Mariko 16:1-8
-
Jesu kũriũkio (1-8)
16 Na thutha wa Thabatũ, Mariamu Mũmagidali, Salome, na Mariamu nyina wa Jakubu, makĩgũra indo cianungaga wega* nĩguo mathiĩ makahake mwĩrĩ wa Jesu.
2 Na rũcinĩ tene mũthenya wa mbere wa kiumia,* magĩkinya mbĩrĩra-inĩ ĩyo riũa rĩaratha.
3 Makĩũrania atĩrĩ: “Nũ ũgũtwehereria ihiga mũromo-inĩ wa mbĩrĩra?”
4 No rĩrĩa maarorire, makĩona atĩ ihiga rĩu rĩarĩ rĩeherie, o na gũtuĩka rĩarĩ inene mũno.
5 Marĩkia gũtonya thĩinĩ wa mbĩrĩra, makĩona mwanake wehumbĩte nguo ya rangi mwerũ aikarĩte thĩ mwena wa ũrĩo, makĩmaka mũno.
6 Akĩmeera atĩrĩ: “Tigai kũmaka. Nĩ njũĩ mũracaria Jesu ũrĩa Mũnazarini ũroragĩirũo mũtĩ igũrũ. Nĩ ariũkĩtio. Ndarĩ haha. Ta rorai, haha nĩho maramũkometie.
7 No rĩrĩ, thiĩi mwĩre arutwo ake o hamwe na Petero atĩrĩ, ‘Nĩ egũthiĩ mbere yanyu Galili. Kũu nĩkuo mũrĩmuona, o ta ũrĩa aamwĩrĩte.’”
8 Nĩ ũndũ ũcio, makiuma hau mbĩrĩra-inĩ mateng’erete makĩinainaga na maritũhĩirũo mũno ngoro-inĩ. Na gũtirĩ mũndũ o na ũrĩkũ meerire ũndũ, nĩ gũkorũo maarĩ amaku.*
Tũũhoro twa magũrũ-inĩ
^ Mũtutu kana mahuti na maguta maahũthagĩrũo kũhaarĩria mwĩrĩ nĩguo ũthikwo.
^ Ũcio nĩ mũthenya ũrĩa rĩu wĩtagwo Kiumia. Harĩ Ayahudi nĩguo warĩ mũthenya wa mbere thĩinĩ wa kiumia.
^ Kũringana na maandĩko ma kwĩhokeka ma tene, Injiri ya Mariko ĩrĩkĩrĩirie na ciugo iria irĩ mũhari-inĩ wa kanana.
