Akolosai 3:1-25
3 No rĩrĩ, angĩkorũo nĩ mwacokirio muoyo hamwe na Kristo-rĩ, thiĩi na mbere gũcaria maũndũ ma igũrũ, kũrĩa Kristo aikarĩte guoko-inĩ kwa ũrĩo kwa Ngai.
2 Igagai meciria manyu harĩ maũndũ ma igũrũ, no ti harĩ maũndũ ma gũkũ thĩ.
3 Nĩ gũkorũo nĩ mwakuire, na ũtũũro wanyu ũhithĩtwo harĩ Kristo kũringana na wendi wa Ngai.
4 Hĩndĩ ĩrĩa Kristo, o we ũtũũro witũ akaaguũrio-rĩ, o na inyuĩ nĩ mũkaaguũrio hamwe nake mũrĩ na riri.
5 Nĩ ũndũ ũcio-rĩ, ũragai ciĩga cianyu iria irĩ gũkũ thĩ ũhoro-inĩ wĩgiĩ ngomanio itagĩrĩire,* maũndũ matarĩ matheru, merirĩria moru ma ngomanio, merirĩria mathũku, na ũkoroku, nĩguo ũhoi mĩhianano.
6 Nĩ ũndũ wa maũndũ macio, marakara ma Ngai nĩ maroka.
7 Maũndũ macio nĩmo o na inyuĩ mwekaga mũtũũrĩre-inĩ wanyu wa hau kabere.
8 No rĩu no mũhaka mweherie maũndũ maya mothe harĩ inyuĩ: mang’ũrĩka, marakara, ũũru, irumi, na mĩario ya rũtũrĩko kuuma tũnua-inĩ twanyu.
9 Mũtikaheenanagie. Mwĩyaũrei ũmũndũ ũrĩa wa tene o hamwe na mĩtugo yaguo,
10 na mwĩhumbe ũmũndũ mwerũ, ũrĩa ũratuo mwerũ kũgerera ũmenyo wa ma kũringana na mũhianĩre wa Ũrĩa waũmbire,
11 na ũhoro-inĩ ũcio gũtirĩ Mũngiriki kana Mũyahudi, mũndũ mũruu kana ũtarĩ mũruu, mũndũ wa kũngĩ, Mũsikuthi, ngombo, kana mũndũ ũtarĩ ngombo; ĩndĩ Kristo nĩwe maũndũ mothe harĩ andũ othe.
12 Nĩ ũndũ ũcio, tondũ mũrĩ andũ mathuurĩtwo nĩ Ngai, aamũre na makendwo-rĩ, mwĩhumbei ũhoro wa kũiguanĩra tha, ũcayanĩri, ũtugi, wĩnyihia, ũhooreri, na ũkirĩrĩria.
13 Thiĩi na mbere gũkiranagĩrĩria mũndũ na ũrĩa ũngĩ na kuohanagĩra mwĩyendeire o na angĩkorũo nĩ harĩ mũndũ ũhĩtĩirio nĩ ũrĩa ũngĩ. O ta ũrĩa Jehova* aamuoheire inyuĩ eyendeire, no mũhaka mwĩkage o ũguo.
14 No makĩria ma maũndũ macio mothe-rĩ, mwĩhumbei wendo, nĩ gũkorũo wohithanagia andũ na njĩra nginyanĩru.
15 Ningĩ-rĩ, rekei thayũ wa Kristo wathage ngoro cianyu, tondũ mwetirũo harĩ thayũ ũcio thĩinĩ wa mwĩrĩ ũmwe. Na mũkonanagia atĩ mũrĩ na ngatho.
16 Rekei kiugo gĩa Kristo gĩikarage thĩinĩ wanyu na njĩra nene nĩguo mũgĩe na ũũgĩ wothe. Thiĩi na mbere kũrutana na gwĩkĩrana hinya na thaburi, mũkĩgoocaga Ngai, na nyĩmbo cia kĩĩroho iria ciinagwo na ngatho, mũkĩinagĩra Jehova* ngoro-inĩ cianyu.
17 Ũndũ o wothe ũrĩa mũgwĩka kana mũkwaria, ĩkagai maũndũ mothe thĩinĩ wa rĩĩtwa rĩa Mwathani Jesu, mũgĩcokagĩria Ngai o we Ithe witũ ngatho kũgerera harĩ we.
18 Inyuĩ atumia-rĩ, athĩkagĩrai athuri anyu, nĩ gũkorũo ũndũ ũcio nĩ mwagĩrĩru harĩ Mwathani.
19 Inyuĩ athuri-rĩ, endagai atumia anyu na mũtikamarakaragĩre mũrĩ na marũrũ.
20 Inyuĩ ciana, athĩkagĩrai aciari anyu maũndũ-inĩ mothe, nĩ gũkorũo ũndũ ũcio nĩ ũkenagia Mwathani.
21 Inyuĩ maithe, mũtikarakaragie ciana cianyu, nĩguo itigakue ngoro.
22 Inyuĩ ngombo, athĩkagĩrai athani anyu a gũkũ thĩ maũndũ-inĩ mothe, to hĩndĩ ĩrĩa maramũrora no getha mũkenie andũ, ĩndĩ mũtarĩ na ũhinga ngoro-inĩ, mũgĩĩtigagĩra Jehova.*
23 Ũndũ o wothe ũrĩa mũgwĩka, wĩkagei na ngoro yothe ta arĩ Jehova* mũrekĩra no ti andũ,
24 nĩ gũkorũo nĩ mũĩ atĩ nĩ kuuma kũrĩ Jehova* mũkaamũkĩra igai, rĩrĩ kĩheo. Tungatagĩrai Mwathi wanyu, nĩwe Kristo.
25 Hatarĩ nganja, ũrĩa wĩkaga maũndũ moru nĩ akaarĩhwo nĩ ũndũ wa maũru marĩa ekĩte, na gũtirĩ mũthutũkanio.
Tũũhoro twa magũrũ-inĩ
^ Kĩngiriki, por·neiʹa. Rora Ũthathaũri wa Ciugo.
^ Rora Ũthathaũri wa Ciugo.
^ Rora Ũthathaũri wa Ciugo.
^ Rora Ũthathaũri wa Ciugo.
^ Rora Ũthathaũri wa Ciugo.
^ Rora Ũthathaũri wa Ciugo.
