Ahibirania 3:1-19
3 Gũkĩrĩ ũguo ariũ a Ithe witũ aamũre-rĩ, o inyuĩ mwĩtĩtwo nĩguo mũthiĩ igũrũ, mwĩciragiei mũno ũhoro wa mũtũmwo na mũthĩnjĩri-Ngai ũrĩa mũnene o ũcio tumbũraga, na nĩwe Jesu.
2 Aarĩ mwĩhokeku harĩ Ũrĩa wamũthuurire, o ta ũrĩa Musa o nake aarĩ mwĩhokeku thĩinĩ wa nyũmba ya Ngai yothe.
3 Nĩ ũndũ we nĩ onagwo arĩ na riri gũkĩra Musa, tondũ ũrĩa wakaga nyũmba nĩ aheagwo gĩtĩo gũkĩra nyũmba yo nyene.
4 Ma nĩ atĩ, nyũmba o yothe nĩ ĩrĩ ũrĩa wamĩakire, no ũrĩa wombire indo ciothe nĩ Ngai.
5 Na rĩrĩ, Musa aarĩ mwĩhokeku arĩ ndungata thĩinĩ wa nyũmba yothe ya Ngai, na ũndũ ũcio ũgĩtuĩka ũira wa maũndũ marĩa mangĩkaario ũhoro wamo thutha-inĩ,
6 no Kristo arĩ mũrũ wa Ngai aarĩ mwĩhokeku igũrũ rĩa nyũmba ya ithe. Hatarĩ nganja, ithuĩ tũrĩ nyũmba Yake tũngĩtũũra tũrũmĩtie nginya mũthia wĩyathi witũ wa kwaria hamwe na kĩĩrĩgĩrĩro kĩrĩa twĩrahagĩra.
7 Nĩ ũndũ ũcio, o ta ũrĩa kwoigirũo kũgerera roho mũtheru atĩrĩ, “Ũmũthĩ mũngĩigua mũgambo wake,
8 mũtikomie ngoro cianyu ta ũrĩa maithe manyu ma tene meekire makĩndakaria mũno, ta mũthenya ũrĩa maangeririe marĩ werũ-inĩ,
9 rĩrĩa maithe manyu ma tene maangeririe, o na gũtuĩka nĩ meeyoneire mawĩko makwa mĩaka mĩrongo ĩna.
10 Nĩkĩo ndaarakaririo nĩ rũciaro rũu na ngiuga: ‘Ngoro ciao ikoragwo irĩ hong’oku hĩndĩ ciothe, na matirĩ maamenya njĩra ciakwa.’
11 Kwoguo ngĩĩhĩta ndĩ na marakara ngiuga: ‘Matigaatonya kĩhurũko-inĩ gĩakwa.’”
12 Mwĩmenyagĩrĩrei, ariũ a Ithe witũ, nĩguo mũndũ o na ũmwe thĩinĩ wanyu ndakaanagĩe na ngoro njũru ĩtarĩ wĩtĩkio na njĩra ya kwĩyeheria kuuma harĩ Ngai ũrĩa ũtũũraga muoyo;
13 ĩndĩ ũmanagĩrĩriai o mũndũ na ũrĩa ũngĩ o mũthenya, hĩndĩ ĩrĩa yothe kũngĩtwo “Ũmũthĩ,” nĩguo mũndũ o na ũmwe wanyu ndakanomio ngoro nĩ hinya wa maheeni wa mehia.
14 Nĩ gũkorũo nĩguo tũgĩe na igai harĩ Kristo no mũhaka tũtũũre tũrũmĩtie mwĩhoko ũrĩa twagĩire naguo kuuma o kĩambĩrĩria nginya mũthia.
15 Ta ũrĩa kwĩrĩtwo atĩ, “Ũmũthĩ mũngĩigua mũgambo wake, mũtikomie ngoro cianyu ta ũrĩa maithe manyu ma tene meekire makĩndakaria mũno.”
16 Nĩ ũndũ-rĩ, nĩ a maaiguire no makĩmũrakaria mũno? Githĩ kũna ti arĩa othe mooimire Misiri matongoretio nĩ Musa?
17 Makĩria ma ũguo-rĩ, nĩ a Ngai aarakaririo nĩo ihinda rĩa mĩaka mĩrongo ĩna? Githĩ ti arĩa meehirie, o acio maakuĩrĩire werũ-inĩ?
18 Ningĩ-rĩ, nĩ a eehĩtire ũhoro wao akiuga matigaatonya kĩhurũko-inĩ gĩake? Githĩ ti acio maamũremeire?
19 Kwoguo-rĩ, maagire gũtonya nĩ ũndũ wa kwaga wĩtĩkio.
