Akolosai 2:1-23
2 Nĩ gũkorũo ndĩrenda mũmenye ũrĩa ngiĩkaga mũno nĩ ũndũ wanyu na nĩ ũndũ wa arĩa marĩ Laodikia o na nĩ ũndũ wa arĩa othe matarĩ manyona.
2 Njĩkaga ũguo nĩ getha ngoro ciao ciũmĩrĩrio na nĩguo manyitithanio wega thĩinĩ wa wendo na magĩe na ũtonga wothe ũrĩa umanaga na gũkorũo na ũtaũku mũrũmu, nĩguo magĩe na ũmenyo wa ma wĩgiĩ hitho ya Ngai, na nĩyo Kristo.
3 Mĩthithũ yothe ya ũũgĩ na ũmenyo ĩkoragwo ĩhithĩtwo thĩinĩ wake.
4 Ndĩroiga ũguo nĩ getha mũndũ o na ũrĩkũ ndakanamũheenie na ciugo cia wara.
5 O na gũtuĩka ndirĩ hamwe na inyuĩ, ndĩ hamwe na inyuĩ thĩinĩ wa roho, ngĩkenaga nĩ kuona mĩbango yanyu mĩega na ũrĩa wĩtĩkio wanyu ũrũmĩte thĩinĩ wa Kristo.
6 Nĩ ũndũ ũcio-rĩ, o ta ũrĩa mwĩtĩkĩrĩte Kristo Jesu Mwathani, thiĩi na mbere gũtwarana mũrĩ na ũiguano nake,
7 mũkĩgĩaga na mĩri na mũkeyaka thĩinĩ wake na mũkarũma wĩtĩkio-inĩ, o ta ũrĩa mwarutirũo, mũiyũrĩrĩirũo nĩ wĩtĩkio rĩrĩa mũgũcokia ngatho.
8 Mwĩmenyererei mũndũ o na ũrĩkũ ndakanamũtahe kũgerera ũũgĩ wa andũ na maheeni ma tũhũ kũringana na irĩra cia andũ, na kũringana na maũndũ ma mũthingi ma thĩ ĩno no ti kũringana na Kristo;
9 nĩ gũkorũo ũiyũru wothe wa ngumo cia Ngai ũtũũraga thĩinĩ wake.
10 Kwoguo nĩ mũgĩte na ũiyũru kũgerera harĩ we, o ũcio mũtwe wa thirikari ciothe na wathani.
11 Kũgerera ũiguano wanyu nake-rĩ, ningĩ nĩ mwaruithirio irua rĩrĩa rĩtaruithanagio na moko, na njĩra ya kweheria mĩerekera ya mwĩrĩ ya mehia, kũrua kũrĩa gwa Kristo.
12 Nĩ gũkorũo mwathikirũo hamwe nake ũbatithio-inĩ wake, na nĩ ũndũ wa ũiguano wanyu nake ningĩ nĩ mwariũkanĩirio hamwe kũgerera wĩtĩkio wanyu harĩ gĩĩko kĩa Ngai kĩa hinya, o ũcio wamũriũkirie kuuma kũrĩ arĩa akuũ.
13 Makĩria ma ũguo, o na gũtuĩka mwarĩ akuũ nĩ ũndũ wa mehia manyu rĩrĩa mũtaarĩ aruu mĩĩrĩ yanyu, Ngai nĩ aamũcokirie muoyo hamwe na Kristo. Agĩtuohera mehia maitũ mothe nĩ ũndũ wa ũtugi wake
14 na akĩhuura Watho ũrĩa waandĩkĩtwo na guoko, ũrĩa warĩ na mawatho ma kũguũria mehia maitũ. Aaweheririe na njĩra ya kũũhũrĩrĩra mũtĩ-inĩ wa kũnyarirĩrũo.*
15 Kũgerera mũtĩ wa kũnyarirĩrũo nĩ atooretie thirikari na wathani na akonia andũ othe atĩ nĩ acihootete, agacitongoria na mbugĩrĩrio ya ũhootani.
16 Nĩ ũndũ ũcio, mũtikanareke mũndũ o na ũrĩkũ amũtuĩre nĩ ũndũ wa kĩrĩa mũrĩaga kana kĩrĩa mũnyuaga o na kana gũkũngũĩra gĩathĩ kana karũgamo ka mweri kana thabatũ.
17 Maũndũ macio nĩ kĩĩruru kĩa maũndũ marĩa magooka, no mwĩrĩ nĩ Kristo.
18 Mũtikanareke mũtunywo kĩheo nĩ mũndũ ũkenagĩra wĩnyihia wa maheeni na ũthathaiya wa araika, “ehandĩte igũrũ rĩa” maũndũ marĩa onete. Mũndũ ũcio nĩ kwĩyambararia eyambararĩtie hatarĩ gĩtũmi kĩega nĩ ũndũ wa mwĩcirĩrie wake wa mehia,
19 na ndarũmagĩrĩra mũtwe ũrĩa wa ma, o we ũheaga mwĩrĩ kĩrĩa ũrabatara na akaũnyitithania wothe kũgerera marũngo na nga, agatũma ũkũre na gũkũra kũrĩa kuumaga kũrĩ Ngai.
20 Angĩkorũo nĩ mwakuire hamwe na Kristo ũhoro-inĩ wĩgiĩ maũndũ ma mũthingi ma thĩ ĩno-rĩ, nĩ kĩĩ kĩragĩtũma mũtũũre o ta mũrĩ a thĩ ĩno na njĩra ya gũthiĩ na mbere kũrũmĩrĩra mawatho maya:
21 “Ndũkoe, kana ũcame, kana ũhutie,”
22 ũhoro-inĩ wĩgiĩ indo iria arĩ o mũhaka ithire thutha wa kũhũthĩrũo, na macio nĩ maathani na morutani ma andũ?
23 O na gũtuĩka maũndũ macio nĩ monekaga ta marĩ na ũũgĩ ũthathaiya-inĩ wa kwĩhandĩra na wĩnyihia wa maheeni, na kũnyarira mwĩrĩ-rĩ, matirĩ ũteithio o na ũrĩkũ harĩ gũtooria merirĩria ma mwĩrĩ.
Tũũhoro twa magũrũ-inĩ
^ Rora Ũthathaũri wa Ciugo.
