Maũndũ ma Matukũ ma Tene wa Mbere 10:1-14
-
Gĩkuũ gĩa Saulu na ariũ ake (1-14)
10 Na rĩrĩ, Afilisti makĩrũa na Isiraeli. Nao arũme a Isiraeli makĩũrĩra Afilisti, na aingĩ ao makĩũragĩrũo Kĩrĩma-inĩ kĩa Giliboa.+
2 Afilisti magĩgĩthiĩ o makuhĩrĩirie Saulu na ariũ ake, na Afilisti acio makĩũraga Jonathani, Abinadabu, na Maliki-shua,+ ariũ a Saulu.
3 Mbaara ĩyo ĩkĩneneha mũno ĩkĩhatĩrĩria Saulu, nao aikia a mĩguĩ makĩmuona, na aikia acio a mĩguĩ makĩmũguraria ũũru mũno.+
4 Saulu agĩkĩra mũndũ ũrĩa wamũkuuagĩra indo cia mbaara atĩrĩ: “Comora rũhiũ rwaku rwa njora ũndũrĩkanie naruo, nĩgetha arũme aya matarĩ aruu matigoke maanyamarie.”*+ No mũndũ ũcio wamũkuuagĩra indo cia mbaara ndeendaga gwĩka ũguo, tondũ aarĩ na guoya mũno. Nĩ ũndũ ũcio Saulu akĩoya rũhiũ rwa njora na akĩrũgwĩra.+
5 Rĩrĩa mũndũ ũcio wamũkuuagĩra indo cia mbaara oonire Saulu nĩ akua, o nake akĩgwĩra rũhiũ rwake rwa njora agĩkua.
6 Nĩ ũndũ ũcio Saulu na ariũ ake atatũ, na andũ othe a nyũmba yake magĩkua hamwe.+
7 Rĩrĩa andũ othe a Isiraeli arĩa maarĩ mũkuru-inĩ* moonire atĩ andũ othe nĩ mora na atĩ Saulu na ariũ ake nĩ makua, magĩtiganĩria matũũra mao na makĩũra; nao Afilisti magĩthiĩ gũikaraga matũũra-inĩ macio.
8 Mũthenya ũyũ ũngĩ rĩrĩa Afilisti maathiire kũbora andũ acio mooragĩtwo, magĩkora Saulu na ariũ ake marĩ akuũ kũu Kĩrĩma-inĩ kĩa Giliboa.+
9 Magĩkĩmũbora na makĩmũrenga mũtwe na makĩoya indo ciake cia mbaara, na magĩtũma ndũmĩrĩri bũrũri-inĩ wothe wa Afilisti atĩ ũhoro ũcio ũtheremio kũrĩ mĩhianano yao+ na kũrĩ andũ.
10 Magĩcoka makĩiga indo icio ciake cia mbaara nyũmba-inĩ* ya ngai yao na makĩoherera ihĩndĩ rĩake rĩa mũtwe nyũmba-inĩ ya Dagoni.+
11 Rĩrĩa andũ othe a Jabeshi+ thĩinĩ wa Gileadi maaiguire ũrĩa wothe Afilisti meekĩte Saulu,+
12 njamba ciothe cia ita ikĩarahũka igĩkuua kĩimba gĩa Saulu hamwe na ciimba cia ariũ ake. Makĩmatwara Jabeshi na magĩthika mahĩndĩ mao rungu rwa mũtĩ mũnene kũu Jabeshi,+ na makĩĩhinga kũrĩa thikũ mũgwanja.
13 Saulu agĩgĩkua nĩ ũndũ wa ũrĩa aagire wĩhokeku harĩ Jehova nĩ ũndũ ndaathĩkĩire uuge wa Jehova,+ ningĩ nĩ ũndũ wa gũtuĩria ũhoro harĩ mũndũ waragia na maroho+
14 handũ ha gũtuĩria ũhoro harĩ Jehova. Nĩ ũndũ ũcio Akĩmũũraga na akĩneana ũthamaki kũrĩ Daudi mũrũ wa Jesii.+