Famĩlĩ itũ yumĩte bũrũri-inĩ wa Tonga, ũrĩa ũkoragwo na icigĩrĩra ta 170, na ũkoragwo mwena wa mũhuro wa Pacific. Kũu Tonga tũtiarĩ na indo nyingĩ na tũtiarĩ na thitima kana ngaari. No gwitũ mũciĩ nĩ kwarĩ na maĩ ma mũberethi na nĩ twarĩ na ngũkũ cigana ũna. Rĩrĩa twahinga cukuru tũrĩ na ariũ a maitũ erĩ, nĩ twateithagia baba kũrĩma mũgũnda-inĩ witũ kũrĩa twakũragia marigũ, ikwa, ndũma, na mĩanga. Baba aarũmbũyagia famĩlĩ itũ na njĩra ya kwendia indo icio, o hamwe na kũruta tũmawĩra tũngĩ tũnini tũnini. O ta andũ aingĩ arĩa maikaraga icigĩrĩra-inĩ icio, famĩlĩ itũ nĩ yaheete Bibilia gĩtĩo, na tũtiatĩĩraga kanitha. O na kũrĩ ũguo, tuoonaga atĩ nĩguo mũndũ akenere mũtũũrĩre mwega no mũhaka angĩathamĩire bũrũri-inĩ ũngĩ mũtongu.

 Rĩrĩa ndaarĩ na mĩaka 16, mama nĩ aabangire atĩ famĩlĩ itũ ĩthamĩre California, U.S.A. Nĩ twabatarire gwĩka ũgarũrũku mũnene wĩgiĩ ũndũire! O na gũtuĩka maũndũ maitũ ma kĩĩmbeca nĩ maagagĩrire, twaikaraga itũũra-inĩ rĩarĩ ithĩni rĩaihũire maũndũ ma ũhinya na ũhũthĩri wa ndawa cia kũrebia. Rĩngĩ nĩ twaiguaga mĩcinga ĩkĩrathũkio ũtukũ, na andũ aingĩ arĩa maaikaraga hakuhĩ na gwitũ nĩ meetigagĩra gũtharĩkĩrũo nĩ ikundi cia eki-naĩ. Andũ aingĩ nĩ maakuuaga mĩcinga ya kwĩgitĩra kana ya kũhũthĩra rĩrĩa kuoimĩra ngucanio. O na nĩ ndũũraga na rithathi gĩthũri-inĩ ndarathirũo tũrĩ na ngucanio.

 Ndĩ cukuru ya sekondarĩ nĩ ndeendaga gwĩtĩkĩrĩka nĩ andũ arĩa angĩ ethĩ. Kahora kahora nĩ ndathiire ndĩingĩrĩtie maruga-inĩ makĩrĩtie njano, kũnyua njohi hatarĩ gĩthimi, maũndũ ma ũhinya, na kũhũthĩra ndawa cia kũrebia. Thutha wa ihinda, ngĩambĩrĩria kũhũthagĩra cocaine hĩndĩ ciothe. Nĩguo nyone mbeca cia kũgũra ndawa cia kũrebia, nĩ ndaambĩrĩirie kũiya. O na gũtuĩka andũ a famĩlĩ itũ nĩ maarikĩrĩte mũno maũndũ-inĩ ma kanitha, ndiaheagwo ũtaaro ũrĩa ũngĩandeithirie kũregana na hatĩka cia arata ũhoro-inĩ wĩgiĩ gwĩka maũndũ moru. Maita maingĩ nĩ ndekoraga nyitĩtwo nĩ ũndũ wa gwĩka maũndũ ma ũhinya. Ũtũũro wakwa wathiaga o ũgĩthũkaga! Macũngĩrĩro-inĩ ngĩohwo njera.

 Mũthenya ũmwe ndĩ o njera mwaka-inĩ wa 1997, mũndũ ũmwe tuoohetwo nake nĩ oonire nyitĩte Bibilia. Kwarĩ ihinda-inĩ rĩa Krismasi, ihinda rĩonagwo rĩrĩ itheru mũno nĩ andũ a Tonga. Nĩ aanjũririe kana nĩ njũĩ ũrĩa Bibilia ĩrutanaga ũhoro-inĩ wĩgiĩ gũciarũo gwa Kristo, no ndirĩ ũndũ o na ũmwe ndoĩ wĩgiĩ ũndũ ũcio. Nĩ aanyonirie Bibilia-inĩ ũhoro mũhũthũ wĩgiĩ gũciarũo kwa Jesu, na ngĩona atĩ morutani maingĩ megiĩ Krismasi o na matigwetetwo Bibilia-inĩ. (Mathayo 2:1-12; Luka 2:5-14) Nĩ ndagegirio nĩ ũndũ ũcio, na ngĩrigwo nĩ maũndũ marĩkũ mangĩ Bibilia yarĩrĩirie. Mũndũ ũcio aakoretwo agĩthiĩ mĩcemanio-inĩ ya o kiumia ĩrĩa Aira a Jehova meekagĩra kũu njera, na nĩ ndatuire itua rĩa gũthiĩ hamwe nake. Maaragĩrĩria ibuku rĩa Bibilia rĩa Kũguũrĩrio. O na gũtuĩka ndiataũkagĩrũo nĩ maũndũ maingĩ marĩa maaragĩrĩria, nĩ ndonire atĩ maũndũ mothe marĩa maarutanagwo mooimaga Bibilia-inĩ.

 Rĩrĩa Aira a Jehova maanjũririe kana no nyende kũrutwo Bibilia, nĩ ndetĩkĩrire. Rĩarĩ riita rĩakwa rĩa mbere kwĩruta ũhoro wĩgiĩ kĩĩranĩro kĩa Bibilia kĩgiĩ paradiso ĩrĩa ĩgoka thĩinĩ wa thĩ. (Isaia 35:5-8) Nĩ ndaataũkĩirũo atĩ nĩgetha ngenie Ngai, nĩ ndaabataraga gwĩka mogarũrũku manene ũtũũro-inĩ wakwa. Nĩ ndaataũkĩirũo atĩ Jehova Ngai ndangĩanjĩtĩkĩrire thĩinĩ wa thĩ yake njerũ ingĩathiire na mbere na mĩtugo ĩyo yakwa mĩũru. (1 Akorintho 6:9, 10) Nĩ ũndũ ũcio nĩ ndatuire itua rĩa kwĩgirĩrĩria marakara, gũtiga kũnyua thigara, na gũtiga biũ kũnyua njohi gũkĩria gĩthimi, na kũhũthĩra ndawa cia kũrebia.

 Mwaka-inĩ wa 1999, itanarĩkia kĩoho gĩakwa, nĩ ndathamĩirio njera ĩngĩ. Kwa ihinda rĩa makĩria ma mwaka ũmwe, tũtionanire na Aira a Jehova. No nĩ ndaatuĩte itua rĩa gũthiĩ na mbere gwĩka mogarũrũku. Mwaka-inĩ wa 2000, thirikari nĩ yanyimire rũtha rwa gũthiĩ na mbere gũikara Amerika (US), na ngĩcokio Tonga.

 Ndĩ kũu Tonga, nĩ ndacaririe Aira a Jehova na ngĩambĩrĩria kwĩruta Bibilia rĩngĩ. Nĩ ndendire maũndũ marĩa nderutaga, na nĩ ndakenire kuona atĩ Aira a Jehova kũu gĩcigĩrĩra-inĩ maahũthagĩra Maandĩko morutani-inĩ mao mothe o ta ũrĩa Aira a Jehova a Amerika meekaga.

 Baba nĩ ooĩkaine mũno itũũra-inĩ tondũ aarĩ na gaturũa kanene kanitha-inĩ yao. Nĩ ũndũ ũcio kĩambĩrĩria-inĩ famĩlĩ itũ nĩ yagegire na ĩkĩrakario nĩ itua rĩakwa rĩa kũnyitanĩra na Aira a Jehova. O na kũrĩ ũguo, thutha ũcio aciari akwa nĩ maakenire mona atĩ motaaro ma Bibilia nĩ maandeithagia kwagĩria ũtũũro wakwa.

 Ũndũ ũmwe wanditũhĩire mũno nĩ gũtiga kũnyua njohi ĩnyuagwo nĩ andũ aingĩ kũu. Athuri aingĩ a Tonga nĩ mahũthagĩra mathaa maingĩ o kiumia makĩnyua njohi ĩyo ĩtagwo kava, ĩrĩa ĩkoragwo ĩthondeketwo na mĩri ya mũtĩ wa biribiri. Ndĩ kũu bũrũri-inĩ witũ nĩ ndaambĩrĩirie mũtugo wa gũthiaga kĩrabu o hwaĩ-inĩ na kũnyua kava nginya ngerigwo. Thĩna ũmwe nĩ atĩ nĩ ndanyitanagĩra na arata mataaheete gĩtĩo ithimi cia Bibilia. Macũngĩrĩro-inĩ, nĩ ndateithirio kuona atĩ mĩtugo yakwa nĩ yarakaragia Ngai. Nĩ ndekire mogarũrũku nĩgetha ngĩe na irathimo cia Ngai na njĩtĩkĩrĩke nĩwe.

 Nĩ ndaambĩrĩirie gũthiĩ mĩcemanio yothe ya Aira a Jehova. Kũnyitanĩra hamwe na andũ merutanagĩria gũkenia Ngai nĩ kwandeithirie gũtooria magerio. Mwaka-inĩ wa 2002, nĩ ndabatithirio ngĩtuĩka Mũira wa Jehova.

 Nĩ ng’unĩkĩte kuumana na wetereri wa Ngai, ta ũrĩa Bibilia yugaga ũũ: “Jehova . . . akoragwo na wetereri kũmwerekera tondũ ndendaga mũndũ o na ũmwe akaaniinwo no endaga othe merire.” (2 Petero 3:9) Hatarĩ nganja nĩ angĩaniniire mũtabarĩre ũyũ mũũru tene, nĩ etĩkĩrĩtie ũthiĩ na mbere nĩgetha andũ ta niĩ makũrie ũrata hamwe nake. Nĩ ngenaga kũmenya atĩ no ahũthĩre gũteithia arĩa angĩ makũrie ũrata hamwe nake.

 Kũgerera ũteithio wa Jehova, nĩ ndahotire kũrũnga ũtũũro wakwa ũtige gũthiĩ ũthũkĩte makĩria. Rĩu ndiyaga andũ atĩ nĩguo hingie merirĩria mathũku. Handũ ha ũguo, ndĩrutanagĩria gũteithia arĩa angĩ o nao matuĩke arata a Jehova. Kũgerera kũnyitanĩra na Aira a Jehova, nĩ ndamenyanire na mũtumia wakwa nyendete wĩtagwo Tea. Niĩ na Tea na kahĩĩ gaitũ nĩ tũkenagĩra gũkorũo na ũtũũro mwega wa famĩlĩ. Tũrĩ hamwe nĩ tũrutaga arĩa angĩ ũrĩa Bibilia yugaga igũrũ rĩgiĩ kĩĩrĩgĩrĩro kĩa ihinda rĩrĩa rĩroka gĩa gũgaatũũra tene na tene thĩinĩ wa paradiso ĩrĩ na thayũ.