Akolosai 4:1-18
4 Inyuĩ athani, ikaranagiai na ndungata cianyu na njĩra ya ũthingu na ya kĩhooto, mũkĩmenyaga atĩ o na inyuĩ nĩ mũrĩ na Mwathani kũũrĩa igũrũ.
2 Hoyagai hingo ciothe, na mũikarage mwĩiguĩte ũhoro-inĩ wĩgiĩ mahoya mũgĩcokagia ngatho.
3 Ningĩ-rĩ, tũhoyagĩrei o na ithuĩ, nĩ getha Ngai ahingũre mũrango nĩ ũndũ wa kiugo nĩguo tũhunjie ũhoro wa hitho ya Ngai ĩgiĩ Kristo, o ĩrĩa ĩtũmĩte njohwo,
4 na atĩ hunjie ũhoro wayo na njĩra njega o ta ũrĩa njagĩrĩirũo.
5 Thiagai na mĩthiĩre ya ũũgĩ kwerekera arĩa matarĩ thĩinĩ kĩũngano, o mũkĩhũthagĩra mahinda manyu na njĩra ĩrĩa njega biũ.
6 Aragiai ciugo njega hingo ciothe, ta ciĩkĩrĩtwo cumbĩ, nĩ getha mũmenyage ũrĩa mwagĩrĩirũo gũcokeria o mũndũ.
7 Mũrũ wa Ithe witũ Tikiko, ũrĩa nyendete na ũtungataga arĩ mwĩhokeku, o we tũtungataga nake thĩinĩ wa Mwathani nĩ ekũmũhe ũhoro wakwa wothe.
8 Ndĩramũtũma kũrĩ inyuĩ nĩguo mũmenye ũrĩa ithuĩ tũtariĩ na nĩguo amũmĩrĩrie.
9 Nĩ egũka marĩ hamwe na Onesimo, mũrũ wa Ithe witũ mwĩhokeku o we nyendete na umĩte kwanyu; na mamwĩre maũndũ mothe marĩa marathiĩ na mbere gũkũ.
10 Nĩ mwageithio nĩ Aristariko ũrĩa tuohetwo hamwe nake, o na Mariko ũrĩa wa mbarĩ cia Baranaba (ũrĩa mwerirũo angĩgoka kũrĩ inyuĩ mũkaamũnyita ũgeni),
11 na Jesu ũrĩa wĩtagwo Jusito. Acio nĩ a itari rĩa arĩa maruaga. Acio oiki nĩo tũrarutithania wĩra wĩgiĩ Ũthamaki wa Ngai, na nĩ manyũmĩrĩirie mũno.
12 Nĩ mwageithio nĩ Epafara, o we umĩte kwanyu na nĩ ngombo ya Kristo Jesu. Hingo ciothe nĩ amũhoyagĩra na kĩyo, nĩguo marigĩrĩrio-inĩ mũgaakorũo mwĩhandĩte biũ na mũkorũo na wĩtĩkio mũrũmu harĩ wendi wothe wa Ngai.
13 Tondũ niĩ ndĩ mũira atĩ nĩ erutanagĩria mũno nĩ ũndũ wanyu na nĩ ũndũ wa arĩa marĩ Laodikia na Hierapoli.
14 Nĩ mwageithio nĩ Luka ũrĩa ndagĩtarĩ, o ũcio twendete, Dema o nake nĩ amũgeithia.
15 Ngeithĩriai ariũ a Ithe witũ a Laodikia na mũgeithie Numifa na kĩũngano kĩrĩa gĩcemanagia gwake mũciĩ.
16 Na rĩrĩa mũgaakorũo mũthomeirũo marũa maya, bangai mathomerũo kĩũngano kĩa Laodikia na inyuĩ mũthome marĩa ndaatũmire Laodikia.
17 Ningĩ mwĩre Arikipo ũũ: “Menyagĩrĩra ũtungata ũrĩa wetĩkĩrire thĩinĩ wa Mwathani, nĩguo ũũhingie.”
18 Ici nĩ ngeithi ciakwa niĩ Paulo, ndamwandĩkĩra na guoko gwakwa mwene. Ririkanagai cioho ciakwa. Ũtugi mũnene ũroikara hamwe na inyuĩ.
