Maũndũ ma Matukũ ma Tene wa Mbere 13:1-14
13 Na rĩrĩ, Daudi akĩaranĩria na anene a andũ ngiri na anene a andũ igana o hamwe na atongoria othe.+
2 Daudi agĩcoka akĩra kĩũngano gĩothe kĩa Isiraeli atĩrĩ: “Angĩkorũo nĩ mũkuona arĩ wega na ũndũ ũcio ũkorũo wĩtĩkĩrĩkĩte harĩ Jehova Ngai witũ, rekei tũtũme ndũmĩrĩri kũrĩ ariũ a ithe witũ arĩa matigarĩte icigo-inĩ ciothe cia Isiraeli na kũrĩ athĩnjĩri-Ngai na Alawii matũũra-inĩ mao+ na kũndũ gwa kũrĩithia moke manyitanĩre na ithuĩ.
3 Na tũcokie Ithandũkũ+ rĩa Ngai witũ.” Nĩ gũkorũo matiarĩrũmbũirie matukũ-inĩ ma Saulu.+
4 Kĩũngano gĩothe gĩgĩtĩkĩra gwĩka ũguo, nĩ gũkorũo andũ othe nĩ moonire ũndũ ũcio wagĩrĩire.
5 Nĩ ũndũ ũcio Daudi agĩcokanĩrĩria andũ othe a Isiraeli, kuuma rũũĩ-inĩ rwa* Misiri o nginya Lebo-hamathu,*+ nĩguo makagĩĩre Ithandũkũ rĩa Ngai ũrĩa wa ma kuuma Kiriathu-jearimu.+
6 Daudi na andũ othe a Isiraeli makĩambata magĩthiĩ Baala,+ kũu Kiriathu-jearimu ĩrĩa ya Juda, nĩgetha makagĩĩre kuuma kuo Ithandũkũ rĩa Ngai ũrĩa wa ma, Jehova, o we ũrĩa ũikarĩire gĩtĩ kĩa ũnene igũrũ rĩa* akerubi,+ harĩa andũ makayagĩra rĩĩtwa rĩake.
7 O na kũrĩ ũguo, makĩigĩrĩra Ithandũkũ rĩu rĩa Ngai ũrĩa wa ma gakaari-inĩ kerũ ga gũkururio+ na makĩrĩkuua kuuma nyũmba-inĩ ya Abinadabu, na Uza na Ahio nĩo maatongoragia gakaari kau ga gũkururio.+
8 Daudi na andũ othe a Isiraeli no gũkũngũĩra maakũngũyagĩra mbere ya Ngai ũrĩa wa ma na hinya wao wothe, makĩinaga nyĩmbo na inanda cia mũgeeto, inanda ingĩ cia ndigi, manyanga,+ thani iria ihũũrithanagio,+ na tũrumbeta.+
9 No rĩrĩa maakinyire kĩhuuhĩro-inĩ gĩa Kidoni, Uza agĩtambũrũkia guoko gwake akĩnyita Ithandũkũ rĩu, nĩ gũkorũo ng’ombe ciarĩ hakuhĩ kũrĩgũithia.
10 Nĩ ũndũ ũcio marakara ma Jehova makĩrĩrĩmbũkĩra Uza, na Akĩmũũraga nĩ ũndũ wa gũtambũrũkia guoko gwake harĩ Ithandũkũ rĩu,+ agĩgĩkuĩra hau mbere ya Ngai.+
11 No Daudi akĩrakara nĩ ũndũ wa marakara ma Jehova kũrĩrĩmbũkĩra Uza; na handũ hau hetagwo Perezu-uza* nginyagia ũmũthĩ.
12 Nĩ ũndũ ũcio Daudi agĩĩtigĩra Ngai ũrĩa wa ma mũthenya ũcio na akĩũria atĩrĩ: “Ingĩrehe Ithandũkũ rĩa Ngai ũrĩa wa ma atĩa kũrĩ niĩ?”+
13 Daudi ndaigana gũtwara Ithandũkũ rĩu kũrĩa aarĩ thĩinĩ wa Itũũra rĩa Daudi, ĩndĩ ooigire rĩtwarũo nyũmba-inĩ ya Obedi-edomu Mũgiiti.
14 Ithandũkũ rĩu rĩa Ngai ũrĩa wa ma rĩarĩ hamwe na andũ a nyũmba ya Obedi-edomu, rĩgĩikara kũu nyũmba-inĩ yake mĩeri ĩtatũ, na Jehova agĩthiĩ o na mbere kũrathima andũ a nyũmba ya Obedi-edomu na kĩrĩa gĩothe aarĩ nakĩo.+
Tũũhoro twa magũrũ-inĩ
^ Kana “kuuma Shihoru.”
^ Kana “itonyero rĩa Hamathu.”
^ Kana hihi, “gatagatĩ-inĩ ka.”
^ Rĩĩtwa rĩu riugĩte “Uza Kũrĩrĩmbũkĩrũo.”
