Agalatia 2:1-21
2 Na rĩrĩ, thutha wa mĩaka ikũmi na ĩna ngĩambata Jerusalemu o rĩngĩ tũrĩ hamwe na Baranaba, na Tito.
2 Ndaambatire thutha wa kũguũrĩrio njĩke ũguo, na ngĩmamenyithia ũhoro ũrĩa mwega hunjagia kũrĩ andũ a ndũrĩrĩ. O na kũrĩ ũguo, ndekire ũguo o kũrĩ athuri arĩa maahetwo gĩtĩo mũno, nĩguo ndigĩrĩre atĩ ũtungata ũrĩa ndaatungataga kana ũrĩa ndaatungatĩte ndwarĩ wa tũhũ.
3 No rĩrĩ, o na Tito ũrĩa twarĩ nake gũtirĩ mũndũ wamũhatĩrĩirie arue, o na gũtuĩka aarĩ Mũngiriki.
4 No ũndũ ũcio woimĩrire tondũ wa ariũ a Ithe witũ a maheeni arĩa maatonyire kĩũngano-inĩ na njĩra ya wara nĩguo mathigane ũhoro wĩgiĩ wĩyathi ũrĩa tũkoragwo naguo tũrĩ arutwo a Kristo Jesu, nĩ getha matũtue ngombo biũ;
5 no tũtietĩkĩrire ũhoro ũcio wao o na hanini, nĩ getha mũthiĩ na mbere gũtũũria ma ya ũhoro ũrĩa mwega.
6 Ĩndĩ ũhoro-inĩ wĩgiĩ arĩa moonagwo marĩ a bata—o ũrĩa mangĩkorũo maatariĩ gũtirĩ ũndũ kuugĩte harĩ niĩ, nĩ gũkorũo Ngai ndaroraga ũrĩa mũndũ atariĩ na nja—andũ acio moonagwo marĩ a bata mũno gũtirĩ ũndũ mwerũ maaheire.
7 Mũgarũ na ũguo, rĩrĩa moonire atĩ nĩ ndeehokeirũo wĩra wa kũhunjia ũhoro ũrĩa mwega kũrĩ andũ arĩa matarĩ aruu, o ta ũrĩa Petero eehokeirũo kũhunjĩria arĩa aruu—
8 nĩ gũkorũo ũrĩa wahotithirie Petero gũkorũo arĩ mũtũmwo kũrĩ andũ arĩa aruu nowe wahotithirie o na niĩ gũkorũo ndĩ mũtũmwo kũrĩ andũ a ndũrĩrĩ—
9 ningĩ rĩrĩa maamenyire ũhoro wĩgiĩ ũtugi mũnene ũrĩa ndaahetwo-rĩ, Jakubu na Kefa* na Johana, arĩa mooĩkaine marĩ itugĩ, magĩtũtambũrũkĩria guoko kwa ũrĩo tũrĩ na Baranaba, kuonania atĩ nĩ meetĩkĩrĩte tũthiĩ kũrĩ andũ a ndũrĩrĩ nao mathiĩ kũrĩ andũ arĩa aruu.
10 No magĩtwĩra tũtikanariganĩrũo nĩ arĩa athĩni, na ũndũ ũcio o naguo nĩ ndĩrutanĩirie mũno kũwĩka.
11 O na kũrĩ ũguo, rĩrĩa Kefa* okire Antiokia, nĩ ndaamũkararirie ĩmwe kwa ĩmwe, tondũ hatarĩ nganja nĩ aahĩtĩtie.
12 Nĩ gũkorũo andũ amwe arĩa maanyitanagĩra na Jakubu matanoka, nĩ aarĩanagĩra na andũ a ndũrĩrĩ; no rĩrĩa maakinyire, agĩtiga gwĩkaga ũguo na akĩĩyamũrania nao nĩ ũndũ wa gwĩtigĩra arĩa maarĩ aruu.
13 Nao Ayahudi arĩa angĩ makĩnyitanĩra nake ũhinga-inĩ ũcio wake, o nginya Baranaba nake akĩgucĩrĩrio ũhinga-inĩ ũcio wao.
14 No rĩrĩa ndonire atĩ matiratwarana na ma ya ũhoro ũrĩa mwega, ngĩra Kefa* andũ acio othe marĩ ho ũũ: “Angĩkorũo wee, o na ũrĩ Mũyahudi ũraikara ta andũ a ndũrĩrĩ na ti ta ũrĩa Ayahudi maikaraga-rĩ, ũngĩkĩhatĩrĩria atĩa andũ a ndũrĩrĩ maikarage ta Ayahudi?”
15 Ithuĩ tũrĩ Ayahudi, tũtihaana andũ a ndũrĩrĩ arĩa mehagia.
16 Nĩ tũmenyaga atĩ mũndũ atuagwo mũthingu, ti tondũ wa kũrũmĩrĩra watho, no nĩ ũndũ tu wa gwĩtĩkia Jesu Kristo. Nĩ ũndũ ũcio ithuĩ nĩ twĩtĩkĩtie Kristo Jesu, nĩguo tũtuwo athingu nĩ ũndũ wa gwĩtĩkia Kristo no ti tondũ wa kũrũmĩrĩra watho, nĩ gũkorũo gũtirĩ mũndũ o na ũmwe ũgaatuwo mũthingu nĩ ũndũ wa kũrũmĩrĩra watho.
17 Angĩkorũo o na ithuĩ tuonagwo tũrĩ ehia tondũ nĩ tũcaragia gũtuo athingu kũgerera Kristo-rĩ, hihi ũguo nĩ kuuga atĩ Kristo nĩ ndungata ya mehia? Tiguo o na hanini!
18 Angĩkorũo maũndũ o marĩa ndaamomorire no mo ndĩraka rĩngĩ-rĩ, ũndũ ũcio ũronania atĩ ndĩ muni-watho.
19 Nĩ gũkorũo ũhoro-inĩ wĩgiĩ watho nĩ ndaakuire kũgerera watho, nĩ getha ndũũre muoyo nĩ ũndũ wa Ngai.
20 Ndĩ mũhũũrĩrĩre mĩcumarĩ mũtĩ igũrũ hamwe na Kristo. Ti niĩ rĩu ndũũraga muoyo, no nĩ Kristo ũtũũraga muoyo arĩ na ũiguano hamwe na niĩ. Hatarĩ nganja, ũtũũro ũrĩa ndũũraga rĩu ũhoro-inĩ wa mwĩrĩ ndũũraga nĩ ũndũ wa gwĩtĩkia Mũrũ wa Ngai, o we wanyendire na akĩĩneana we mwene nĩ ũndũ wakwa.
21 Ti kũrega ndĩrarega ũtugi mũnene wa Ngai, tondũ angĩkorũo mũndũ atuagwo mũthingu kũgerera watho-rĩ, gũkua gwa Kristo gwakĩrĩ gwa tũhũ.
