Nĩ tuonete atĩ andũ aingĩ arĩa makoragwo na ndini ciao nĩ makenagĩra kwarĩrĩria maũndũ ma Bibilia. Hatarĩ nganja nĩ tũtĩaga kĩhooto kĩa mũndũ gũkorũo na wĩtĩkio ngũrani na witũ, na tũtiringagĩrĩria andũ mathikĩrĩrie ũhoro witũ kĩa hinya.

 Rĩrĩa tũrarĩrĩria ũhoro wa ndini, nĩ tũgeragia kũhũthĩra ũtaaro wa Bibilia wa gwĩka ũguo ‘tũhooreire,’ na kuonia andũ arĩa angĩ “gĩtĩo kĩnene.” (1 Petero 3:15) Nĩ twĩrĩgagĩrĩra atĩ amwe nĩ mekũrega ũhoro ũrĩa tũramahunjĩria. (Mathayo 10:14) O na kũrĩ ũguo, tũtingĩmenya kana nĩ megwĩtĩkĩra kana marege o tiga twaririe nao. Ningĩ nĩ tũmenyaga atĩ maũndũ ma andũ nĩ magarũrũkaga.

 Kwa ngerekano, mũndũ no akorũo na mĩhangʼo mĩingĩ ihinda rĩmwe, no hĩndĩ ĩngĩ no akenere kwaranĩria na ithuĩ. Na andũ no macemanie na mathĩna matarĩ macemania namo kana maũndũ mangĩ arĩ o mũhaka mahiũranie namo, matũme mambĩrĩrie kwenda ndũmĩrĩri ya Bibilia. Kwoguo nĩ tũgeragia kwaria na andũ maita maingĩ.