Hihi Nderuta Bibilia na Aira a Jehova Ngwĩrĩgĩrĩrũo Nduĩke Ũmwe Wao?

THAAKA

Aca, to mũhaka ũtuĩke Mũira wa Jehova. Andũ aingĩ nĩ makenagĩra kwĩruta Bibilia hamwe na ithuĩ no matituĩkaga Aira a Jehova. a Muoroto wa kwĩruta nĩ gũkuonia ũrĩa Bibilia ĩrutanaga. Itua rĩa ũrĩa ũgwĩka na ũmenyo ũrĩa ũkũgĩa naguo nĩ rĩaku. Nĩ tũtaũkagĩrũo atĩ mũndũ nĩwe wagĩrĩirũo gwĩtuĩra itua rĩgiĩ wĩtĩkio.—Joshua 24:15.

Hihi no hũthĩre Bibilia yakwa hĩndĩ ya wĩruti?

Ĩĩ no ũhũthĩre. O na gũtuĩka nĩ tũheanaga hatarĩ marĩhi na tũgakena kũhũthĩra Bibilia ya kĩĩrĩu ya New World Translation of the Holy Scriptures, hatingĩkorũo na thĩna ũngĩhũthĩra Bibilia yaku. Bibilia o yothe no ĩgũteithie kwĩruta ũhoro wĩgiĩ kĩĩrĩgĩrĩro na ũhonokio.

Mwĩrutaga na andũ arĩa mataranyitanĩra na ndini yanyu nĩkĩ?

Ũndũ ũrĩa mũnene ũtũmaga twĩke ũguo nĩ wendo witũ harĩ Jehova Ngai, ũrĩa wendaga Akristiano marute andũ arĩa angĩ maũndũ marĩa merutĩte. (Mathayo 22:37, 38; 28:19, 20) Tuonaga arĩ gĩtĩo kĩnene gũkorũo tũrĩ “arutithania wĩra hamwe na Ngai” tũgĩteithia andũ kũmenya maũndũ marĩa Kiugo gĩake kĩrutanaga.—1 Akorintho 3:6-9.
Ningĩ ũndũ ũngĩ ũtũtindĩkaga gwĩka ũguo nĩ wendo witũ harĩ andũ arĩa angĩ. (Mathayo 22:39) Nĩ tũkenaga kũhunjĩria andũ arĩa angĩ maũndũ mega marĩa twĩrutĩte.—Atũmwo 20:35.

a Nĩguo ũtaũkĩrũo nĩ wĩra witũ wa kũruta andũ Bibilia, mwaka wa 2022 twerutire Bibilia na andũ 5,666,996 o mweri, na aingĩ ao meerutaga andũ aigana ũna hamwe. Ĩndĩ andũ 145,552 no o maabatithirio magĩtuĩka Aira a Jehova mwaka ũcio.