Athamaki wa Mbere 17:1-24
17 Na rĩrĩ, Elija*+ Mũtishibi, mũikari wa Gileadi+ akĩra Ahabu ũũ: “O ta ũrĩa Jehova Ngai wa Isiraeli o we ũrĩa ndungatagĩra* atũũraga muoyo-rĩ, mĩaka-inĩ ĩno gũtigũkorũo na ime kana mbura o tiga kũgerera kiugo gĩakwa!”+
2 Kiugo kĩa Jehova gĩkĩmũkinyĩra, akĩrũo ũũ:
3 “Uma gũkũ, werekere mwena wa irathĩro na wĩhithe Mũkuru-inĩ wa Kerithu, mwena wa irathĩro wa Jorodani.
4 Ũrĩnyuaga maĩ kuuma karũũĩ-inĩ, na nĩ ngwatha mahuru makũrehagĩre irio kũu.”+
5 Agĩthiĩ o rĩo na agĩka kũringana na uuge wa Jehova; agĩthiĩ na agĩikara Mũkuru-inĩ wa Kerithu, mwena wa irathĩro wa Jorodani.
6 Na mahuru maamũrehagĩra mũgate na nyama rũcinĩ na mũgate na nyama hwaĩ-inĩ, na aanyuaga maĩ ma karũũĩ kau.+
7 No thutha wa matukũ maigana ũna, karũũĩ kau gakĩhũa,+ tondũ gũtiarĩ na mbura bũrũri-inĩ.
8 Kiugo kĩa Jehova gĩkĩmũkinyĩra:
9 “Ũkĩra ũthiĩ Zarefathu ĩrĩa ya Sidoni, na ũikare kũu. Atĩrĩrĩ, nĩ ngwatha mũtumia wa ndigwa kuo akũheage irio.”+
10 Nĩ ũndũ ũcio agĩũkĩra na agĩthiĩ Zarefathu. Rĩrĩa aakinyire itonyero-inĩ rĩa itũũra, akĩona mũtumia wa ndigwa akĩũngania tũkũ. Kwoguo akĩmwĩta na akĩmwĩra ũũ: “Ndagũthaitha ndehera tũmaĩ na gĩkombe nyue.”+
11 Na rĩrĩa aathiaga kũmũrehera maĩ, Elija akĩmwĩta akĩmwĩra ũũ: “Ndagũthaitha ndehera kĩenyũ kĩa mũgate ũnyitĩte na guoko.”
12 Nake akĩmũcokeria ũũ: “O ta ũrĩa Jehova Ngai waku atũũraga muoyo, ndirĩ na mũgate, no ngundi ya mũtu ĩrĩ ndigithũ-inĩ nene na tũguta tũnini tũrĩ ndigithũ-inĩ nini.+ Rĩu ndĩracokanĩrĩria tũkũ tũnini, njoke thiĩ ngaruge kĩndũ nĩ ũndũ wakwa na mũrũ wakwa. Na twarĩa, thutha ũcio no gũkua tũgũkua.”
13 Elija akĩmwĩra atĩrĩ: “Ndũgetigĩre. Thiĩ mũciĩ wĩke o ta ũguo woiga. No wambe ũndugĩre kamũgate kanini ga gĩthiũrũrĩ kuumana na kĩrĩa kĩ ho, ũcoke ũndehere. Thutha ũcio no ũruge kĩndũ nĩ ũndũ waku na mũrũguo.
14 Nĩ gũkorũo ũũ nĩguo Jehova Ngai wa Isiraeli oigĩte: ‘Ndigithũ ĩyo nene ya mũtu ndĩrĩ hĩndĩ ĩgaathira mũtu, nayo ndigithũ ĩyo nini ya maguta ndĩrĩ hĩndĩ ĩkaaniara maguta o nginya mũthenya ũrĩa Jehova akoiria mbura gũkũ thĩ.’”+
15 Mũtumia ũcio agĩgĩthiĩ na agĩka o ta ũrĩa Elija aamwĩrire, na we hamwe na Elija na andũ a nyũmba yake magĩkorũo marĩ na irio cia kũrĩa matukũ maingĩ.+
16 Ndigithũ ĩyo nene ya mũtu ndĩigana gũthira mũtu, nayo ndigithũ ĩyo nini ya maguta ndĩigana kũniara maguta, kũringana na uuge wa Jehova ũrĩa aarĩtie kũgerera Elija.
17 Thutha wa maũndũ macio, mũrũ wa mũtumia ũcio mwene mũciĩ akĩrwara, na mũrimũ ũcio wake ũkĩĩha mũno nginya agĩtiga kũhuhia.+
18 Mũtumia ũcio akĩũria Elija ũũ: “Nĩ ũndũ ũrĩkũ ũrĩ naguo na niĩ,* wee mũndũ ũyũ wa Ngai ũrĩa wa ma? Kaĩ ũũkĩte kũndirikania mahĩtia makwa na kũũraga mũrũ wakwa?”+
19 No Elija akĩmwĩra atĩrĩ: “Nengera mũrũguo.” Na akĩmuoya kuuma moko-inĩ ma nyina na akĩmũkuua akĩambata nake kanyũmba-inĩ ka igũrũ, kũrĩa aaikaraga, na akĩmũkomia ũrĩrĩ-inĩ wake mwene.+
20 Agĩkaĩra Jehova akiuga ũũ: “Wee Jehova Ngai wakwa,+ kaĩ nginya mũtumia ũyũ wa ndigwa ndĩraikara nake o nake ũramũrehera ũũru na njĩra ya kũũraga mũrũwe?”
21 Agĩcoka agĩĩtambũrũkia igũrũ rĩa mwana ũcio maita matatũ na agĩkaĩra Jehova akiuga ũũ: “Wee Jehova Ngai wakwa, ndagũthaitha reke muoyo* wa mwana ũyũ ũmũcokerere.”
22 Jehova agĩgĩthikĩrĩria ihoya rĩa Elija,+ na muoyo* wa mwana ũcio ũkĩmũcokerera, na akĩarahũka.*+
23 Elija akĩoya mwana ũcio na akĩmũikũrũkia kuuma kanyũmba-inĩ ka igũrũ akĩmũtwara nyũmba na akĩmũnengera nyina; na Elija akiuga ũũ: “Ta rora, mũrũguo arĩ muoyo.”+
24 Nĩ ũndũ ũcio mũtumia ũcio akĩra Elija atĩrĩ: “Rĩu nĩ ndamenya atĩ kũna wee ũrĩ mũndũ wa Ngai+ na kiugo kĩa Jehova kĩrĩa kĩrĩ kanua-inĩ gaku nĩ kĩa ma.”
Tũũhoro twa magũrũ-inĩ
^ Rĩĩtwa rĩu riugĩte “Ngai Wakwa nĩ Jehova.”
^ Ũkk., “ndũgamaga mbere yake.”
^ Kana “Ndĩ na ũhoro ũrĩkũ nawe, . . .?”
^ Kĩhibirania, ne′phesh. Rora Ũthathaũri wa Ciugo.
^ Kĩhibirania, ne′phesh. Rora Ũthathaũri wa Ciugo.
^ Kana “agĩcoka muoyo.”
