Ageni aingĩ nĩ maceeraga kwĩrorera irurumo cia maĩ ciũĩkaine mũno iria irĩ hakuhĩ na taũni ya Pagsanjan thĩinĩ wa Philippines. Baba witũ, Nardo Leron, aakũrĩire kũu na maarĩ athĩni. Nĩ ũndũ wa kuona ungumania thirikari-inĩ, mbũtũ-inĩ ya thigari, na kũrĩa aarutaga wĩra, nĩ aagĩire marũrũ na marakara.

 Aciari akwa nĩ maarutaga wĩra na kĩyo nĩguo marere ciana ciao inyanya. Kaingĩ nĩ maaikaraga kũraihu na mũciĩ ihinda iraya, makĩrora mĩmera ĩrĩa yarĩ irĩma-inĩ. Maita maingĩ, niĩ na mũrũ wa maitũ Rodelio nĩ ithuĩ twehang’agĩra, na kaingĩ twaikaraga tũrĩ ahũtu. Rĩrĩa twarĩ ciana, tũtiarĩ na mahinda maingĩ ma gũthaaka. Kuuma tũrĩ na mĩaka mũgwanja, ithuothe ciana nĩ twabataraga kũruta wĩra mũgũnda-inĩ, tũgakuua mĩrigo mĩritũ ya coconut tũgereire tũcĩra-inĩ tũikũrũkĩrĩru twa kĩrĩma-inĩ. Mũrigo ũngĩakorirũo ũrĩ mũritũ mũno ũndũ ũtangĩoeka, twabataraga kũũkururia.

 Nĩ tuomagĩrĩria kũhũũrũo nĩ baba, no ũndũ ũrĩa watũtuuraga mũno nĩ kuona akĩhũũra mami. Nĩ twageragia kũmũgirĩrĩria no tũtiahotaga. Tũrĩ na Rodelio nĩ twarĩkanĩire na hitho atĩ nĩ tũkooraga baba twaneneha. Nĩ nderiragĩria mũno kũgĩa na baba ũtwendete!

 Nguĩte ngoro na ngarakara mũno nĩ ũndũ wa ũrĩa baba aahũthagĩra ũhinya, nĩ ndoimire mũciĩ ndĩ na mĩaka 14. Nĩ ndaikarire mĩkĩra-inĩ ya njĩra kwa ihinda, na ngĩambĩrĩria kũhũthĩra bangi. Mũthia-inĩ, nĩ ndambĩrĩirie kũruta wĩra gatarũ-inĩ, wa gũtwara ageni irurumo-inĩ.

 Thutha wa mĩaka ĩigana ũna, ngĩambĩrĩria gĩthomo kĩa yunivasĩtĩ taũni-inĩ ya Manila. No tondũ nĩ ndacokaga Pagsanjan kũruta wĩra mũthia-inĩ wa kiumia, ndarĩ na mahinda manini ma gũthoma. Ũtũũro wakwa warĩ mũritũ na ndiarĩ na muoroto, na bangi ndĩandeithagia kũnyihanyihia mĩtangĩko yakwa. Ngĩambĩrĩria kũhũthĩra ndawa cia kũrebia cia gũtũma njigue njanjamũkĩte, cocaine, na heroin. Ndawa cia kũrebia ciatwaranaga na mĩtugo ya waganu. Ndathiũrũrũkĩirio nĩ ũthĩni, wagi wa kĩhooto, na mathĩna. Nĩ ndathũire thirikari na ndonaga ta arĩ yo yarehaga maũndũ macio. Ndoragia Ngai atĩrĩ, “Ũtũũro ũhaana ũũ nĩkĩ?” No ndionire macokio ndini-inĩ ngũrani iria ndatuĩrĩtie. Ngĩnyua ndawa cia kũrebia o na makĩria nĩguo hithe kĩeha gĩakwa.

 Mwaka wa 1972, arutwo thĩinĩ wa Philippines nĩ maabangire mĩgomo ya kũregana na thirikari. Nĩ ndanyitanĩire mũgomo-inĩ ũmwe, na gũkĩgĩa na maũndũ ma ũhinya. Andũ aingĩ makĩnyitwo, na thutha wa mĩeri ĩigana ũna, bũrũri ũkĩambĩrĩria gũtongorio nĩ wathani wa njeshi.

 Ngĩambĩrĩria gũikara mĩkĩra-inĩ ya njĩra o rĩngĩ, no rita rĩrĩ nĩ ndetigĩraga anene nĩ ũndũ wa ũrĩa ndanyitĩte itemi harĩ kũregana na thirikari. Nĩguo nyone mbeca cia kũgũra ndawa cia kũrebia, ngĩambĩrĩria kũiya na thutha-inĩ kũhũũraga ũmaraya na itonga na ageni. Ndiamakaga kana nĩ ngũtũũra muoyo kana nĩ ngũkua.

 Ihinda-inĩ rĩu, mami na mũrũ wa maitũ ũrĩa mũnyinyi nĩ maambĩtie kwĩruta Bibilia na Aira a Jehova. Baba nĩ aarakarire mũno, na agĩcina mabuku mao marĩa maarĩ na ũhoro wa Bibilia. No magĩthiĩ na mbere gũkirĩrĩria na makĩbatithio magĩtuĩka Aira a Jehova.

 Mũthenya ũmwe, Mũira wa Jehova ũmwe nĩ eerire baba ũhoro wĩgiĩ kĩĩranĩro kĩa Bibilia kĩgiĩ ihinda rĩũkĩte rĩrĩa gũgaakorũo na kĩhooto kĩa ma thĩinĩ wa thĩ yothe. (Thaburi 72:12-14) Kĩĩrĩgĩrĩro kĩu nĩ gĩakenirie baba mũno nginya agĩtua itua rĩa gwĩthuthurĩria we mwene. Thĩinĩ wa Bibilia, nĩ oonire kĩĩranĩro kĩa Ngai kĩa thirikari njega, na akĩona nginya maũndũ marĩa Ngai erĩgagĩrĩra harĩ athuri na maithe. (Aefeso 5:28; 6:4) Kahinda kanini thutha ũcio, we hamwe na arĩa angĩ othe tũciaranĩirũo nao magĩtuĩka Aira a Jehova. Tondũ ndarĩ kũraihu na mũciĩ, ndiamenyaga ũhoro ũcio.

 Mwaka-inĩ wa 1978, nĩ ndathamĩire Australia. No o na ndĩ bũrũri-inĩ ũcio ũiyũire thayũ na ũtonga mũingĩ, ndionire thayũ wa meciria. No ndathiire na mbere na mũtugo wa kũnyua njohi na kũhũthĩra ndawa cia kũrebia. Thutha-inĩ mwaka ũcio, Aira a Jehova nĩ maanjeereire. Nĩ ndakenirio nĩ ũndũ ũrĩa maanyonirie Bibilia-inĩ wĩgiĩ thĩ ĩrĩ na thayũ, no nĩ ndetigagĩra kũnyitanĩra nao.

 Ihinda inini thutha ũcio, nĩ ndacokire Philippines ciumia cigana ũna. Arĩa tũciaranĩirũo nao makĩnjĩra atĩ baba nĩ eerutanĩirie mũno gũtuĩka mũndũ mwega, no ngoro yakwa yarĩ na marũrũ maingĩ ũũ atĩ nĩ ndageragia kũmwĩthema biũ.

 Mwarĩ wa maitũ ũrĩa mũnyinyi nĩ aandaarĩirie kũgerera Bibilia kĩrĩa gĩtũmĩte ũtũũro ũkorũo ũiyũire mathĩna na wagi wa kĩhooto. Nĩ ndagegire kuona atĩ kairĩtu kanini gatahĩtũkĩire maũndũ maingĩ ũtũũro-inĩ no kahote kũnjokeria ciũria ciakwa. Itanoimagara, baba nĩ aaheire ibuku rĩa Unaweza Kuishi Milele Katika Paradiso Duniani. a Aanjĩrire ũũ: “Tiga gũcaria macokio kũndũ kũngĩ. Ibuku rĩrĩ nĩ rĩgũgũteithia kuona kĩrĩa ũracaria.” Akĩnjĩkĩra ngoro njarie Aira a Jehova ndacoka Australia.

 Ngĩrũmĩrĩra ũtaaro wa baba na ngĩona Nyũmba ya Ũthamaki ya Aira a Jehova hakuhĩ na kũrĩa ndaikaraga Brisbane. Ngĩtĩkĩra kwĩrutaga Bibilia nao. Morathi ma Bibilia ta marĩa marĩ thĩinĩ wa Danieli mũrango wa 7 na Isaia mũrango wa 9 maanyonirie atĩ thirikari ya Ngai, ĩrĩa ĩtarĩ ungumania o na hanini, nĩ ĩgaatũthamakĩra ihinda rĩũkĩte. Ngĩĩruta atĩ nĩ tũgaakenera Paradiso thĩinĩ wa thĩ. Nĩ ndendaga gwĩtĩkĩrĩka harĩ Ngai, no ngĩmenya atĩ nĩ ndabataraga kũgirĩrĩria marakara makwa, gũtiga kũhũthĩra ndawa cia kũrebia na kũnyua njohi ũũru, na gũtigana na mũtũũrĩre wakwa wa waganu. Tugĩtigana na mũirĩtu ũrĩa twaikaranagia nake, na ngĩtigana biũ na ndawa cia kũrebia na kũnyua njohi ũũru. O ũrĩa ndathiaga ndĩhokete Jehova makĩria, noguo ndamũhoyaga andeithie gwĩka mogarũrũku mangĩ.

 O kahora ngĩona atĩ maũndũ marĩa nderutaga no magarũre ũtũũro wa mũndũ. Bibilia yugaga atĩ tũngĩĩrutanĩria, no tũhote kwĩhumba “ũmũndũ mwerũ.” (Akolosai 3:9, 10) O ũrĩa nderutanagĩria gwĩka ũguo, nĩ ndonire atĩ ũhoro ũrĩa ndaiguĩte wĩgiĩ baba gũcenjia ũmũndũ wake no kũhoteke warĩ wa ma. Handũ ha kũigua ndĩ na marakara na rũmena, ndendaga gũcokia thayũ hamwe nake. Mũico-inĩ, ngĩohera baba na ngĩthirũo nĩ rũmena rũrĩa ndatũũrĩte naruo kuuma ndĩ o mwana.

 Rĩrĩa ndarĩ mwĩthĩ, kaingĩ nĩ ndarũmagĩrĩra andũ angĩ gwĩka maũndũ moru. Mũkaana ũrĩa ũrĩ thĩinĩ wa Bibilia nĩ wonekire atĩ nĩ wa ma ũtũũro-inĩ wakwa​—thiritũ njũru nĩ ciahĩtithirie. (1 Akorintho 15:33) No rĩu nĩ ngĩĩte na arata a kwĩhokeka gatagatĩ-inĩ ka Aira a Jehova, na nĩ mandeithĩtie gũtuĩka mũndũ mwega. Ningĩ gatagatĩ-inĩ kao nĩ ndagĩire na mũtumia mwega wĩtagwo Loretta. Tũrĩ hamwe, tũrutaga andũ arĩa angĩ ũrĩa Bibilia ĩngĩmateithia.

 Nĩ ũndũ wa gũteithio nĩ Bibilia, baba nĩ aatuĩkire mũndũ ũrĩa iteeciragia no atuĩke​—mũthuri weendete mami na Mũkristiano mwĩnyihia na wendete thayũ. Rĩrĩa twacemanirie thutha wa gũkorũo batithĩtio ngatuĩka Mũira wa Jehova mwaka wa 1987, baba nĩ aahĩmbĩirie riita rĩa mbere ũtũũro-inĩ wakwa!

 Ihinda-inĩ rĩa makĩria ma mĩaka 35, baba nĩ aathiire na mbere kũnyitanĩra na mami harĩ kwĩra andũ arĩa angĩ kĩĩrĩgĩrĩro kĩrĩa Bibilia ĩranĩire. Aatuĩkire mũthuri ũrĩ kĩyo na wendo na nĩ ooĩkaine harĩ gũteithia andũ. Mĩaka-inĩ ĩyo, nĩ nderutire kũmũhe gĩtĩo na kũmwenda. Nĩ nderahagĩra gwĩtwo mũrũ wake! Aakuire mwaka wa 2016, no rĩrĩa ndeciria ũhoro wake nĩ ngenaga, nĩ ũndũ wa kũmenya atĩ niĩ nake nĩ twekire mogarũrũku manene harĩ ũmũndũ witũ o ũrĩa twahũthagĩra morutani ma Bibilia. Ndiiguaga ndĩ na rũmena rũrĩa ndarĩ naruo kũmwerekera o na hanini. Na nĩ ngenaga mũno nĩ ũndũ wa kũmenya Ithe witũ wa igũrũ, Jehova Ngai, ũrĩa wĩranĩire atĩ nĩ akaaniina maũndũ mothe marĩa marehaga mĩtangĩko famĩlĩ-inĩ kũndũ guothe.