Ndaciarĩirũo taũni-inĩ ya Calgary gĩcigo-inĩ kĩa Alberta, bũrũri-inĩ wa Canada. Ndĩ o gakenge, aciari akwa nĩ maatiganire, na tũrĩ na mami tũgĩthaamĩra gwa cũcũ. Cũcũ na guka nĩ maatwendete mũno tũrĩ na mami, na ndarĩ na gĩkeno mũno ndĩ mwana. No ndirikanaga matukũ macio ma ũnyinyi wakwa marĩa maaiyũire thayũ na gĩkeno.

 Ndĩ na mĩaka mũgwanja, ũtũũro wakwa nĩ wacenjirie ũkĩritũha rĩrĩa mami maacokanirũo na baba na tũgĩthaamĩra St. Louis, Missouri, thĩinĩ wa Amerika (US). Thutha wa ihinda inini nĩ ndamenyire atĩ baba aarĩ mũndũ ũtarĩ tha. Kwa ngerekano, ndainũka mũthenya wa mbere kuuma cukuru ĩrĩa ndathaamĩire, baba nĩ aamenyire atĩ nĩ ndogitĩtwo no ngĩaga kũrũa. Aarakarire mũno na akĩhũũra o na gũkĩra ũrĩa ndahũũrĩtwo nĩ ciana ndĩ cukuru! Ngĩĩruta kuumana na ũndũ ũcio na ngĩambĩrĩria kũrũaga na ciana iria ingĩ ndĩ na mĩaka mũgwanja.

 Marakara ma baba nĩ maaiguithagia mami ũũru, na kaingĩ nĩ maanegenanagia mũno. Ndambĩrĩirie kũhũthĩra ndawa cia kũrebia na kũnyua njohi gũkĩria gĩthimi ndĩ na mĩaka 11. Ndathiire o na mbere kũgĩa na ũhinya na kaingĩ nĩ ndarũaga na andũ njĩra-inĩ. Ngĩrĩkia cukuru ya sekondarĩ, nĩ ndahũthagĩra ũhinya mũno.

 Ndĩ na mĩaka 18, nĩ ndaingĩrire njeshi-inĩ ya Amerika (US). Ndĩ kũu nĩ ndamenyeririo na njĩra yatũmire ũhinya wakwa wongerereke. Thutha wa mĩaka ĩtano, nĩ ndoimire njeshi-inĩ nĩguo thomere psychology ndĩ na mwĩhoko wa kuona wĩra thĩinĩ wa Rũhonge rwa Gũtuĩria Wĩki-naĩ (FBI). Ndambĩrĩirie mathomo makwa ma yunivasĩtĩ thĩinĩ wa Amerika (US) na ngĩthiĩ na mbere namo bũrũri-inĩ wa Canada thutha wa gũcoka kuo.

 Ndĩ yunivasĩtĩ, nĩ ndaiguire njũragĩtwo ngoro mũno nĩ andũ. Ndonaga andũ maiyũire mwĩyendo, gũtirĩ ũndũ ndonaga ũrĩ wa bata thĩinĩ wa thĩ, na ndionaga mathĩna ma thĩ marĩ na kĩhonia. Ngĩaga mwĩhoko biũ atĩ andũ no mahote gũthondeka thĩ ĩtuĩke kũndũ kwega gwa gũtũũrũo.

 Tondũ ndionaga ũtũũro ũrĩ na muoroto, ngĩambĩrĩria kũnyua njohi gũkĩria gĩthimi, kũhũthĩra ndawa cia kũrebia na gũcaria mbeca na njĩra ya ũkoroku na kwĩingĩria maũndũ-inĩ ma ngomanio. Ndathingataga ikeno, na atumia. Nĩ ũndũ wa ũrĩa ndamenyeretio ndĩ njeshi-inĩ, ndaiguaga ndĩ na ũrũme wa kũrũa. Ndeciragia atĩ no hote gũtua ũndũ ũrĩa mwega na ũrĩa mũũru, kwoguo nĩ ndokagĩrĩra mũndũ o wothe ndonaga ta areka andũ arĩa angĩ maũndũ matarĩ ma kĩhooto. No ma nĩ atĩ, nĩ ndatuĩkĩte ngombo ya maũndũ ma ũhinya.

 Mũthenya ũmwe tũrĩ na mũrata ũmwe wakwa gwakwa mũciĩ thutha wa kũnyua ndawa cia kũrebia, twabangaga bangi nĩguo tũmĩendie na njĩra ĩtetĩkĩrĩtio nĩ watho, rĩrĩa mũrata ũcio aanjũririe kana nĩ njĩtĩkĩtie Ngai. Ndamwĩrire ũũ, “Angĩkorũo Ngai nĩwe ũtũmaga thĩ ĩkorũo na mathĩna, ndingĩenda kũmũmenya!” Mũthenya ũrĩa warũmĩrĩire, ũrĩa warĩ wakwa wa mbere wĩra-inĩ mwerũ, mũndũ ũmwe twarutaga wĩra nake warĩ Mũira wa Jehova akĩnjũria, “Hihi nĩ ũkuona ta arĩ Ngai ũtũmaga thĩ ĩkorũo na mathĩna?” Kĩũria kĩu nĩ kĩamakirie nĩ ũndũ wa ũrĩa ndoigĩte mũthenya ũmwe mbere ĩyo na ngĩenda kũmenya makĩria. Kwa ihinda rĩa mĩeri ĩtandatũ ĩrĩa yarũmĩrĩire, nĩ twagĩire na ndeereti nyingĩ, na akĩnyonia kuuma Bibilia-inĩ macokio ma ciũria imwe nditũ iria ndarĩ nacio ciĩgiĩ ũtũũro.

 Mũirĩtu ũrĩa twarĩ ndũgũ na twaikaranagia nake ihinda-inĩ rĩu ndangĩendire ndĩmwĩre maũndũ marĩa nderutaga. Mũthenya ũmwe wa Kiumia, nĩ ndamwĩrire atĩ nĩ ndanyitĩte Aira a Jehova ũgeni gwitũ mũciĩ moke twĩrute Bibilia nao. Mũthenya ũrĩa warũmĩrĩire, ndainũka kuuma wĩra-inĩ ndakorire akuuĩte indo ciothe cia nyũmba na agathiĩ akandiga. Ndoimire nja ngĩrĩra. Ningĩ nĩ ndahoire Ngai, ngĩmũthaitha andeithie. Rĩu nĩrĩo rĩarĩ riita rĩakwa rĩa mbere kũhũthĩra rĩĩtwa rĩa Ngai, Jehova, ngĩhoya.—Thaburi 83:18.

 Thutha wa thikũ igĩrĩ, nĩ ndambĩrĩirie kwĩruta Bibilia na mũthuri ũmwe na mũtumia wake, arĩa maarĩ Aira a Jehova. Mathiĩ, nĩ ndathiire na mbere gũthoma ibuku rĩu rĩa Unaweza Kuishi Milele Katika Paradiso Duniani, na ngĩrĩkia kũrĩthoma ũtukũ o ũcio. a Maũndũ marĩa nderutire megiĩ Jehova Ngai na Mũrũ wake, Jesu Kristo, nĩ maahutirie ngoro. Nĩ ndamenyire atĩ Jehova nĩ arĩ tha na atĩ nĩ aiguaga ũũru rĩrĩa tũrathĩnĩka. (Isaia 63:9) Ndahutirio makĩria nĩ wendo ũrĩa Ngai akoragwo naguo kũnjerekera na igongona rĩrĩa Mũrũ wake aarutire nĩ ũndũ wakwa. (1 Johana 4:10) Ũndũ ũcio watũmire menye atĩ Jehova aarĩ na wetereri kũnjerekera “tondũ ndendaga mũndũ o na ũmwe akaaniinwo no endaga othe merire.” (2 Petero 3:9) Nĩ ndaiguaga atĩ Jehova nĩ aangucagĩrĩria harĩ we.—Johana 6:44.

 Ndambĩrĩirie gũthiĩ mĩcemanio ya kĩũngano kiumia o kĩu. Ndarĩ na njuĩrĩ ndaihu, mindira, na ndarĩ mũndũ ũngĩĩtigĩrũo, no Aira a Jehova maanyitire ũgeni ta ndarĩ mũndũ wao wa famĩlĩ mateerĩgĩte kuona. Meekire ta Akristiano a ma. Ndaiguire ta ndacoka mũciĩ gwa cũcũ, no rĩu gũgakorũo kũrĩ kwega makĩria.

 Thutha wa ihinda inini, maũndũ marĩa nderutaga kuuma Bibilia-inĩ makĩambĩrĩria kũgarũra ũtũũro wakwa. Ngĩenja njuĩrĩ, ngĩtigana na ngomanio itagĩrĩire, na ngĩtiga kũhũthĩra ndawa cia kũrebia na kũnyua njohi gũkĩria gĩthimi. (1 Akorintho 6:9, 10; 11:14) Nĩ ndendaga gũkenia Jehova. Kwoguo ingĩamenyire atĩ Jehova nĩ athũire ũndũ mũna ndekaga, ndietetagĩra. Handũ ha ũguo, ndaiguaga ndathecwo ngoro. Ndeĩraga ũũ, ‘Ndingĩthiĩ na mbere na mũtugo ũyũ.’ Na ngacenjia mwĩcirĩrie wakwa na ciĩko ciakwa itekũhũthĩrĩria. Nĩ ũndũ ũcio, thutha wa ihinda inini nĩ ndambĩrĩirie kuona ũguni wa gwĩka maũndũ na njĩra ya Jehova. Kũrĩ Julaĩ 29, 1989, mĩeri ĩtandatũ thutha wakwa kwambĩrĩria kwĩruta Bibilia, nĩ ndabatithirio ngĩtuĩka Mũira wa Jehova.

 Bibilia nĩ ĩndeithĩtie kũgarũrĩra ũmũndũ wakwa. Hau kabere mũndũ angĩanjogothire, kaingĩ ndamũũkagĩrĩra na ũhinya. No rĩu ndĩrutanagĩria gũkorũo “na thayũ hamwe na andũ othe.” (Aroma 12:18) Ndihotete gwĩka ũguo na hinya wakwa, no njokagĩria Jehova ngatho nĩ ũndũ wa ũhoti wa kũgarũra wa Kiugo gĩake na roho wake mũtheru.—Agalatia 5:22, 23; Ahibirania 4:12.

 Handũ ha gũtuĩka ngombo ya ndawa cia kũrebia, maũndũ ma ũhinya, na merirĩria moru, rĩu ndĩrutanagĩria gũkenia Jehova Ngai na kwĩrutĩra biũ harĩ we. Ũguo nĩ hamwe na gũteithia andũ angĩ mamũmenye. Mĩaka mĩnini thutha wa kũbatithio, nĩ ndathamĩire bũrũri-inĩ ũngĩ nĩguo ndeithĩrĩrie wĩra wa kũhunjia icigo-inĩ iria irĩ na bata mũnene wa ahunjia. Kwa ihinda rĩa mĩaka mĩingĩ, nĩ ngĩte na gĩkeno gĩa kũruta andũ aingĩ na gĩa kuona ũrĩa Bibilia yagĩrĩtie ũtũũro wao o nao. Ningĩ nĩ ngenaga tondũ mami nĩ aatuĩkire Mũira wa Jehova, na ũndũ ũmwe wamũtindĩkire nĩ kuona mogarũrũku mega marĩa ndekire harĩ mwerekera na mĩthiĩre yakwa.

 Mwaka-inĩ wa 1999, ndĩ bũrũri-inĩ wa El Salvador, nĩ ndarĩkirie cukuru ĩrĩa rĩu ĩtagwo Cukuru ya Ahunjia a Ũthamaki. Cukuru ĩyo nĩ yamenyeririe na ĩkĩnduta ũrĩa ingĩhota kũruta wĩra wa kũhunjia na kĩyo na ũrĩa ingĩhota kũrĩithia na kũrutana kĩũngano-inĩ. Thutha-inĩ mwaka-inĩ o ũcio, nĩ ndahikirie mũtumia wakwa nyendete, Eugenia. Tũrĩ hamwe tũtungataga tũrĩ ahunjia a mahinda mothe bũrũri-inĩ wa Guatemala.

 Rĩu, handũ ha kũigua nguĩte ngoro nĩ ũtũũro, ngoragwo na gĩkeno kĩnene. Kũrũmĩrĩra morutani ma Bibilia nĩ kũndutĩte ũkombo-inĩ wa ngomanio itagĩrĩire na maũndũ ma ũhinya na gũkandeithia kũgĩa na ũtũũro ũiyũire wendo wa ma na thayũ..