Marũa ma Mbere Kũrĩ Akorintho 3:1-23
3 Rĩu ariũ a Ithe witũ-rĩ, ndiahotaga kũmwarĩria ta andũ a kĩĩroho,+ no ndamwaragĩria ta andũ a kĩĩmwĩrĩ, o ta tũkenge+ thĩinĩ wa Kristo.
2 Ndamũheaga iria, no ti irio nyũmũ, tondũ mũtiarĩ na hinya wa kũigana. Na nginya o na rĩu, mũtirĩ mũragĩa na hinya wa kũigana,+
3 nĩ gũkorũo o na rĩu mũrĩ andũ a kĩĩmwĩrĩ.+ Tondũ gatagatĩ-inĩ kanyu kũrĩ na ũiru na ngũĩ-rĩ, githĩ mũtikĩrĩ andũ a kĩĩmwĩrĩ,+ na githĩ mũtiragĩthiĩ o ta andũ?
4 Nĩ gũkorũo rĩrĩa mũndũ ũmwe oiga, “niĩ ndĩ wa Paulo,” nake ũngĩ akoiga, “niĩ ndĩ wa Apolo,”+ githĩ mũtikoragwo mũgĩka o ta andũ arĩa angĩ?
5 Apolo akĩrĩ ũ? Nake Paulo-rĩ, nĩwe ũ? Acio nĩ ndungata+ iria ciamũteithirie gũtuĩka etĩkia, o ta ũrĩa Mwathani aaheire o mũndũ ũtungata.
6 Niĩ nĩ kũhanda ndahandire,+ Apolo agĩitĩrĩria maĩ,+ no Ngai nĩwe wakũragia,
7 kwoguo-rĩ, ũrĩa ũhandaga tiwe wa bata, o na kana ũrĩa ũitagĩrĩria maĩ, no Ngai, ũrĩa ũkũragia nĩwe wa bata.+
8 Rĩu-rĩ, ũrĩa ũhandaga na ũrĩa ũitagĩrĩria maĩ nĩ kĩndũ kĩmwe,* no o mũndũ akaamũkĩra kĩheo gĩake kũringana na wĩra wake mwene.+
9 Nĩ gũkorũo ithuĩ tũrĩ arutithania wĩra hamwe na Ngai. Inyuĩ mũrĩ mũgũnda wa Ngai ũrĩa ũrarĩmwo, mwako wa Ngai.+
10 Kũringana na ũtugi mũnene wa Ngai ũrĩa niĩ ndaheirũo-rĩ, ndakire mũthingi+ ta mwaki njorua ũrĩ na ũũgĩ,* no rĩu harĩ mũndũ ũngĩ ũraka igũrũ rĩa mũthingi ũcio. No rĩrĩ, o mũndũ nĩ aikare akĩroraga ũrĩa we mwene araka igũrũ rĩa mũthingi ũcio.
11 Tondũ gũtirĩ mũndũ ũngĩaka mũthingi ũngĩ o na ũrĩkũ tiga ũrĩa wakĩtwo, na nĩguo Jesu Kristo.+
12 Mũndũ o wothe angĩaka mũthingi-inĩ ũcio na thahabu, betha, mahiga ma goro, mbaũ, nyeki, kana mahuti momũ,
13 wĩra wa o mũndũ nĩ ũkooneka ũrĩa ũtariĩ,* tondũ mũthenya ũcio nĩ ũgaatũma woneke, nĩ gũkorũo nĩ ũkaaguũrio kũgerera mwaki,+ na mwaki ũcio nĩ ũkoonania nĩ wĩra wa mũthemba ũrĩkũ o mũndũ akĩte.
14 Wĩra ũrĩa mũndũ akĩte igũrũ rĩa mũthingi ũcio ũngĩgaatigara, nĩ akaamũkĩra kĩheo;
15 no wĩra wa mũndũ ũngĩkaahĩa, nĩ akoorũo nĩguo, no we mwene nĩ akaahonokio; ĩndĩ, kũngĩgaathiĩ ũguo, agaakorũo atariĩ ta mũndũ ũgereire mwaki-inĩ.
16 Kaĩ mũtoĩ atĩ inyuĩ ene mũrĩ hekarũ ya Ngai+ na atĩ roho wa Ngai ũkoragwo thĩinĩ wanyu?+
17 Mũndũ o wothe angĩananga hekarũ ya Ngai, Ngai nĩ akaamwananga; nĩ gũkorũo hekarũ ya Ngai nĩ theru, na nĩ inyuĩ hekarũ ĩyo.+
18 Mũndũ o na ũrĩkũ ndakeheenie: Angĩkorũo nĩ harĩ mũndũ o na ũmwe wanyu wĩciragia atĩ nĩ mũũgĩ thĩinĩ wa mũtabarĩre ũyũ wa maũndũ-rĩ,* nĩ atuĩke kĩrimũ, nĩgetha atuĩke mũũgĩ.
19 Tondũ ũũgĩ wa thĩ ĩno nĩ ũrimũ harĩ Ngai, nĩ gũkorũo nĩ kwandĩke ũũ: “Anyitaga arĩa ogĩ wara-inĩ wao.”+
20 Ningĩ nĩ kwandĩke atĩrĩ: “Jehova* nĩ oĩ atĩ mwĩcirĩrie wa andũ arĩa ogĩ nĩ wa tũhũ.”+
21 Hakĩrĩ ũguo-rĩ, mũndũ o na ũrĩkũ ndakanerahe nĩ ũndũ wa andũ; tondũ indo ciothe nĩ cianyu,
22 kana nĩ Paulo kana nĩ Apolo kana nĩ Kefa*+ kana nĩ thĩ ĩno kana nĩ muoyo kana nĩ gĩkuũ kana nĩ maũndũ marĩa marĩ kuo kana maũndũ marĩa magooka, indo ciothe nĩ cianyu;
23 na inyuĩ mũrĩ a Kristo;+ nake Kristo nĩ wa Ngai.
Tũũhoro twa magũrũ-inĩ
^ Kana “makoragwo na muoroto ũmwe.”
^ Kana “mũrũgamĩrĩri wĩra ũrĩ na ũũgĩ.”
^ Ũkk., “nĩ ũkaaguũrio.”
^ Kana “mahinda maya-rĩ.” Rora Ũthathaũri wa Ciugo.
^ Rora Ũhoro Muongerere A5.
^ Nowe wetagwo Petero.
