Ndaciarĩirũo taũni-inĩ ya La Ceiba, Honduras. Nĩ niĩ ndarĩ mũnini harĩ ciana ithano na no niĩ ndarĩ mwana wa kahĩĩ. Famĩlĩ-inĩ itũ, no niĩ itaarĩ na ũhoti wa kũigua. Tũrĩ na famĩlĩ itũ twaikaraga kũndũ kwarĩ na mogwati maingĩ, na twarĩ athĩni mũno. Ũtũũro nĩ waritũhire o na makĩria thutha wa baba kũgwa kuuma nyũmba igũrũ arĩ wĩra-inĩ na agĩkua ndĩ na kĩndũ mĩaka ĩna.

 Mami nĩ eekaga ũrĩa wothe angĩahotire gũtũrũmbũiya tũrĩ na aarĩ a maitũ, no ndwarĩ ũndũ mũhũthũ kuona mbeca cia kũngũrĩra nguo. Kũngĩoirire, kaingĩ nĩ ndaiguaga heho tondũ ndiakoragwo na nguo cia heho.

 Ngĩkũra nĩ nderutire Rũthiomi rwa Kwaria na Ciĩko rwa Honduras (LESHO), rũrĩa rwahotithagia kwaranĩria na andũ angĩ arĩa matarĩ ũhoti wa kũigua. No mami na aarĩ a maitũ matioĩ rũthiomi rũu rwa LESHO, na maahũthagĩra o ciĩko nini iria moĩ na ingĩ cia gwĩtungĩra nĩguo mahote kwaranĩria na niĩ. O na kũrĩ ũguo, mami nĩ aanyendete na nĩ aangitagĩra kuumana na mogwati. Akĩhũthĩra ciĩko nini iria oĩ, nĩ aanjĩrire ndĩĩtheme mĩtugo mĩũru ta kũnyua thigara na kũnyua njohi gũkĩria gĩthimi. Nĩ ũndũ ũcio, nĩ ngenaga tondũ ndiatuĩkire ngombo ya maũndũ macio.

 Ndĩ mũnini, mami nĩ aandwaraga Kanitha wa Gatoreki, no gũtirĩ ũndũ ndataũkagĩrũo tondũ gũtirĩ mũndũ wandaũragĩra na rũthiomi rwa kwaria na ciĩko. Nĩ ndanogaga mũno nginya ngĩtiga gũthiĩ kanitha ndĩ na mĩaka ikũmi. O na kũrĩ ũguo, no ndendaga kũmenya Ngai makĩria.

 Mwaka-inĩ wa 1999 rĩrĩa ndarĩ na mĩaka 23, nĩ ndacemanirie na mũtumia ũmwe wa kuuma Amerika (US) ũrĩa warĩ wa kanitha ũmwe wa evangelical. Nĩ aandutire maũndũ megiĩ Bibilia na akĩnduta Rũthiomi rwa Kwaria na Ciĩko rwa Amerika. Nĩ ndakenirio mũno nĩ maũndũ marĩa nderutire kuuma Bibilia-inĩ nginya ngĩtua itua rĩa gũtuĩka mũhunjia wa kanitha. Kwoguo nĩ ndathaamĩire Puerto Rico nĩguo thiĩ gĩthomo gĩa Gĩkristiano kĩa andũ arĩa matarĩ ũhoti wa kũigua. Rĩrĩa ndacokire La Ceiba mwaka wa 2002, nĩ ndambĩrĩirie kanitha wa andũ arĩa matarĩ ũhoti wa kũigua ngĩteithĩrĩrio nĩ arata amwe akwa. Ũmwe wa arata acio ũrĩa wetagwo Patricia, thutha-inĩ nĩ aatuĩkire mũtumia wakwa.

 Tondũ nĩ niĩ ndarĩ mũhunjia wa kanitha itũ, ndarutanaga na rũthiomi rwa LESHO, ngonania mbica cia ng’ano cia Bibilia, na ngeka ciĩko ironania ng’ano icio nĩguo ndeithie arĩa matarĩ ũhoti wa kũigua mataũkĩrũo. Ningĩ nĩ ndaceeragĩra andũ arĩa matarĩ ũhoti wa kũigua taũni-inĩ iria ciarĩ hakuhĩ nĩguo ndĩmekĩre ngoro na ndĩmateithie kũhiũrania na mathĩna mao. O na nĩ ndathiire iceera rĩa ũmishonarĩ bũrũri-inĩ wa Zambia na Amerika (US). No ũrĩa kũrĩ nĩ atĩ ndioĩ maũndũ maingĩ megiĩ Bibilia. Ndamaheaga o ũhoro ũrĩa ndahetwo na ũrĩa ndonaga mbica-inĩ. Ma nĩ atĩ, ndarĩ na ciũria nyingĩ gũkĩra macokio.

 Mũthenya ũmwe, arũmĩrĩri amwe a kanitha wakwa nĩ maambĩrĩirie gũtheremia ũhoro wa maheeni ũnjĩgiĩ. Mooigire atĩ nĩ ndanyuaga njohi gũkĩria gĩthimi na atĩ ndiarĩ mwĩhokeku harĩ mũtumia wakwa. Nĩ ndaiguire ũũru mũno na ngĩrakara. Ihinda inini thutha ũcio, tũrĩ na Patricia tũkiuma kanitha ũcio.

 Aira a Jehova nĩ maatũceeragĩra kaingĩ tũrĩ na Patricia, no gũtirĩ hĩndĩ twamathikagĩrĩria. No thutha wa kuuma kanitha-inĩ itũ, Patricia nĩ eetĩkĩrire kwĩruta Bibilia na Thomas na mũtumia wake Liccy, arĩa maarĩ Aira a Jehova. Nĩ maangenirie tondũ o na gũtuĩka maarĩ na ũhoti wa kũigua, nĩ mooĩ rũthiomi rwa kwaria na ciĩko. Kwoguo thutha-inĩ ngĩambĩrĩria kũnyitanĩra nao makĩĩruta na Patricia.

 Nĩ twerutire kwa ihinda rĩa mĩeri ĩigana ũna tũkĩhũthĩra video cia Rũthiomi rwa Kwaria na Ciĩko rwa Amerika. No rĩrĩa arata amwe aitũ maatwĩrire atĩ Aira a Jehova marũmagĩrĩra andũ, nĩ twatigire kwĩruta Bibilia. O na gũtuĩka Thomas nĩ aanyonirie ũira wa atĩ Aira a Jehova matirũmagĩrĩra andũ, ndiamwĩtĩkirie.

 Mĩeri ĩigana ũna thutha ũcio, Patricia nĩ aanyitirũo nĩ mũrimũ wa gũthuthĩka ngoro, na akĩhoya Ngai amũtũmĩre Aira a Jehova rĩngĩ. Ihinda inini thutha ũcio, mũtumia ũmwe twariganĩtie nake warĩ Mũira wa Jehova nĩ aaceereire Patricia na akiuga no orie Liccy aceerere Patricia rĩngĩ. Liccy nĩ oonanirie atĩ aarĩ mũrata wa ma. Aaceeragĩra Patricia o kiumia nĩguo amwĩkĩre ngoro na erute Bibilia nake. O na kũrĩ ũguo, niĩ no ndarĩ na nganja na Aira a Jehova.

 Mwaka-inĩ wa 2012, Aira a Jehova nĩ maarĩ na kambĩini ya mwanya ya kuonania video ya Wee no Wende Kũmenya Ma? ya rũthiomi rwa LESHO. Liccy nĩ aatũreheire video ĩyo. Rĩrĩa ndamĩĩroreire, nĩ ndamakire kuona atĩ maũndũ maingĩ marĩa ndarutanaga, ta ũhoro wa mwaki wa icua na wa atĩ muoyo ndũkuaga, matiarĩ Bibilia-inĩ.

 Kiumia kĩrĩa kĩarũmĩrĩire nĩ ndathiire Nyũmba-inĩ ya Ũthamaki ya Aira a Jehova nĩguo njarie na Thomas. Ngĩmwĩra atĩ nĩ ndendaga kũruta arĩa matarĩ ũhoti wa kũigua ma cia Bibilia no ti ndĩ Mũira wa Jehova. Muoroto wakwa warĩ kwambĩrĩria kanitha yakwa nĩ ũndũ wa arĩa matarĩ ũhoti wa kũigua. Thomas nĩ aangaathĩrĩirie nĩ ũndũ wa kĩyo kĩu kĩerũ, no agĩcoka akĩnyonia Aefeso 4:5 ĩrĩa yonanagia bata wa gũkorũo na ũrũmwe thĩinĩ wa kĩũngano kĩa Akristiano a ma.

 Ningĩ Thomas nĩ aaheire video ya Mashahidi wa Yehova—Imani Yenye Matendo, Sehemu ya 1: Kutoka Gizani ya Rũthiomi rwa Kwaria na Ciĩko rwa Amerika. Video ĩyo nĩ yonanirie ũrĩa gĩkundi kĩa andũ gĩathuthuririe Bibilia na kinyi nĩguo gĩtaũkĩrũo nĩ ma ciĩgiĩ morutani ma mũthingi. Ngĩrorera video ĩyo nĩ ndataũkagĩrũo nĩ ũrĩa andũ acio maaiguaga. Ndacaragia ũhoro ũrĩa wa ma o tao. Video ĩyo nĩ yatũmire ngorũo na ma atĩ Aira a Jehova marutanaga ũhoro ũrĩa wa ma, tondũ maũndũ marĩa metĩkĩtie mehocetie biũ harĩ Bibilia. Kwoguo ngĩcokerera kwĩruta Bibilia, na mwaka-inĩ wa 2014, tũrĩ na Patricia tũkĩbatithio tũgĩtuĩka Aira a Jehova.

 Nĩ nyendete kĩũngano kĩa Aira a Jehova tondũ gĩkoragwo kĩrĩ gĩtheru kĩĩmĩtugo o ta ũrĩa Ngai arĩ mũtheru. Athathaiya a kĩũngano kĩu makoragwo marĩ atheru ũhoro-inĩ wĩgiĩ mĩario na kũhiũrania na andũ arĩa angĩ. Makoragwo na thayũ na nĩ mekĩranaga ngoro. Aira a Jehova makoragwo na ũrũmwe na othe marutanaga maũndũ mahaanaine megiĩ ma cia Bibilia gũtekũmakania bũrũri ũrĩa marĩ kana rũthiomi rũrĩa maragia.

 Nĩ ngeneire kwĩruta maũndũ marĩa Bibilia ĩrutanaga. Kwa ngerekano, nĩ nderutire atĩ Jehova nĩwe Ngai Mwene-Hinya-Wothe, Mwathani Mũnene igũrũ rĩa thĩ yothe. Nĩ endete arĩa marĩ ũhoti wa kũigua o hamwe na arĩa matarĩ ũhoti wa kũigua. Nĩ ngenaga nĩ ũrĩa Ngai anyendete. Ningĩ nĩ nderutire atĩ thĩ nĩ ĩgatuĩka paradiso na atĩ tũrĩ na mweke wa gũgaakenera muoyo wa tene na tene tũrĩ na ũgima mwega wa mwĩrĩ. Nĩ ndĩriragĩria mũno gũkoona ũndũ ũcio ũkĩhinga!

 Tũrĩ na Patricia nĩ twendete kwaria ũhoro wĩgiĩ Bibilia na andũ angĩ arĩa matarĩ ũhoti wa kũigua. Rĩu nĩ twĩrutaga Bibilia na arũmĩrĩri amwe a kanitha ĩrĩa yarĩ itũ. No ndikoragwo na ciũria ciĩgiĩ maũndũ marĩa ndutanaga, ta iria ndarĩ nacio rĩrĩa ndarĩ mũhunjia wa kanitha. Nĩ ndonire macokio ma ciũria iria ndarĩ nacio kũgerera kwĩruta Bibilia na Aira a Jehova.