Maũndũ ma Matukũ ma Tene wa Mbere 18:1-17
18 Thutha wa ihinda, Daudi akĩhoota Afilisti na akĩmatooria biũ na agĩtunyana Gathu+ na taũni ciakuo iria ciamĩthiũrũrũkĩirie kuuma moko-inĩ ma Afilisti.+
2 Agĩcoka agĩtooria Moabi,+ na Amoabi magĩtuĩka ndungata cia Daudi na nĩ maamũrehagĩra irĩhi rĩa igooti.+
3 Daudi agĩgĩtooria Mũthamaki Hadadezeri+ wa Zoba+ hakuhĩ na Hamathu+ arĩ njĩra-inĩ agĩthiĩ kũgaacĩrithia ũnene wake Rũũĩ-inĩ rwa Farati.+
4 Daudi akĩmũtunya ngaari 1,000 cia mbarathi, atwarithia a mbarathi 7,000, na thigari 20,000 cia gũthiĩ na magũrũ.+ Daudi agĩcoka agĩtema mĩkiha ya magũrũ ma mbarathi ciothe cia ngaari cia mbaara, o tiga mbarathi 100.+
5 Rĩrĩa Asiria a Dameski mookire gũteithia Mũthamaki Hadadezeri wa Zoba, Daudi akĩũraga Asiria 22,000.+
6 Daudi agĩcoka agĩthondeka kambĩ cia thigari kũu Siria ya Dameski, na Asiria magĩtuĩka ndungata cia Daudi na nĩ maamũrehagĩra irĩhi rĩa igooti. Jehova agĩkĩhe Daudi ũhootani* kũrĩa guothe aathiaga.+
7 Makĩria ma ũguo, Daudi akĩoya ngo cia gĩthiũrũrĩ cia thahabu kuuma kũrĩ ndungata cia Hadadezeri na agĩthiĩ nacio Jerusalemu.
8 Kuuma Tibihathu na Kuni, matũũra ma Hadadezeri, Daudi akĩoya gĩcango kĩingĩ mũno. Suleimani aahũthĩrire gĩcango kĩu gũthondeka Karia ga gĩcango,+ itugĩ, na indo cia gĩcango.+
9 Rĩrĩa Mũthamaki Tou wa Hamathu aaiguire atĩ Daudi nĩ aatooretie mbũtũ yothe ya Mũthamaki Hadadezeri+ wa Zoba,+
10 o rĩo agĩtũma Hadoramu mũrũwe kũrĩ Mũthamaki Daudi akamũũrie ũrĩa arathiĩ na mbere na amũgaathĩrĩrie nĩ tondũ wa ũrĩa aarũĩte na Hadadezeri na akamũtooria (nĩ gũkorũo Hadadezeri nĩ aarũaga na Tou kaingĩ), na agĩkĩmũtwarĩra indo cia mĩthemba yothe cia thahabu, betha, na gĩcango.
11 Mũthamaki Daudi agĩkĩamũrĩra Jehova indo icio,+ o hamwe na betha na thahabu iria aakuuĩte kuuma kũrĩ ndũrĩrĩ ciothe: kuuma Edomu na Moabi, kuuma kũrĩ Aamoni,+ Afilisti,+ na Aamaleki.+
12 Abishai+ mũrũ wa Zeruia+ akĩũraga Aedomu 18,000 Mũkuru-inĩ wa Cumbĩ.+
13 Agĩthondeka kambĩ cia thigari kũu Edomu, na Aedomu othe magĩtuĩka ndungata cia Daudi.+ Jehova agĩkĩhe Daudi ũhootani* kũrĩa guothe aathiaga.+
14 Daudi agĩthiĩ o na mbere gũthamakĩra andũ othe a Isiraeli,+ na aatuagĩra andũ ake othe ciira na kĩhooto na ũthingu.+
15 Joabu mũrũ wa Zeruia aarĩ mũnene wa mbũtũ,+ nake Jehoshafatu+ mũrũ wa Ahiludu aarĩ mũigi wa rekondi,
16 Zadoku mũrũ wa Ahitubu na Ahimeleku mũrũ wa Abiatharu maarĩ athĩnjĩri-Ngai, nake Shavisha aarĩ mwandĩki.
17 Benaia mũrũ wa Jehoiada aarĩ mũnene wa Akerethi+ na Apelethi.+ Nao ariũ a Daudi maarĩ gaturũa-inĩ ka mbere thutha wa mũthamaki.
