Maũndũ ma Matukũ ma Tene wa Mbere 21:1-30
21 Nake Shaitani* akĩĩhanda kwerekera andũ a Isiraeli, agĩcogera Daudi atare andũ a Isiraeli.+
2 Kwoguo Daudi akĩra Joabu+ na anene a andũ atĩrĩ: “Thiĩi mũtare andũ a Isiraeli kuuma Biri-shiba nginya Dani;+ mũcoke mũndehere riboti nĩgetha menye mũigana wao.”
3 No Joabu akiuga ũũ: “Jehova arotũma andũ ake mongerereke maita 100! Mwathi wakwa mũthamaki, na githĩ othe ti ndungata cia mwathi wakwa? Nĩ kĩĩ kĩratũma mwathi wakwa ende gwĩka ũguo? Nĩ kĩĩ gĩgũtũma atuĩke wa kũrehera Isiraeli mahĩtia?”
4 Ĩndĩ kiugo kĩa mũthamaki gĩgĩtooria Joabu. Nĩ ũndũ ũcio Joabu akiumagara na agĩtuĩkania Isiraeli guothe, na thutha ũcio agĩcoka Jerusalemu.+
5 Joabu agĩkĩnengera Daudi mũigana wa andũ arĩa maandĩkithirio. Andũ othe a Isiraeli maarĩ arũme 1,100,000 marĩ na hiũ cia njora, na andũ a Juda maarĩ arũme 470,000 marĩ na hiũ cia njora.+
6 No Alawii na Abenjamini matiandĩkithirio hamwe nao,+ tondũ uuge wa mũthamaki ndwakenirie Joabu.+
7 Na rĩrĩ, ũndũ ũcio nĩ warakaririe Ngai ũrĩa wa ma mũno, nĩ ũndũ ũcio agĩtharĩkĩra Isiraeli.
8 Daudi agĩkĩra Ngai ũrĩa wa ma atĩrĩ: “Nĩ njĩhĩtie+ mũno nĩ ũndũ wa gwĩka ũndũ ũyũ. Na rĩu, ndagũthaitha wohere ndungata yaku mahĩtia mayo,+ nĩ gũkorũo nĩ njĩkĩte ũndũ wa ũrimũ mũno.”+
9 Jehova agĩcoka akĩarĩria Gadi,+ ũrĩa warĩ muoni cioneki wa Daudi, akĩmwĩra ũũ:
10 “Thiĩ wĩre Daudi atĩrĩ, ‘Ũũ nĩguo Jehova oigĩte: “Ndĩrakũhe maũndũ matatũ ma gũthuura. Thuura ũndũ ũmwe ũrĩa ũkwenda ngũrehere.”’”
11 Kwoguo Gadi akĩingĩra harĩ Daudi na akĩmwĩra atĩrĩ: “Ũũ nĩguo Jehova oigĩte, ‘Wĩthuurĩre
12 kana ũkwenda gũkorũo na ng’aragu mĩaka ĩtatũ,+ kana mĩeri ĩtatũ ya kwanangwo nĩ thũ ciaku na hĩndĩ ĩyo rũhiũ rwa njora rwa thũ ciaku rũkorũo rũgĩgũũkĩrĩra,+ kana ũũkĩrĩrũo nĩ rũhiũ rwa njora rwa Jehova thikũ ithatũ—kũgĩe na mũrimũ mũũru bũrũri-inĩ+—mũraika wa Jehova akĩrehaga mwanangĩko+ gĩcigo-inĩ gĩothe kĩa Isiraeli.’ Rĩu wĩcũranie ũrĩa ũkwenda njokerie Ũrĩa ũndũmĩte.”
13 Nĩ ũndũ ũcio Daudi akĩra Gadi ũũ: “Nĩ ndangĩkĩte mũno nĩ tondũ wa ũndũ ũyũ. Ndagũthaitha, reke ngwe guoko-inĩ kwa Jehova, nĩ gũkorũo tha ciake nĩ nyingĩ mũno;+ no ndũkareke ngwe guoko-inĩ kwa mũndũ.”+
14 Jehova agĩgĩtũma mũrimũ mũũru+ thĩinĩ wa Isiraeli, ũndũ ũrĩa watũmire andũ 70,000 thĩinĩ wa Isiraeli makue.+
15 Makĩria ma ũguo, Ngai ũrĩa wa ma agĩtũma mũraika athiĩ itũũra-inĩ rĩa Jerusalemu nĩgetha arĩanange; na rĩrĩa aarĩ hakuhĩ gwĩka ũguo, Jehova akĩona ũndũ ũcio na akĩĩrira* nĩ ũndũ wa mũthiro ũcio,+ na akĩra mũraika ũcio warehaga mwanangĩko ũcio ũũ: “Nĩ ũguo rĩu!+ Rĩu cokia guoko gwaku thĩ.” Mũraika ũcio wa Jehova aarũgamĩte hakuhĩ na kĩhuuhĩro kĩa Orinani+ Mũjebusi.+
16 Rĩrĩa Daudi aatiirire maitho make, akĩona mũraika wa Jehova arũgamĩte gatagatĩ ga thĩ na igũrũ acomorete rũhiũ rwa njora+ arwerekeirie Jerusalemu. O rĩo Daudi na athuri* makĩĩgũithia maturumithĩtie mothiũ mao thĩ+ mehumbĩte nguo cia makũnia.+
17 Daudi akĩra Ngai ũrĩa wa ma atĩrĩ: “Na githĩ ti niĩ ndĩratarire andũ? Niĩ nĩ niĩ njĩhĩtie, na nĩ niĩ njĩkĩte ũndũ mũũru;+ no ng’ondu ici-rĩ—nĩ atĩa ciĩkĩte? Wee Jehova Ngai wakwa, ndagũthaitha, reke guoko gwaku kũnjũkĩrĩre niĩ o hamwe na nyũmba ya baba; no ndũkarehere andũ aku ihũũra rĩrĩ.”+
18 Nake mũraika wa Jehova akĩra Gadi+ ere Daudi ambate agaakĩre Jehova kĩgongona kĩhuuhĩro-inĩ kĩa Orinani Mũjebusi.+
19 Daudi agĩkĩambata kũringana na uuge wa Gadi, ũrĩa aarĩtie na rĩĩtwa rĩa Jehova.
20 Ihinda-inĩ rĩu, Orinani akĩĩhũgũra na akĩona mũraika ũcio, nao ariũ ake ana arĩa maarĩ hamwe nake makĩĩhitha. Na rĩrĩ, Orinani nĩ kũhũũra aahũũraga ngano.
21 Rĩrĩa Daudi aambatire agĩthiĩ harĩ we, Orinani akĩrora akĩona Daudi, na o rĩo akiumĩra kĩhuuhĩro-inĩ na akĩinamĩrĩra harĩ Daudi aturumithĩtie ũthiũ wake thĩ.
22 Daudi akĩra Orinani atĩrĩ: “Nyenderia* kĩwanja gĩkĩ gĩa kĩhuuhĩro, nĩgetha njakĩre Jehova kĩgongona ho. Nyenderia na thogora wothe wakĩo, nĩguo ihũũra rĩrĩ rĩkorete andũ rĩthire.”+
23 No Orinani akĩra Daudi atĩrĩ: “Kĩoe gĩtuĩke gĩaku, na mwathi wakwa mũthamaki aroeka ũrĩa ekuona arĩ wega.* Nĩ ndaruta ng’ombe nĩ ũndũ wa magongona ma njino na rũbaũ rwa kũhũũra ngano+ rũtuĩke ngũ o hamwe na ngano ĩrĩ igongona rĩa mũtu. Ndaciheana ciothe.”
24 No rĩrĩ, Mũthamaki Daudi akĩra Orinani ũũ: “Aca, no mũhaka ndĩkĩgũre na thogora wothe wakĩo, tondũ ndikuoya kĩndũ gĩaku ndutĩre Jehova kana ndute magongona ma njino itarĩ kĩndũ ndutĩte.”+
25 Nĩ ũndũ ũcio Daudi akĩnengera Orinani gĩthimi gĩa cekeri* 600 cia thahabu nĩ ũndũ wa kĩwanja kĩu.
26 Na Daudi agĩakĩra Jehova kĩgongona+ hau na akĩruta magongona ma njino o hamwe na magongona ma ũiguano, na agĩkaĩra Jehova, nake akĩmũcokeria na mwaki+ kuuma igũrũ hau kĩgongona-inĩ kĩa igongona rĩa njino.
27 Jehova agĩcoka agĩatha mũraika+ acokie rũhiũ rwake rwa njora njora-inĩ yaruo.
28 Ihinda-inĩ rĩu, rĩrĩa Daudi oonire atĩ Jehova nĩ aamũigua arĩ hau kĩhuuhĩro-inĩ kĩa Orinani Mũjebusi, agĩthiĩ na mbere kũrutĩra igongona ho.
29 No rĩrĩ, gĩikaro kĩrĩa kĩamũre kĩa Jehova kĩrĩa Musa aathondekete werũ-inĩ o hamwe na kĩgongona kĩa igongona rĩa njino ihinda-inĩ rĩu ciarĩ Gibeoni thĩinĩ wa handũ harĩa hatũũgĩru.+
30 Ĩndĩ Daudi ndaahotire gũthiĩ mbere yakĩo gũtuĩria ũhoro harĩ Ngai, tondũ nĩ eetigagĩra nĩ ũndũ wa rũhiũ rwa njora rwa mũraika wa Jehova.
Tũũhoro twa magũrũ-inĩ
^ Kana hihi, “mũregani.”
^ Kana “akĩigua kĩeha.”
^ Athuri arĩa meehokeirũo maũndũ.
^ Ũkk., “Nengera.”
^ Ũkk., “ũrĩa ekuona arĩ wega maitho-inĩ make.”
^ Cekeri ĩmwe yaiganaine na ngiramu 11.4. Rora Ũhoro Muongerere B14.
