Ũrĩa andũ maugaga: Aira a Jehova magaga gũkũngũĩra Ista tondũ ti Akristiano.

 Ũrĩa kũrĩ: Twĩtĩkĩtie Jesu Kristo nĩ Mũhonokia witũ, na nĩ twĩrutanagĩria biũ “kũrũmĩrĩra makinya make.”—1 Petero 2:21; Luka 2:11.

 Ũrĩa andũ maugaga: Mũtiĩtĩkĩtie atĩ Jesu nĩ aariũkirio kuuma kũrĩ arĩa akuũ.

 Ũrĩa kũrĩ: Nĩ twĩtĩkĩtie ũhoro wa kũriũka kwa Jesu, na tuonaga kũriũka kũu kũrĩ mũthingi wa wĩtĩkio wa Gĩkristiano na nĩ tũhunjagia ũhoro wa kũriũka kũu.—1 Akorintho 15:3, 4, 12-15.

 Ũrĩa andũ maugaga: Nĩ mũimaga ciana cianyu maũndũ mega nĩ ũndũ wa kwaga gũkũngũĩra Ista.

 Ũrĩa kũrĩ: Nĩ twendete ciana citũ, na nĩ twĩrutanagĩria gũciruta na gũciteithia kũmenya ũrĩa cingĩgĩa na gĩkeno.—Tito 2:4.

•   Gĩkũngũĩro kĩa Ista gĩtiumanĩte na Bibilia.

•   Jesu aatwathire tũririkanage gĩkuũ gĩake, no ti kũriũka gwake. Nĩ twĩkaga Kĩririkano kĩu o mwaka mũthenya ũrĩa aakuire kũringana na karenda ya Kĩyahudi.—Luka 22:19, 20.

•   Twĩtĩkĩtie atĩ maũndũ marĩa mekagwo hĩndĩ ya Ista, maumanĩte na ũndũire wa matukũ ma tene wĩgiĩ ũciari, na ũtũmaga gĩkũngũĩro kĩu kĩage gwĩtĩkĩrĩka harĩ Ngai. Ngai endaga tũmũhe “wĩrutĩri wa ngoro yothe,” na nĩ arakaragio nĩ ũthathaiya ũrĩa ũkoragwo na maũndũ atetĩkĩrĩte.—Thama 20:5; 1 Athamaki 18:21.

 Twĩtĩkĩtie atĩ itua ritũ rĩa gwĩthema gũkũngũĩra Ista riumanĩte na Bibilia, na ĩtwĩraga tũhũthagĩre “ũũgĩ na ũhoti wa gwĩciria” handũ ha kũrũmĩrĩra morutani ma andũ. (Thimo 3:21; Mathayo 15:3) Rĩrĩa andũ matũũria maũndũ marĩa twĩtĩkĩtie megiĩ Ista nĩ tũmeraga, no nĩ tũheaga gĩtĩo kĩhooto kĩa o mũndũ gĩa gwĩthurĩra ũrĩa egwĩka.—1 Petero 3:15.