Watch Tower Bible and Tract Society of Pennsylvania nĩ gĩkundi gĩtarĩ gĩa kĩbiacara kĩrĩa gĩathondekirũo mwaka wa 1884 rungu rwa mawatho ma Commonwealth ma Pennsylvania, Amerika (US). Gĩkundi kĩu kĩhũthagĩrũo nĩ Aira a Jehova gũtwarithia na mbere wĩra wao thĩinĩ wa thĩ yothe ũrĩa ũkoragwo ũhutĩtie maũndũ ta gũcaba Bibilia na mabuku maragĩrĩria ũhoro wa Bibilia.

 O ta ũrĩa ngirimiti ya gĩkundi gĩkĩ yonanĩtie, muoroto wakĩo nĩ kũhingia maũndũ ma “kĩndini, gũthomithia andũ, na gũteithia andũ,” na makĩria “kũhunjia na kũrutana injiri ya Ũthamaki wa Ngai rungu rwa Kristo Jesu.” Andũ matiheagwo mweke wa gũkorũo gĩkundi-inĩ kĩu kũringana na mbeca iria mũndũ arutĩte. Andũ arĩa makoragwo gĩkundi-inĩ gĩkĩ na arũgamĩrĩri a kĩo nĩ mateithagĩrĩria Kĩama Kĩrĩa Gĩtongoragia kĩa Aira a Jehova.

 Makĩria ma gũkorũo na Watch Tower Bible and Tract Society of Pennsylvania, Aira a Jehova nĩ mahũthagĩra ikundi ingĩ nyingĩ cia kĩĩwatho mabũrũri-inĩ matiganĩte thĩinĩ wa thĩ. Marĩĩtwa ma ikundi imwe harĩ icio makoragwo na ciugo “Watch Tower,” kana “Watchtower,” kana ciugo icio itaũrĩtwo na thiomi iria ciaragio kũrĩa ikundi icio irĩ.

 Kuuma rĩrĩa ikundi icio cia kĩĩwatho ciambĩrĩirio, nĩ itũteithĩtie kũhingia maũndũ ta maya:

•   Kwandĩka na gũcaba. Nĩ tũhotete gũcaba Bibilia ta milioni 220, na mabuku ta bilioni 40 mararĩrĩria ũhoro wa Bibilia. Mabuku maitũ monekaga na thiomi makĩria ma 900. Andũ no mahote gũthoma Bibilia Intaneti-inĩ thĩinĩ wa website itũ ya jw.org hatarĩ marĩhi na thiomi makĩria ma 160, na mone macokio ma ciũria ta, “Ũthamaki wa Ngai nĩ Kĩĩ?”

•   Gũthomithia andũ. Nĩ tũkoragwo na cukuru itiganĩte cia kũrutana ũhoro wa Bibilia. Kwa ngerekano, kuuma mwaka wa 1943, Aira a Jehova makĩria ma 9,000 nĩ magunĩkĩte kuumana na gĩthomo kĩa bata kĩrĩa kĩrutanagwo Cukuru ya Bibilia ya Gileadi, na ũndũ ũcio nĩ ũmateithĩtie gũtungata marĩ amishonarĩ kana makahota kũhingia mawĩra mangĩ marĩa tũrutaga thĩinĩ wa thĩ yothe. Ningĩ o wiki, andũ milioni nyingĩ nginya arĩa matarĩ Aira a Jehova nĩ magunĩkaga kuumana na maũndũ marĩa tũrutagwo rĩrĩa tũcemanĩtie hamwe thĩinĩ wa ciũngano. Ningĩ nĩ tũrutaga andũ gũthoma na kwandĩka na nĩ tũrutĩte ibuku rĩa gũteithia andũ gwĩka ũguo na thiomi 120.

•   Gũteithia andũ. Twanateithia andũ hĩndĩ ĩrĩa magũmĩrũo nĩ mathĩna matiganĩte ta rĩrĩa kwarĩ na mbaara bũrũri-inĩ wa Rwanda mwaka wa 1994, kana rĩrĩa kwarĩ na gĩthingithia bũrũri-inĩ wa Haiti mwaka wa 2010.

 O na gũtuĩka ikundi icio citũ cia kĩĩwatho nĩ itũteithĩtie kũhingia maũndũ maingĩ, tũtigaga mwĩhoko witũ harĩ ikundi icio. Ithuothe nĩ tũririkanaga atĩ nĩ tũheetwo wĩra nĩ Ngai wa kũhunjia na kũrutana ũhoro ũrĩa mwega. (Mathayo 24:14; 28:19, 20) Twĩtĩkĩtie atĩ Ngai nĩwe ũtũmaga wĩra witũ ũthiĩ na mbere na ‘ũkũre.’—1 Akorintho 3:6, 7.