Maũndũ ma Matukũ ma Tene wa Mbere 14:1-17
14 Mũthamaki Hiramu+ wa Turo agĩtũma atũmwo kũrĩ Daudi, o hamwe na mbaũ cia mũtarakwa, mabundi a mahiga,* na mabundi a mbaũ, nĩguo mamwakĩre nyũmba.*+
2 Na Daudi nĩ aamenyaga atĩ Jehova nĩ aamũhandĩte atuĩke mũthamaki wa Isiraeli,+ tondũ ũthamaki wake nĩ watũũgĩrĩte mũno nĩ ũndũ wa andũ Ake Isiraeli.+
3 Daudi agĩkĩgĩa na atumia angĩ+ arĩ Jerusalemu, na Daudi agĩciarĩrũo ariũ na aarĩ angĩ.+
4 Maya nĩmo marĩĩtwa ma ciana iria aaciarĩirũo kũu Jerusalemu:+ Shamua, Shobabu, Nathani,+ Suleimani,+
5 Ibiharu, Elishua, Elipeleti,
6 Noga, Nefegu, Jafia,
7 Elishama, Beeliada, na Elifeleti.
8 Rĩrĩa Afilisti maaiguire atĩ Daudi nĩ aaitĩrĩirio maguta atuĩke mũthamaki wa andũ othe a Isiraeli,+ Afilisti othe makĩambata nĩguo magacarie Daudi.+ Rĩrĩa Daudi aaiguire ũhoro ũcio, agĩthiĩ kũmatharĩkĩra.
9 Nao Afilisti acio magĩthiĩ na magĩikara magĩtharĩkagĩra Mũkuru-inĩ wa* Refaimu.+
10 Daudi agĩtuĩria ũhoro harĩ Ngai, akĩũria atĩrĩ: “Nyambate ngatharĩkĩre Afilisti? Hihi nĩ ũkũmaneana guoko-inĩ gwakwa?” Nĩ ũndũ ũcio Jehova akĩmwĩra ũũ: “Ambata, hatarĩ nganja nĩ ngũmaneana guoko-inĩ gwaku.”+
11 Daudi agĩkĩambata agĩthiĩ Baali-perazimu,+ na akĩmoragĩra kuo. Nĩ ũndũ ũcio Daudi akiuga atĩrĩ: “Ngai ũrĩa wa ma nĩ aharaganĩtie thũ ciakwa kũgerera guoko gwakwa, o ta ũrĩa maĩ maharaganagia handũ.” Nĩkĩo meetire handũ hau Baali-perazimu.*
12 Afilisti maatiganĩirie ngai ciao kũu, na rĩrĩa Daudi aarutire watho, ngai icio igĩcinwo na mwaki.+
13 Thutha-inĩ Afilisti magĩtharĩkĩra o rĩngĩ mũkuru-inĩ.*+
14 O rĩngĩ Daudi agĩtuĩria ũhoro harĩ Ngai, ĩndĩ Ngai ũrĩa wa ma akĩmwĩra ũũ: “Ndũkambate ũthiĩ kũrĩ o ĩmwe kwa ĩmwe. Handũ ha ũguo, thiũrũrũka ũthiĩ thutha wao, nĩgetha ũmatharĩkĩre hau mbere ya ihinga cia mĩbaka.+
15 Na rĩrĩa ũrĩigua mũgambo wa mũkubio igũrũ rĩa ihinga cia mĩbaka, wambĩrĩrie tharĩkĩro yaku, tondũ Ngai ũrĩa wa ma egũkorũo oimagarĩte mbere yaku kũũraga mbũtũ ya Afilisti.”+
16 Nĩ ũndũ ũcio Daudi agĩka o ta ũrĩa Ngai ũrĩa wa ma aamwathĩte,+ na makĩũraga mbũtũ ya Afilisti kuuma Gibeoni gũthiĩ o nginya Gezeri.+
17 Na ngumo ya Daudi ĩgĩtherema mabũrũri-inĩ mothe, na Jehova agĩtũma ndũrĩrĩ ciothe imwĩtigĩre.+
Tũũhoro twa magũrũ-inĩ
^ Kana “aaki a thingo.”
^ Kana “nyũmba ya mũthamaki.”
^ Kana “Kĩanda-inĩ kĩa.”
^ Rĩĩtwa rĩu riugĩte “Njorua ya Kũharagania.”
^ Kana “kĩanda-inĩ.”
