O mwaka, anake na airĩtu ethĩ mahũthagĩra hinya na mahinda mao thĩinĩ wa wabici ya rũhonge ya Aira a Jehova ya Amerika (US), kũhũũra hakuhĩ tani 1,800 cia nguo, wĩra ũrĩa ũrutagĩrũo mĩciĩ-inĩ itatũ ĩrĩa ĩrĩ Brooklyn, Patterson, na Wallkill ĩrĩa ĩrĩ New York. Mũigana ũcio wiki tu nĩ wa kũgegania. Kĩrĩa gĩtũmaga wĩra ũcio ũkorũo ũrĩ wa mwanya mũno, nĩ mĩthemba mĩingĩ ya nguo iria irutagĩrũo wĩra.

O mũthenya wa wĩra andũ arĩa maikaraga nyũmba icio cia Betheli, nĩ matwaraga nguo makĩria ma 11,000 kũrĩa ihũũragĩrũo.— shati 2,300, na mĩbuuto 650, o hamwe na thogithi, nguo cia thĩinĩ, na tishati. Makĩria ma ũguo nĩ matwaraga nguo ingĩ 900 iria itahũũragwo na maĩ.

Ningĩ no gũtwaragwo indo na nguo ingĩ cia mĩthemba mĩingĩ mũno, hamwe na macuka, taurũ, mĩrĩngĩti, aburoni iria ciĩkĩragwo nĩ andũ a riiko, na indo iria ihũthagĩrũo gũthambia thĩ. Indo icio ciothe nĩ ibataraga gũthaambio, kũũmithio, gũcokerio ene kana harĩa hangĩ ciagĩrĩire. Indo ta tũtaurũ twa kũhuura tũhũũragwo tũrĩ hamwe, no buraũthi na tai iria hũthũ ihũũragwo irĩ ĩmwe ĩmwe.

Arĩa marutaga wĩra ũcio wa nguo, nĩ maroraga ciothe kana kũrĩ itarũkĩte kana ikoima ibungo. Angĩkorũo nĩ harĩ irabatara gũcokio ibungo nĩ harĩ macini ĩrutaga wĩra ũcio, kana igacokio na moko. Angĩkorũo nĩ harĩ ĩrabatara gũtumwo, kana gwĩkwo ũndũ ũngĩ, nĩ harĩ andũ marĩ na ũmenyeru marutaga wĩra ũcio.

Nĩguo mahote kũmenya makiri ma nguo iria irarutĩrwo wĩra, nĩ harĩ macini ĩciĩkagĩra namba. Namba icio nĩ ihotithagia macini gũthurania nguo nĩguo ithambio, ihũrũo bathi, na icokerio ene arĩa makoragwo marĩ thĩinĩ wa famĩlĩ ĩyo ya Betheli ya Amerika (US).

Aruti wĩra eerũ nĩ mamenyeragio nĩ arĩa marĩ na ũmenyeru mũingĩ. Mũndũ ũramenyerio no onio kũruta mawĩra matiganĩte ta 20. Wĩra ũmwe wonekaga ta wĩ mũhũthũ no nĩ woyaga ihinda kũũmenya nĩ kũruta maroro nguo-inĩ. Andũ arĩa maramenyerio no nginya magĩe na ũmenyo mũrikĩru wĩgiĩ ndigi iria ithondekete nguo na mamenye nĩ indo irĩkũ ingĩhũthĩrũo kũmĩhũũra na ũrĩa yagĩrĩire kũhũũrũo.

Tajh ũrĩa ũrutĩte wĩra ũcio wa nguo mwaka ũmwe na nuthu oigaga ũũ igũrũ rĩgiĩ andũ arĩa marutithanagia wĩra: “Ũrata witũ nĩ mwega mũno, na kũrutithania wĩra na andũ a mĩrerere ngũrani nĩ ũndũ ũrĩ gĩkeno mũno.” Shelly mũruti wĩra ũngĩ oigaga ũũ: “Nĩ gĩtĩo kĩnene tũrĩ nakĩo harĩ gũteithĩrĩria famĩlĩ itũ ya Betheli yoneke ĩrĩ ya mwanya.”