Marũa ma Mbere Kũrĩ Akorintho 2:1-16
2 Nĩ ũndũ ũcio ariũ a Ithe witũ-rĩ, rĩrĩa ndokire kũrĩ inyuĩ kũmũhunjĩria ũhoro wa hitho ĩrĩa theru+ ya Ngai, ndiokire na ciugo kana ũũgĩ wa mwĩyonanio.+
2 Tondũ ndatuire itua rĩa kwaga kũmenya ũndũ o na ũmwe gatagatĩ-inĩ kanyu o tiga wĩgiĩ Jesu Kristo, na ũrĩa ooragĩirũo mũtĩ igũrũ.+
3 Na ndokire kũrĩ inyuĩ itarĩ na hinya na ndĩ na guoya na ngĩinainaga mũno;
4 na maũndũ marĩa ndaragia na marĩa ndahunjagia matiarĩ ma kũmũgucĩrĩria na ciugo cia ũũgĩ, ĩndĩ moonanagia hinya wa roho na ũhoti,+
5 nĩgetha wĩtĩkio wanyu ndũgakorũo wĩhocetie harĩ ũũgĩ wa andũ, ĩndĩ ũkorũo wĩhocetie harĩ hinya wa Ngai.
6 Rĩu-rĩ, twaragia maũndũ ma ũũgĩ harĩ andũ agima,+ no ti ũũgĩ wa mũtabarĩre ũyũ wa maũndũ* o na kana wa athani a mũtabarĩre ũyũ wa maũndũ, arĩa merekeire gũthira.+
7 Ĩndĩ twaragia ũhoro wĩgiĩ ũũgĩ wa Ngai ũrĩa ũrĩ hitho-inĩ theru,+ ũũgĩ ũrĩa mũhithe, o ũcio Ngai aatuĩte o mbere ya mĩtabarĩre ya maũndũ nĩguo tũgĩe na riri.
8 Ũcio nĩguo ũũgĩ ũrĩa gũtarĩ mũtongoria o na ũmwe wa mũtabarĩre ũyũ wa maũndũ* ũrĩ waũmenya,+ tondũ korũo nĩ maaũmenyete, matingĩoragire Mwathani ũrĩa ũrĩ riri.*
9 No rĩrĩ, o ta ũrĩa kwandĩkĩtwo: “Riitho rĩtirĩ rĩona nakuo gũtũ gũtirĩ kwaigua, o na gũtirĩ mũndũ ũrĩ wecirĩria ngoro-inĩ yake maũndũ marĩa Ngai ahaarĩirie nĩ ũndũ wa arĩa mamwendete.”+
10 Nĩ gũkorũo Ngai nĩ ithuĩ aguũrĩirie maũndũ macio+ kũgerera roho wake,+ tondũ roho nĩ ũthuthuragia maũndũ mothe, nginya maũndũ marĩa marikĩru ma Ngai.+
11 Tondũ rĩrĩ, nĩ mũndũ ũrĩkũ ũĩ maũndũ ma mũndũ tiga o roho wa mũndũ ũrĩa ũrĩ thĩinĩ wake? No taguo, gũtirĩ mũndũ ũrĩ wamenya maũndũ ma Ngai tiga o roho wa Ngai.
12 Ithuĩ-rĩ, tũtiamũkĩrire roho wa gũkũ thĩ, ĩndĩ twaamũkĩrire roho ũrĩa uumaga kũrĩ Ngai,+ nĩgetha tũmenyage maũndũ marĩa Ngai atũheete na ũtugi.
13 Ningĩ twaragia maũndũ macio, ti na ciugo iria tũrutĩtwo na ũũgĩ wa andũ,+ ĩndĩ nĩ na ciugo iria tũrutĩtwo nĩ roho,+ tũgataarĩria* maũndũ ma kĩĩroho na ciugo cia kĩĩroho.
14 No mũndũ wa kĩĩmwĩrĩ ndetĩkagĩra* maũndũ ma roho wa Ngai, tondũ makoragwo marĩ ũrimũ harĩ we; na ndangĩhota kũmamenya, tondũ mathuthuragio na njĩra ya kĩĩroho.
15 No rĩrĩ, mũndũ wa kĩĩroho athuthuragia maũndũ mothe,+ no we mwene ndathuthuragio nĩ mũndũ o na ũrĩkũ.
16 Tondũ rĩrĩ, “nũũ ũmenyete meciria ma Jehova,* atĩ nĩguo amũrute?”+ No ithuĩ tũrĩ na meciria ma Kristo.+
Tũũhoro twa magũrũ-inĩ
^ Kana “mahinda maya.” Rora Ũthathaũri wa Ciugo.
^ Kana “mahinda maya.” Rora Ũthathaũri wa Ciugo.
^ Kana “matingĩoragĩire Mwathani ũrĩa ũrĩ riri mũtĩ igũrũ.”
^ Kana “tũkanyitithania.”
^ Kana “ndamũkagĩra.”
^ Rora Ũhoro Muongerere A5.
