Nĩ twĩrutanagĩria mũno tũrĩ Aira a Jehova kũrũmia Ũkristiano ũrĩa Jesu aarutanire, o ũcio atũmwo ake maarũmagĩrĩra. Gĩcunjĩ gĩkĩ kĩarĩrĩirie na njĩra nguhĩ maũndũ marĩa twĩtĩkĩtie.

1.   Ngai. Tũthathayagia Ngai ũrĩa ũmwe wa ma na Mwene-Hinya-Wothe, o we Mũũmbi, na nĩwe wĩtagwo Jehova. (Thaburi 83:18; Kũguũrĩrio 4:11) Nĩwe Ngai wa Iburahimu, Musa, na Jesu.—Thama 3:6; 32:11; Johana 20:17.

2.   Bibilia. Twĩtĩkĩtie atĩ Bibilia yaandĩkirũo kũgerera roho wa Ngai nĩ ũndũ wa andũ. (Johana 17:17; 2 Timotheo 3:16) Wĩtĩkio witũ wĩhocetie harĩ mabuku mothe 66 ma Bibilia, ma “Kĩrĩkanĩro Kĩrĩa Gĩkũrũ” na “Kĩrĩkanĩro Kĩrĩa Kĩerũ.” Profesa ũmwe wa maũndũ ma ndini wĩtagwo Jason D. BeDuhn nĩ aatarĩirie ũndũ ũcio wega rĩrĩa aandĩkire atĩ Aira a Jehova makĩte “wĩtĩkio wao na maũndũ mao mothe kuuma Bibilia-inĩ, mategũtua o kabere ũrĩa Bibilia yagĩrĩirũo kuuga.” a

    Twĩtĩkĩtie Bibilia ĩrĩ yothe. O na kũrĩ ũguo, nĩ tũũĩ atĩ rĩmwe nĩ yaragia na njĩra ya ngerekano na kwoguo hĩndĩ ta ĩyo tũtitaũkagĩrũo nĩyo kiugo gwa kiugo.—Kũguũrĩrio 1:1.

3.   Jesu. Tũrũmagĩrĩra ũrutani wa Jesu Kristo na kĩonereria gĩake, na nĩ tũmũtĩĩte arĩ we Mũrũ wa Ngai na Mũhonokia witũ. (Mathayo 20:28; Atũmwo 5:31) Nĩ ũndũ ũcio, tũrĩ Akristiano. (Atũmwo 11:26) O na kũrĩ ũguo, nĩ twĩrutĩte kuuma Bibilia-inĩ atĩ Jesu tiwe Ngai Mwene-Hinya-Wothe, na atĩ gũtirĩ Maandĩko manyitaga mbaru ũrutani wa Ũtatũ.—Johana 14:28.

4.   Ũthamaki wa Ngai. Ĩno nĩ thirikari ya biũ ĩrĩ kũrĩa igũrũ, no ti kĩndũ kĩrĩ ngoro-inĩ cia Akristiano. Nĩ ĩgaathana ithenya rĩa thirikari cia andũ na ĩkinyanĩrie itanya rĩa Ngai harĩ thĩ. (Danieli 2:44; Mathayo 6:9, 10) Ũthamaki ũcio nĩ ũkũhingia maũndũ macio ica ikuhĩ, tondũ Bibilia yonanagia atĩ tũratũũra “matukũ-inĩ ma kũrigĩrĩria.”—2 Timotheo 3:1-5; Mathayo 24:3-14.

    Jesu nĩwe Mũthamaki wa Ũthamaki wa Ngai kũrĩa igũrũ. Aambĩrĩirie gwathana mwaka-inĩ wa 1914.—Kũguũrĩrio 11:15.

5.   Ũhonokio. Tũhonokagio kuuma kũrĩ mehia na gĩkuũ kũgerera igongona rĩa ũkũũri rĩa Jesu. (Mathayo 20:28; Atũmwo 4:12) Nĩguo mũndũ agunĩke nĩ igongona rĩu, no mũhaka onanie wĩtĩkio harĩ Jesu, agarũre mũtũũrĩre wake na abatithio. (Mathayo 28:19, 20; Johana 3:16; Atũmwo 3:19, 20) Ciĩko cia mũndũ nĩcio cionanagia atĩ wĩtĩkio wake wĩ muoyo. (Jakubu 2:24, 26) O na kũrĩ ũguo, ti kĩyo kĩa mũndũ gĩgaatũma ahonokio, no nĩ “ũtugi mũnene wa Ngai.”—Agalatia 2:16, 21.

6.   Igũrũ. Jehova Ngai, Jesu Kristo, na araika arĩa ehokeku maikaraga ciikaro-inĩ cia roho. b (Thaburi 103:19-21; Atũmwo 7:55) Gakundi kanini ka andũ 144,000 nĩ makaariũkio magatũũre kũrĩa igũrũ nĩguo maathane hamwe na Jesu Ũthamaki-inĩ.—Danieli 7:27; 2 Timotheo 2:12; Kũguũrĩrio 5:9, 10; 14:1, 3.

7.   Thĩ. Ngai oombire thĩ ĩtuĩke mũciĩ wa mũndũ tene na tene. (Thaburi 104:5; 115:16; Kohelethu 1:4) Ngai nĩ akaarathima andũ athĩki amahe ũgima mwega wa mwĩrĩ na muoyo wa tene na tene thĩinĩ wa paradiso gũkũ thĩ.—Thaburi 37:11, 34.

8.   Mathĩna na maũndũ moru. Maũndũ macio maambĩrĩirie rĩrĩa mũraika ũmwe aaremeire Ngai. (Johana 8:44) Mũraika ũcio, ũrĩa wacokire gwĩtwo “Shaitani” na “Mũcukani” thutha wa kũremera Ngai, nĩ aaheenereirie aciari aitũ a mbere manyitanĩre nake, na maumĩrĩra makoretwo marĩ moru mũno harĩ njiarũa ciao. (Kĩambĩrĩria 3:1-6; Aroma 5:12) Nĩgetha thitango ĩrĩa yoimĩririo nĩ Shaitani ĩhote gũcokio, Ngai nĩ etĩkĩrĩtie maũndũ moru na mathĩna mathiĩ na mbere, no ndekũreka matũũre tene na tene.

9.   Gĩkuũ. Mũndũ akua nĩ gũtiga atigaga gũtũũra. (Thaburi 146:4; Kohelethu 9:5, 10) Ndathiaga kũherithio icua-inĩ rĩa mwaki wa tene na tene.

    Ngai nĩ akaariũkia andũ bilioni nyingĩ. (Atũmwo 24:15) O na kũrĩ ũguo, arĩa makaarega kwĩruta wendi wa Ngai thutha wa kũriũkio, nĩ makaaniinwo tene na tene matarĩ na mwĩhoko wa gũkaariũkio rĩngĩ.—Kũguũrĩrio 20:14, 15.

10.   Famĩlĩ. Nĩ tũrũmagia ithimi cia Ngai cia kuuma o kĩambĩrĩria ciĩgiĩ kĩhiko, atĩ kĩhiko kĩagĩrĩirũo gũkorũo gatagatĩ-inĩ ka mũthuri ũmwe na mũtumia ũmwe, na atĩ gĩtũmi tu gĩa gũtigana nĩ ngomanio itagĩrĩire. (Mathayo 19:4-9) Tũkoragwo na ma atĩ ũũgĩ ũrĩa ũkoragwo thĩinĩ wa Bibilia nĩ ũteithagia famĩlĩ igaacĩre.—Aefeso 5:22–6:1.

11.   Ũthathaiya witũ. Tũtihũthagĩra mĩtharaba kana mĩhianano ĩngĩ o yothe ũthathaiya-inĩ. (Gũcokerithia Maathani 4:15-19; 1 Johana 5:21) Ũthathaiya witũ ũkoragwo na maũndũ maya ma bata:

    •   Kũhoya Ngai.—Afilipi 4:6.

    •   Gũthoma na kwĩruta Bibilia.—Thaburi 1:1-3.

    •   Gwĩcũrania maũndũ marĩa twĩrutĩte Bibilia-inĩ.—Thaburi 77:12.

    •   Gũcemania hamwe nĩgetha tũhoe, twĩrute Bibilia, tũine, twarie igũrũ rĩgiĩ maũndũ marĩa twĩtĩkĩtie, na twĩkĩrane ngoro.—Akolosai 3:16; Ahibirania 10:23-25.

    •   Kũhunjia “ũhoro . . . mwega wa Ũthamaki.”—Mathayo 24:14.

    •   Gũteithia arĩa marĩ na thĩna.—Jakubu 2:14-17.

    •   Gwaka na kũmenyerera Nyũmba cia Ũthamaki na nyũmba ingĩ iria tũhũthagĩra kũruta andũ Bibilia thĩinĩ wa thĩ yothe.—Thaburi 127:1.

    •   Gũteithia hĩndĩ ya icanjama.—Atũmwo 11:27-30.

12.   Ndini itũ. Tũbangĩtwo na ciũngano, na o kĩũngano kĩrũgamagĩrĩrũo nĩ kĩama gĩa athuri. O na kũrĩ ũguo, athuri acio mationagwo marĩ ta atongoria a ndini, na matirĩhagwo. (Mathayo 10:8; 23:8) Tũtirutaga gacunjĩ ga ikũmi na gũtirĩ mĩhothi yũnganagio kũrĩa tũthathayagĩria. (2 Akorintho 9:7) Wĩra witũ wothe ũtwarithagio na mbere nĩ mĩhothi ya kwĩyendera kuuma kũrĩ mũndũ o wothe.

     Aira a Jehova thĩinĩ wa thĩ yothe mamũkagĩra ũtongoria kuuma kũrĩ gakundi kanini ka Akristiano agimaru kĩĩroho, arĩa makoragwo wabici-inĩ nene ya Aira a Jehova, na nĩo Kĩama Kĩrĩa Gĩtongoragia.—Mathayo 24:45.

13.   Ũrũmwe witũ. Tũkoragwo na wĩtĩkio ũmwe ithuothe. (1 Akorintho 1:10) Ningĩ nĩ twĩkaga ũrĩa wothe tũngĩhota tũtigakorũo na nyamũkano cia gĩĩkabira, rũrĩrĩ, rũruka, ũhoti wa kĩĩmbeca, kana kũrĩa mũndũ oimĩte. (Atũmwo 10:34, 35; Jakubu 2:4) No ũguo ti kuuga atĩ mũndũ ndakoragwo na wĩyathi wa gwĩthuurĩra. Mũira o wothe wa Jehova atuaga matua kũringana na thamiri yake ĩrĩa ĩmenyeretio nĩ Bibilia.—Aroma 14:1-4; Ahibirania 5:14.

14.   Mĩthiĩre itũ. Maũndũ-inĩ mothe, nĩ twĩrutanagĩria kuonania wendo tũtarĩ na mwĩyendo. (Johana 13:34, 35) Nĩ twĩthemaga maũndũ marĩa matakenagia Ngai, o hamwe na ũhũthĩri mũũru wa thakame, ta gwĩkĩrũo thakame mĩkiha-inĩ. (Atũmwo 15:28, 29; Agalatia 5:19-21) Nĩ tũtũũragia thayũ na tũtiĩingĩranagia na mbaara. (Mathayo 5:9; Isaia 2:4) Nĩ tũtĩĩte thirikari cia kũrĩa tũikaraga na tũgathĩkĩra mawatho ma cio angĩkorũo ti mũgarũ na watho wa Ngai.—Mathayo 22:21; Atũmwo 5:29.

15.   Ũrĩa tũikaranagia na andũ arĩa angĩ. Jesu aathanire ũũ: “No mũhaka wende mũndũ ũrĩa mũriganĩtie nake o ta ũrĩa wĩyendete wee mwene.” Ningĩ aaugire atĩ Akristiano “ti a thĩ ĩno.” (Mathayo 22:39; Johana 17:16) Nĩ tũgeragia ‘gwĩka andũ othe wega,’ o tũgĩĩthemaga kũnyita mbaru mwena o wothe wa gĩũteti, tũtekwĩingĩrania na ndini iria ingĩ. (Agalatia 6:10; 2 Akorintho 6:14) O na kũrĩ ũguo, nĩ tũtĩaga mawoni ma andũ arĩa angĩ megiĩ maũndũ macio.—Aroma 14:12.

 Angĩkorũo ũrĩ na ciũria ingĩ ciĩgiĩ wĩtĩkio wa Aira a Jehova, no ũthome ũhoro makĩria thĩinĩ wa Website itũ, waranĩrie na wabici citũ, ũũke ũthathaiya-inĩ witũ Nyũmba-inĩ ya Ũthamaki ĩrĩa ĩrĩ hakuhĩ nawe, kana waranĩrie na Mũira wa Jehova itũũra-inĩ rĩanyu.