Athamaki wa Mbere 13:1-34
13 Mũndũ ũmwe wa Ngai nĩ ooimire Juda, kũgerera uuge wa Jehova,+ agĩthiĩ Betheli na hĩndĩ ĩyo Jeroboamu aarũgamĩte hakuhĩ na kĩgongona+ akĩruta ndogo ya igongona.
2 Agĩcoka akĩanĩrĩra na mũgambo mũnene kwerekera kĩgongona kĩu kũgerera uuge wa Jehova akiuga ũũ: “Wee kĩgongona gĩkĩ, kĩgongona gĩkĩ! Jehova oigĩte ũũ: ‘Atĩrĩrĩ, nyũmba-inĩ ya Daudi nĩ gũgaaciarũo mwana wa kahĩĩ ũgeetwo Josia!+ Nĩ akaarutĩra athĩnjĩri-ngai a kũndũ kũrĩa gũtũũgĩru igũrũ rĩaku marĩ igongona, acio marutaga ndogo ya igongona igũrũ rĩaku, na acinĩre mahĩndĩ ma andũ igũrũ rĩaku.’”+
3 Akĩheana kĩmenyithia mũthenya ũcio akiuga ũũ: “Gĩkĩ nĩkĩo kĩmenyithia kĩrĩa Jehova aheanĩte: Atĩrĩrĩ, kĩgongona gĩkĩ nĩ gĩgwatũkana, naguo mũhu* ũrĩa ũrĩ igũrũ wakĩo ũitĩke.”
4 Na rĩrĩa mũthamaki aaiguire ciugo iria mũndũ ũcio wa Ngai ũrĩa wa ma ooigire kwerekera kĩgongona kũu Betheli, Jeroboamu agĩtambũrũkia guoko gwake kuuma kĩgongona-inĩ kĩu akiuga atĩrĩ: “Mũnyitei!”+ O rĩo, guoko kũrĩa aatambũrũkĩtie kũmwerekera gũkĩũmagara,* na akĩremwo nĩ gũgũcokia.+
5 Nakĩo kĩgongona gĩgĩatũkana, na mũhu ũgĩitĩka kuuma kĩgongona-inĩ kĩu kũringana na kĩmenyithia kĩrĩa mũndũ ũcio wa Ngai ũrĩa wa ma aaheanire kũgerera uuge wa Jehova.
6 Mũthamaki agĩkĩra mũndũ ũcio wa Ngai ũrĩa wa ma atĩrĩ: “Ndagũthaitha ũũthaithanĩrĩre njĩtĩkĩrĩke nĩ* Jehova Ngai waku, na ũũhoere nĩguo honio guoko gwakwa.”+ Nĩ ũndũ ũcio mũndũ ũcio wa Ngai ũrĩa wa ma akĩmũthaithanĩrĩra etĩkĩrĩke nĩ Jehova, na guoko kwa mũthamaki gũkĩhonio gũgĩcoka ũrĩa kwarĩ.
7 Mũthamaki agĩcoka akĩra mũndũ ũcio wa Ngai ũrĩa wa ma ũũ: “Ũka tũthiĩ nawe mũciĩ ũrĩe irio, na ũreke ngũhe kĩheo.”
8 No mũndũ ũcio wa Ngai ũrĩa wa ma akĩra mũthamaki atĩrĩ: “O na ũngĩĩhe nuthu ya nyũmba yaku, tũtingĩthiĩ nawe na ndingĩrĩa mũgate kana nyue maĩ gũkũ.
9 Nĩ gũkorũo ũũ nĩguo njathĩtwo kũgerera uuge wa Jehova: ‘Ndwagĩrĩirũo kũrĩa mũgate kana kũnyua maĩ, na ndwagĩrĩirũo gũcoka ũgereire njĩra ĩrĩa ũũkĩire.’”
10 Nĩ ũndũ ũcio akiumagara agereire njĩra ĩngĩ, na ndaacokeire njĩra ĩrĩa aagereire agĩũka Betheli.
11 Na rĩrĩ, nĩ kwarĩ na mũnabii ũmwe mũkũrũ waikaraga Betheli, na ariũ ake makĩinũka mũciĩ na makĩmwĩra maũndũ mothe marĩa mũndũ ũcio wa Ngai ũrĩa wa ma eekĩte mũthenya ũcio kũu Betheli o hamwe na ciugo iria eerire mũthamaki. Marĩkia kwĩra ithe maũndũ macio,
12 ithe akĩmoria atĩrĩ: “Agereire njĩra ĩrĩkũ?” Ariũ ake magĩkĩmuonia njĩra ĩrĩa mũndũ ũcio wa Ngai ũrĩa wa ma wa kuuma Juda aagereire.
13 Akĩra ariũ ake ũũ: “Njarĩrai matandĩko ndigiri igũrũ.” Magĩkĩmwarĩra matandĩko ndigiri igũrũ, nake akĩmĩikarĩra.
14 Akĩrũmĩrĩra mũndũ ũcio wa Ngai ũrĩa wa ma na akĩmũkora aikarĩte thĩ rungu rwa mũtĩ mũnene. Akĩmũũria atĩrĩ: “Wee nĩwe mũndũ wa Ngai ũrĩa wa ma ũgũũkĩte kuuma Juda?”+ Nake akĩmũcokeria ũũ: “Ĩĩ nĩ niĩ.”
15 Akĩmwĩra ũũ: “Ũka tũthiĩ nawe mũciĩ ũkarĩe mũgate.”
16 No we akiuga atĩrĩ: “Ndingĩcoka nawe kana njĩtĩkĩre kũnyitwo ũgeni nĩwe, o na kana ndĩe mũgate kana nyue maĩ hamwe nawe gũkũ.
17 Nĩ gũkorũo njĩrĩtwo atĩrĩ kũgerera uuge wa Jehova, ‘Ndwagĩrĩirũo kũrĩa mũgate kana kũnyua maĩ kũu. Ndwagĩrĩirũo gũcoka ũgereire njĩra ĩrĩa ũũkĩire.’”
18 Aigua ũguo akĩmwĩra ũũ: “O na niĩ ndĩ mũnabii tawe, na mũraika anjĩrire atĩrĩ kũgerera uuge wa Jehova, ‘Mwĩre ahũndũke mũthiĩ nake gwaku mũciĩ nĩguo arĩe mũgate na anyue maĩ.’” (No nĩ kũmũheenia aamũheenirie.)
19 Nĩ ũndũ ũcio akĩhũndũka magĩthiĩ hamwe na mũnabii ũcio akarĩe mũgate na anyue maĩ gwake mũciĩ.
20 Na rĩrĩa maaikarĩte thĩ metha-inĩ, uuge wa Jehova ũgĩkinyĩra mũnabii ũcio wamũhũndũrĩte,
21 na akĩanĩrĩra na mũgambo mũnene akĩra mũndũ ũcio wa Ngai ũrĩa wa ma wa kuuma Juda atĩrĩ, “Jehova oigĩte ũũ: ‘Tondũ nĩ waremera watho wa Jehova waga kũrũmia rĩathani rĩrĩa Jehova Ngai waku akũheete,
22 no wacoka ũkarĩe mũgate na ũkanyue maĩ kũndũ kũrĩa wĩrĩtwo ũũ ũhoro-inĩ wakuo, “Ndwagĩrĩirũo kũrĩa mũgate kana kũnyua maĩ,” kĩimba gĩaku gĩtigũthikwo mbĩrĩra-inĩ ya maithe manyu ma tene.’”+
23 Mũndũ ũcio wa Ngai ũrĩa wa ma arĩkia kũrĩa mũgate na kũnyua, mũnabii ũcio mũkũrũ akĩigĩrĩra ndigiri matandĩko nĩ ũndũ wa mũnabii ũcio aahũndũrĩte.
24 Nake agĩĩthiĩra, ĩndĩ mũrũthi ũgĩcemania nake barabara-inĩ na ũkĩmũũraga.+ Kĩimba gĩake gĩaikĩtio barabara-inĩ, nayo ndigiri yarũgamĩte hakuhĩ nakĩo; o naguo mũrũthi ũcio warũgamĩte hakuhĩ na kĩimba kĩu.
25 Nĩ haarĩ na andũ maahĩtũkĩire hau na makĩona kĩimba kĩu gĩaikĩtio barabara-inĩ na mũrũthi ũcio ũrũgamĩte hakuhĩ na kĩimba kĩu. Magĩthiĩ makĩheana ũhoro ũcio itũũra-inĩ rĩrĩa mũnabii ũcio mũkũrũ aaikaraga.
26 Rĩrĩa mũnabii ũrĩa wamũhũndũrĩte kuuma barabara-inĩ aaiguire ũhoro ũcio, o rĩo akiuga ũũ: “Ũcio nĩ mũndũ wa Ngai ũrĩa wa ma ũrĩa ũremeire watho wa Jehova;+ nĩ ũndũ ũcio Jehova amũneana kũrĩ mũrũthi, nĩguo ũmũtharĩkĩre na ũmũũrage, kũringana na uuge wa Jehova ũrĩa aramwĩrĩte.”+
27 Agĩcoka akĩra ariũ ake ũũ: “Njarĩrai matandĩko ndigiri igũrũ.” Magĩkĩigĩrĩra ndigiri ĩyo matandĩko.
28 Nake akiumagara agĩthiĩ na agĩkora kĩimba kĩu gĩaikĩtio barabara-inĩ na ndigiri na mũrũthi irũgamĩte hakuhĩ nakĩo. Mũrũthi ũcio ndwarĩte kĩimba kĩu o na kana ũgatharĩkĩra ndigiri ĩyo.
29 Mũnabii ũcio akĩoya kĩimba kĩu kĩa mũndũ wa Ngai ũrĩa wa ma agĩkĩigĩrĩra ndigiri igũrũ, na agĩcoka nakĩo itũũra-inĩ rĩake nĩgetha amũcakaĩre na amũthike.
30 Agĩkĩhurũkia kĩimba kĩu mbĩrĩra-inĩ yake mwene, na magĩikara makĩmũrĩragĩra makiugaga ũũ: “Kaĩ nĩ ũũru-ĩ, mũrũ wa ithe witũ!”
31 Thutha wa kũmũthika, akĩra ariũ ake ũũ: “Rĩrĩa ngaakua, mwagĩrĩirũo gũgaathika harĩa mũndũ wa Ngai ũrĩa wa ma athikĩtwo. Mũkaaiga mahĩndĩ makwa hakuhĩ na mahĩndĩ make.+
32 Ũhoro ũrĩa ooigire kũgerera uuge wa Jehova kwerekera kĩgongona thĩinĩ wa Betheli na kwerekera nyũmba ciothe cia gũthathaĩria iria irĩ kũndũ kũrĩa gũtũũgĩru+ matũũra-inĩ ma Samaria no mũhaka ũkaahinga.”+
33 O na thutha wa maũndũ macio gwĩkĩka, Jeroboamu ndaigana kũgarũrũka atigane na mĩthiĩre yake mĩũru, no aathiire o na mbere gũthuura athĩnjĩri-ngai a gũtungataga kũndũ kũrĩa gũtũũgĩru kuuma kũrĩ andũ arĩa angĩ.+ Aathuuraga mũndũ o wothe ũngĩendire, akamũtua mũthĩnjĩri-ngai,* akoiga ũũ: “Nĩ atuĩke ũmwe wa athĩnjĩri-ngai a gũtungataga kũndũ kũrĩa gũtũũgĩru.”+
34 Mehia macio ma andũ a nyũmba ya Jeroboamu+ maatũmire maanangwo na maniinwo thĩinĩ wa thĩ.+
Tũũhoro twa magũrũ-inĩ
^ Kana “mũhu ũrĩ na maguta,” ũguo nĩ kuuga, mũhu ũtukanĩte na maguta ma indo iria irarutwo magongona.
^ Kana “gũkĩonja.”
^ Kana “wororoie ũthiũ wa.”
^ Ũkk., “akaiyũria guoko gwake.”
