Maũndũ ma Matukũ ma Tene wa Mbere 19:1-19
19 Thutha-inĩ Nahashu mũthamaki wa Aamoni agĩkua, nake mũrũwe agĩtuĩka mũthamaki ithenya rĩake.+
2 Nĩ ũndũ ũcio Daudi akiuga atĩrĩ: “Nĩ nguonia Hanuni mũrũ wa Nahashu wendo mwĩhokeku+ nĩ gũkorũo ithe nĩ aanyonirie wendo mwĩhokeku.” Kwoguo Daudi agĩtũma atũmwo makamũũmĩrĩrie nĩ ũndũ wa gũkuĩrũo nĩ ithe. No rĩrĩa ndungata icio cia Daudi ciakinyire bũrũri-inĩ wa Aamoni+ nĩgetha ikomĩrĩrie Hanuni,
3 anene a Aamoni makĩra Hanuni atĩrĩ: “Hihi ũreciria Daudi nĩ gũtĩa aratĩa thoguo na njĩra ya gũtũma andũ makũũmĩrĩrie? Githĩ ndungata ciake itiũkĩte kũrĩ wee nĩguo ituĩrie na kinyi na ikũhagũranie na ithigane bũrũri ũyũ?”
4 Nĩ ũndũ ũcio Hanuni akĩnyita ndungata icio cia Daudi na agĩcienja+ na agĩtinia nguo ciacio nuthu njikarĩro-inĩ na agĩcingata.
5 Rĩrĩa Daudi eerirũo ũhoro wĩgiĩ arũme acio, agĩtũma andũ angĩ o rĩo makamatũnge, tondũ arũme acio nĩ maaconorithĩtio mũno; na mũthamaki akĩmeera ũũ: “Ikarai Jeriko+ nginya nderu cianyu ciambe imere rĩngĩ, thutha ũcio mũcoke mũũke.”
6 Thutha wa ihinda Aamoni makĩona atĩ nĩ matuĩkĩte kĩndũ kĩnungu harĩ Daudi, nĩ ũndũ ũcio Hanuni na Aamoni magĩtũma taranda* 1,000 cia betha nĩguo makombore ngaari cia mbarathi na atwarithia a mbarathi kuuma Mesopotamia,* Aramu-maaka, na Zoba.+
7 Nĩ ũndũ ũcio magĩkombora ngaari 32,000 cia mbarathi, o hamwe na mũthamaki wa Maaka na andũ ake. Magĩũka na makĩamba hema mbere ya Medeba.+ Aamoni magĩgĩtũngana hamwe kuuma matũũra-inĩ mao na makiuma nĩguo marũe.
8 Rĩrĩa Daudi aaiguire ũhoro ũcio, agĩtũma Joabu+ na mbũtũ yothe, hamwe na njamba ciake cia ita iria irĩ hinya biũ.+
9 Na Aamoni makiumagara magĩthiĩ na makĩĩbanga nĩ ũndũ wa mbaara mũromo-inĩ wa itũũra na hĩndĩ ĩyo nao athamaki acio mookĩte maarĩ oiki werũ-inĩ.
10 Rĩrĩa Joabu oonire atĩ thigari icio cia mbaara ciokaga kũmũtharĩkĩra ciumĩte mwena wa mbere na wa thutha, agĩthuura thigari iria njega biũ thĩinĩ wa Isiraeli na agĩcibanga nĩ ũndũ wa mbaara nĩguo igatũngane na Asiria.+
11 Na akĩiga arũme acio angĩ rungu rwa ũtongoria wa* mũrũ wa nyina Abishai,+ nĩgetha amabange nĩ ũndũ wa mbaara nĩguo magatũngane na Aamoni.
12 Agĩcoka akiuga atĩrĩ: “Angĩkorũo Asiria+ nĩ mekũngĩria hinya-rĩ, wagĩrĩirũo gũka kũũhonokia; no angĩkorũo Aamoni nĩ megũgũkĩria hinya, nĩ ngũkũhonokia.
13 No mũhaka twĩhe hinya na tũgĩe na ũmĩrĩru+ nĩ ũndũ wa andũ aitũ na matũũra ma Ngai witũ, na Jehova nĩ egwĩka ũrĩa ekuona arĩ wega maitho-inĩ make.”
14 Thutha ũcio Joabu na arũme ake magĩthiĩ gũtũngana na Asiria mbaara-inĩ, nao makĩmũũrĩra.+
15 Rĩrĩa Aamoni moonire atĩ Asiria nĩ mora, o nao makĩũrĩra mũrũ wa nyina Abishai magĩthiĩ magĩtonya itũũra-inĩ. Thutha ũcio Joabu agĩthiĩ Jerusalemu.
16 Rĩrĩa Asiria moonire atĩ nĩ matoorio nĩ Isiraeli, magĩgĩtũma atũmwo mageete Asiria a gĩcigo kĩa Rũũĩ,*+ matongoretio nĩ Shofaku mũnene wa mbũtũ ya Hadadezeri.+
17 Rĩrĩa Daudi aakinyĩirio ndũmĩrĩri ĩyo, o rĩo agĩcokanĩrĩria andũ othe a Isiraeli na makĩringa Jorodani magĩthiĩ kũrĩ o na makĩĩbanga nĩ ũndũ wa mbaara nĩguo mamokĩrĩre. Daudi agĩkĩĩbanga nĩ ũndũ wa mbaara nĩguo atũngane na Asiria, nao makĩrũa nake.+
18 No Asiria makĩũrĩra andũ a Isiraeli; na Daudi akĩũraga atwarithia 7,000 a ngaari cia mbarathi na thigari 40,000 cia gũthiĩ na magũrũ cia Asiria, na akĩũraga Shofaku mũnene wa mbũtũ.
19 Rĩrĩa ndungata cia Hadadezeri cioonire atĩ nĩ ciahootwo nĩ Isiraeli,+ o rĩo igĩthondeka thayũ na Daudi na igĩtuĩka cia gwathagwo nĩwe;+ na Asiria matiigana gwĩtĩkĩra gũteithia Aamoni rĩngĩ.
Tũũhoro twa magũrũ-inĩ
^ Taranda ĩmwe yaiganaine na kilo 34.2. Rora Ũhoro Muongerere B14.
^ Ũkk., “Aramu-naharaimu.”
^ Ũkk., “guoko-inĩ kwa.”
^ Nĩ Rũũĩ rwa Farati.
