Maũndũ ma Matukũ ma Tene wa Mbere 12:1-40
-
Arĩa maanyitaga mbaru ũthamaki wa Daudi (1-40)
12 Aya nĩo arũme arĩa maathiire kũrĩ Daudi kũu Zikilagi+ rĩrĩa ataarĩ na wĩyathi wa gũthiĩ kũrĩa guothe angĩendire nĩ ũndũ wa Saulu+ mũrũ wa Kishu, na maarĩ gatagatĩ-inĩ ka njamba cia ita irĩ hinya iria ciamũnyitaga mbaru mbaara-inĩ.+
2 Maakoragwo mehaarĩirie na ũta, na nĩ maahotaga kũhũthĩra guoko kwa ũrĩo na guoko kwa ũmotho+ gũikia mahiga na kĩgũtha+ kana kũratha na mĩguĩ makĩhũthĩra ũta. Maarĩ a ariũ a ithe na Saulu, kuuma Benjamini.+
3 Mũtongoria wao aarĩ Ahiezeri, hamwe na Joashu, eerĩ maarĩ ariũ a Shemaa Mũgibea;+ Jezieli na Peleti ariũ a Azamavethu,+ Beraka, Jehu Mũanathothi,
4 Ishimaia Mũgibeoni,+ na aarĩ njamba ya ita yarĩ hinya gatagatĩ-inĩ ka njamba iria mĩrongo ĩtatũ+ na nĩwe watongoragia njamba icio mĩrongo ĩtatũ; ningĩ Jeremia, Jahazieli, Johanani, Jozabadu Mũgederathi,
5 Eluzai, Jerimothu, Bealia, Shemaria, Shefatia Mũharifu,
6 Elikana, Ishia, Azareli, Joezeru, na Jashobeamu, Akora;+
7 na Joela na Zebadia ariũ a Jerohamu wa Gedoru.
8 Agadi amwe nĩ maathiire mwena wa Daudi mwĩgitio-inĩ kũu werũ-inĩ;+ maarĩ njamba cia ita irĩ hinya, thigari ciarutĩtwo mbaara, na maarũgamaga mehaarĩirie manyitĩte ngo nene na itimũ, na mothiũ mao maatariĩ ta ma mĩrũthi na maarĩ na ihenya ta thiya irĩma-inĩ.
9 Ezeri nĩwe wamatongoragia, wa kerĩ aarĩ Obadia, wa gatatũ aarĩ Eliabu,
10 wa kana aarĩ Mishimana, wa gatano aarĩ Jeremia,
11 wa gatandatũ aarĩ Atai, wa mũgwanja aarĩ Elieli,
12 wa kanana aarĩ Johanani, wa kenda aarĩ Elizabadu,
13 wa ikũmi aarĩ Jeremia, wa ikũmi na ũmwe aarĩ Makibanai.
14 Acio nĩo maarĩ a Agadi,+ arĩa maatongoragia mbũtũ. Ũrĩa mũnini nĩ angĩetiiririe thigari 100, nake ũrĩa mũnene nĩ angĩetiiririe thigari 1,000.+
15 Acio nĩo arũme arĩa maaringire Rũũĩ rwa Jorodani mweri-inĩ wa mbere rĩrĩa ruoinĩrĩire ndeere-inĩ ciaruo, na makĩingata arĩa othe maaikaraga icigo-inĩ cia kĩanda, mwena wa irathĩro na mwena wa ithũĩro.
16 Arũme amwe a Benjamini na Juda o nao magĩũka kũrĩ Daudi mwĩgitio-inĩ wake.+
17 Daudi agĩgĩthiĩ hau mbere yao na akĩmeera ũũ: “Angĩkorũo muoka kũrĩ niĩ na thayũ nĩgetha mũndeithie, ngoro yakwa nĩ ĩkũnyitana na inyuĩ. No angĩkorũo muoka kũngunyanĩra kũrĩ thũ ciakwa rĩrĩa moko makwa matekĩte ũndũ mũũru, Ngai wa maithe maitũ ma tene aroona ũndũ ũcio na atue ciira.”+
18 Naguo roho ũgĩũka igũrũ rĩa* Amasai,+ ũrĩa watongoragia njamba iria mĩrongo ĩtatũ na akiuga:
“Tũrĩ aku, wee Daudi, na tũrĩ hamwe nawe, wee mũrũ wa Jesii.+
Thayũ, thayũ ũrotuĩka waku, na kũrogĩa na thayũ harĩ ũrĩa ũragũteithia,Nĩ gũkorũo Ngai waku nĩ aragũteithia.”+
Nĩ ũndũ ũcio Daudi akĩmaamũkĩra na akĩmaamũra makorũo gatagatĩ-inĩ ka atongoria a thigari.
19 Andũ amwe a kuuma Manase o nao nĩ moorĩire kũrĩ Daudi rĩrĩa ookire na Afilisti kũrũa na Saulu; ĩndĩ ndaateithĩrĩirie Afilisti, tondũ thutha wa kwaranĩria, athani a Afilisti+ nĩ maamũingatire, makiuga: “Ekũũrĩra kũrĩ mwathi wake Saulu, na ũndũ ũcio nĩ ũgũtũma tũũrũo nĩ mĩtwe itũ.”+
20 Rĩrĩa aathiire Zikilagi,+ aya nĩo moorĩire kũrĩ we kuuma Manase: Adina, Jozabadu, Jediaeli, Mikaeli, Jozabadu, Elihu, na Zilethai, atongoria a andũ makiri maingĩ a Manase.+
21 Magĩteithia Daudi kũrũa na gĩkundi kĩa atunyani, nĩ gũkorũo othe maarĩ arũme marĩ na hinya na ũcamba,+ na magĩtuĩka anene a mbũtũ.
22 O mũthenya o mũthenya andũ maathiaga o na mbere gũthiĩ harĩ Daudi+ kũmũteithia nginya kambĩ ĩyo ĩkĩneneha o ta kambĩ ya Ngai.+
23 Ũyũ nĩguo mũigana wa atongoria a arĩa meehaarĩirie nĩ ũndũ wa mbaara arĩa maathiire kũrĩ Daudi Hebironi+ kũneana ũthamaki wa Saulu kũrĩ we kũringana na uuge wa Jehova.+
24 Arũme a Juda arĩa maakuuĩte ngo nene na itimũ maarĩ 6,800, mehaarĩirie nĩ ũndũ wa mbaara.
25 Kuuma harĩ Asimeoni, maarĩ arũme 7,100 a mbũtũ, marĩ na hinya na ũcamba.
26 Kuuma harĩ Alawii, arũme 4,600.
27 Jehoiada+ nĩwe warĩ mũtongoria wa ariũ a Haruni,+ na aarĩ hamwe na arũme 3,700,
28 o hamwe na Zadoku,+ mwanake warĩ na hinya na ũcamba, hamwe na anene 22 kuuma harĩ nyũmba ya maithe mao.
29 Kuuma harĩ Abenjamini, ariũ a ithe na Saulu,+ maarĩ arũme 3,000, arĩa aingĩ ao mbere ĩyo maakoretwo makĩrangĩra maũndũ megiĩ nyũmba ya Saulu.
30 Kuuma harĩ Aefiraimu maarĩ arũme 20,800 marĩ na hinya na ũcamba na marĩ igweta gatagatĩ-inĩ ka nyũmba cia maithe mao.
31 Kuuma harĩ nuthu ya mũhĩrĩga wa Manase, maarĩ arũme 18,000 arĩa maathuurĩtwo na marĩĩtwa nĩgetha moke gũtua Daudi mũthamaki.
32 Kuuma harĩ mũhĩrĩga wa Isakaru, arĩa maataũkagĩrũo nĩ mahinda na makamenya ũrĩa andũ a Isiraeli maagĩrĩirũo gwĩka, maarĩ arũme 200 a atongoria ao, na ariũ othe a ithe wao maarĩ rungu rwa ũtongoria wao.
33 Kuuma harĩ Zebuluni, maarĩ arũme 50,000 arĩa maangĩahotire gũtungata mbũtũ-inĩ, mebangĩte mehaarĩirie kũrũa marĩ na matharaita mothe ma mbaara, othe makĩnyitana na Daudi marĩ na wĩhokeku ũtarĩ mũgayũkanu.*
34 Kuuma harĩ Nafitali, kwarĩ na anene 1,000, marĩ hamwe na arũme 37,000 arĩa maakuuĩte ngo nene na itimũ.
35 Kuuma harĩ Adani, arĩa meebangĩte mehaarĩirie kũrũa maarĩ 28,600.
36 Na kuuma harĩ Asheri, arĩa mangĩahotire gũtungata mbũtũ-inĩ mebangĩte mehaarĩirie kũrũa maarĩ 40,000.
37 Kuuma mũrĩmo ũcio ũngĩ wa Rũũĩ rwa Jorodani,+ kuuma harĩ Arubeni, Agadi, na nuthu ya mũhĩrĩga wa Manase, maarĩ thigari 120,000 ciarĩ na matharaita ma mĩthemba yothe ma mbaara.
38 Acio othe maarĩ arũme a mbaara, maanyitanĩire hamwe mbaara-inĩ; magĩũka Hebironi na ngoro yothe gũtua Daudi mũthamaki wa andũ othe a Isiraeli, o nao andũ acio angĩ othe a Isiraeli maarĩ na ũrũmwe wa kwenda* gũtua Daudi mũthamaki.+
39 Na magĩikara kũu hamwe na Daudi thikũ ithatũ, makĩrĩaga na makĩnyuaga, nĩ gũkorũo ariũ a ithe wao nĩ maahaarĩrĩirie maũndũ nĩ ũndũ wao.
40 O na arĩa othe maarĩ gũkuhĩ nao, na arĩa maarĩ kũraihu nginya Isakaru, Zebuluni, na Nafitali, nĩ maarehaga irio makuuĩte na ndigiri, ngamĩra, nyũmbũ, na ng’ombe—maarehaga mũtu, keki cia ngũyũ hihe na cia thabibũ nyũmithie, ndibei, maguta, na ng’ombe na ng’ondu mũigana mũnene mũno, nĩ gũkorũo thĩinĩ wa Isiraeli nĩ kwarĩ na gĩkeno kĩnene.
Tũũhoro twa magũrũ-inĩ
^ Ũkk., “ũkĩhumba.”
^ Kana “arĩa othe maanyitanire na Daudi matiarĩ na ngoro igĩrĩ.”
^ Ũkk., “maarĩ na ngoro ĩmwe.”
