Maũndũ ma Matukũ ma Tene wa Mbere 22:1-19
22 Daudi agĩcoka akiuga ũũ: “Ĩno nĩ nyũmba ya Jehova Ngai ũrĩa wa ma, na gĩkĩ nĩ kĩgongona gĩa kũrutagĩra magongona ma njino kĩa andũ a Isiraeli.”+
2 Daudi agĩcoka agĩathana akiuga atĩ andũ a kũngĩ+ arĩa maarĩ bũrũri-inĩ wa Isiraeli macokanĩrĩrio, na akĩmatua andũ a gwacũhia mahiga nĩguo marutage wĩra wa gwacũhia na gũconga mahiga ma gwaka nyũmba ya Ngai ũrĩa wa ma.+
3 Ningĩ Daudi akĩhaarĩria kĩgera kĩingĩ mũno gĩa gũthondeka mĩcumarĩ ya mĩrango ya ihingo na indo cia kũnyitithania, na gĩcango kĩingĩ mũno gĩtangĩthimĩka,+
4 o hamwe na mbaũ cia mũtarakwa+ itangĩtarĩka, nĩ gũkorũo Asidoni+ na Aturo+ nĩ maareheire Daudi mbaũ nyingĩ mũno cia mũtarakwa.
5 Na Daudi akiuga atĩrĩ: “Mũrũ wakwa Suleimani nĩ mũnini na ndarĩ na ũmenyeru,*+ na nyũmba ĩrĩa ĩgwakĩrũo Jehova ĩgũkorũo na riri mũnene mũno,+ ũũ atĩ ngumo yayo na ũthaka wayo+ ikaamenyeka mabũrũri-inĩ mothe.+ Nĩ ũndũ ũcio nĩ ngũhaarĩria maũndũ megiĩ mwako nĩ ũndũ wake.” Kwoguo Daudi akĩhaarĩria indo nyingĩ mũno cia mwako atanakua.
6 Makĩria ma ũguo, agĩta mũrũwe Suleimani na akĩmwĩra aake nyũmba ya Jehova Ngai wa Isiraeli.
7 Daudi akĩra mũrũwe Suleimani atĩrĩ: “Niĩ-rĩ, ngoro yakwa nĩ yerirĩirie gwaka nyũmba nĩ ũndũ wa rĩĩtwa rĩa Jehova Ngai wakwa.+
8 Ĩndĩ kiugo kĩa Jehova gĩkĩnginyĩra, akĩnjĩra atĩrĩ, ‘Nĩ ũitĩte thakame nyingĩ mũno, na nĩ ũrũĩte mbaara nyingĩ mũno. Ndũgwaka nyũmba nĩ ũndũ wa rĩĩtwa rĩakwa,+ nĩ gũkorũo nĩ ũitĩte thakame nyingĩ mũno thĩinĩ wa thĩ mbere yakwa.
9 Atĩrĩrĩ, nĩ ũkaagĩa mwana wa kahĩĩ+ na agaakorũo arĩ mũndũ wa thayũ,* na nĩ ngaamũhe ũhurũko kuuma harĩ thũ ciake ciothe iria igaakorũo imũthiũrũrũkĩirie,+ nĩ gũkorũo ageetwo Suleimani*+ na nĩ ngaahe Isiraeli thayũ na ũhooreru matukũ-inĩ make.+
10 Ũcio nĩwe ũgaaka nyũmba nĩ ũndũ wa rĩĩtwa rĩakwa.+ Agaatuĩka mũrũ wakwa na niĩ nduĩke ithe.+ Na nĩ ngaahanda gĩtĩ kĩa ũnene kĩa ũthamaki wake kĩrũme tene na tene thĩinĩ wa Isiraeli.’+
11 “Rĩu mũrũ wakwa-rĩ, Jehova arokorũo hamwe nawe, na ũrogaacĩra na wake nyũmba ya Jehova Ngai waku, o ta ũrĩa arĩtie ũhoro ũkwĩgiĩ.+
12 Jehova arokũhe ũũgĩ na ũtaũku+ hĩndĩ ĩrĩa agaakũhe wathani igũrũ rĩa Isiraeli, nĩgetha ũrũmagie watho wa Jehova Ngai waku.+
13 Na nĩ ũkaagaacĩra angĩkorũo nĩ ũrĩrũmagia na kinyi mawatho+ na matuĩro marĩa Jehova aathire Musa ahe Isiraeli.+ Gĩa na ũmĩrĩru na ũgĩe na hinya. Ndũgetigĩre kana ũmake.+
14 Nĩ ndĩtungumanĩtie mũno nĩ ũndũ wa nyũmba ya Jehova, ngahaarĩria taranda* 100,000 cia thahabu na taranda 1,000,000 cia betha o hamwe na gĩcango na kĩgera+ kĩingĩ mũno ũndũ itangĩthimĩka, na nĩ haarĩirie mbaũ na mahiga,+ ĩndĩ nĩ ũkuongerera ingĩ harĩ icio.
15 Ũrĩ na andũ aingĩ mũno a wĩra—andũ a gwacũhia mahiga, mabundi a mahiga,+ mabundi a mbaũ, na andũ arĩa marĩ na ũũgĩ wa mĩthemba yothe wa kũruta wĩra.+
16 Thahabu, betha, gĩcango, na kĩgera itingĩthimĩka.+ Arahũka wambĩrĩrie wĩra ũcio, na Jehova arokorũo hamwe nawe.”+
17 Daudi agĩcoka agĩatha anene othe a Isiraeli mateithie mũrũwe Suleimani akĩmeera ũũ:
18 “Na githĩ Jehova Ngai wanyu ndarĩ hamwe na inyuĩ, ningĩ githĩ ndamũheete ũhurũko mĩena yothe? Nĩ gũkorũo nĩ aaneanire aikari a bũrũri moko-inĩ makwa, na bũrũri ũyũ nĩ ũtooretio mbere ya Jehova na mbere ya andũ ake.
19 Rĩu tuai itua na ngoro yanyu yothe na muoyo* wanyu wothe rĩa gũcaria Jehova Ngai wanyu,+ na mwambĩrĩrie gwaka handũ harĩa hatheru ha Jehova Ngai ũrĩa wa ma,+ nĩgetha ithandũkũ rĩa kĩrĩkanĩro kĩa Jehova rĩrehwo o hamwe na indo iria nyamũre cia Ngai ũrĩa wa+ ma nyũmba-inĩ ĩrĩa yakĩtwo nĩ ũndũ wa rĩĩtwa rĩa Jehova.”+
Tũũhoro twa magũrũ-inĩ
^ Kana “ũhoti.”
^ Ũkk., “ũhurũko.”
^ Kuumana na kiugo gĩa Kĩhibirania kĩrĩa kiugĩte “Thayũ.”
^ Taranda ĩmwe yaiganaine na kilo 34.2. Rora Ũhoro Muongerere B14.
^ Kĩhibirania, ne′phesh. Rora Ũthathaũri wa Ciugo.
