ũrĩa ũthiaga icua-inĩ nĩ mwariĩ na njĩra ĩrĩa ĩkinyagia andũ kuo nĩ hũthũ.” No maandĩko marĩa maandĩkĩtwo kĩambĩrĩria-inĩ maahũthĩrĩte kiugo “kũniinwo” no ti “icua-inĩ.” No kũhoteke ataũri maahũthĩrire kiugo “icua-inĩ” tondũ meetĩkĩtie atĩ andũ arĩa aganu magacinwo tene na tene mwaki-inĩ wa icua. No ũguo tiguo Bibilia ĩrutanaga. Nĩkĩo Bibilia ya New World Translation ĩtaũrĩte na njĩra nũngĩrĩru ĩkauga: “Tonyerai mũromo ũrĩa mũceke, tondũ mũromo nĩ mwariĩ na njĩra ĩrĩa ĩkinyagia andũ harĩ kũniinwo nĩ njariĩ.”

•   Gũtaũkĩka wega. Bibilia njega yagĩrĩire gũkorũo na ũhoro mũrũngĩrĩru na ningĩ ĩtaũkĩke wega na njĩra hũthũ. Kwa ngerekano, thĩinĩ wa Aroma 12:11 mũtũmwo Paulo aahũthĩrire kiugo kiugĩte “gũtherũka roho.” No tondũ mũthomi wa mahinda maya ndangĩtaũkĩrũo wega nĩ ciugo icio, Bibilia ya New World Translation ĩtaũrĩte mũhari ũcio ũndũ ũngĩtaũkĩka na njĩra hũthũ. Yugaga: “Hĩahĩagai nĩ ũndũ wa roho.”

 Makĩria ma kũhũthĩra rĩĩtwa rĩa Ngai, kũheana ũhoro mũrũngĩrĩru, na gũtaũkĩka wega, Bibilia ya New World Translation nĩ ya mwanya tondũ ĩheanagwo hatarĩ marĩhi. Nĩ ũndũ ũcio, andũ milioni nyingĩ nĩ mahotaga gũthoma Bibilia na rũthiomi rwao, o na arĩa matangĩhota kũgũra Bibilia.