Athamaki wa Mbere 4:1-34
4 Mũthamaki Suleimani agĩgĩthamaka Isiraeli guothe.+
2 Aya nĩo anene arĩa maarĩ rungu rwake: Azaria mũrũ wa Zadoku+ nĩwe warĩ mũthĩnjĩri-Ngai;
3 Elihorefu na Ahija ariũ a Shisha maarĩ aandĩki;+ Jehoshafatu+ mũrũ wa Ahiludu nĩwe warĩ mũigi wa rekondi;
4 Benaia+ mũrũ wa Jehoiada aarĩ mũrũgamĩrĩri wa mbũtũ; Zadoku na Abiatharu+ maarĩ athĩnjĩri-Ngai;
5 Azaria mũrũ wa Nathani+ aarĩ mũrũgamĩrĩri wa anene; Zabudi mũrũ wa Nathani aarĩ mũthĩnjĩri-Ngai na mũrata wa mũthamaki;+
6 Ahisharu aarũgamagĩrĩra nyũmba ya mũthamaki; nake Adoniramu+ mũrũ wa Abada aarũgamagĩrĩra arĩa maathĩtwo marutage wĩra mũritũ.+
7 Suleimani aarĩ na anene 12 arĩa maarũgamagĩrĩra andũ othe a Isiraeli na nĩo maaheaga mũthamaki hamwe na andũ a nyũmba yake irio. O mũndũ aaheetwo wĩra wa kũheanaga irio mweri ũmwe harĩ mwaka.+
8 Maya nĩmo maarĩ marĩĩtwa mao: Mũrũ wa Huri, gĩcigo kĩrĩa kĩrĩ irĩma kĩa Efiraimu;
9 mũrũ wa Dekeri, gĩcigo kĩa Makazu, Shaalibimu,+ Bethi-shemeshi, na Eloni-bethi-hanani;
10 mũrũ wa Hesedi, gĩcigo kĩa Arubothu (aarũgamagĩrĩra Soko na gĩcigo gĩothe kĩa Heferi);
11 mũrũ wa Abinadabu, iharũrũka ciothe cia Doru (akĩhikia Tafathu mwarĩ wa Suleimani);
12 Baana mũrũ wa Ahiludu, gĩcigo gĩa Taanaka, Megido,+ na Bethi-sheani+ guothe, kũrĩa kũrigainie na Zarethani mũhuro wa Jezireeli, kuuma Bethi-sheani gũthiĩ Abeli-mehola o nginya gĩcigo-inĩ kĩa Jokimeamu;+
13 mũrũ wa Geberi, gĩcigo kĩa Ramothu-gileadi+ (aarũgamagĩrĩra icagi cia hema cia Jairu+ mũrũ wa Manase, iria irĩ Gileadi;+ ningĩ nĩ aarũgamagĩrĩra gĩcigo kĩa Arigobu,+ kĩrĩa kĩrĩ Bashani:+ matũũra 60 manene mairigĩre na thingo na mĩgamba ya gĩcango);
14 Ahinadabu mũrũ wa Ido, gĩcigo kĩa Mahanaimu;+
15 Ahimaazu, gĩcigo kĩa Nafitali (agĩkĩoya Basemathu mwarĩ ũngĩ wa Suleimani, akĩmũhikia);
16 Baana mũrũ wa Hushai, gĩcigo kĩa Asheri na Bealothu;
17 Jehoshafatu mũrũ wa Parua, gĩcigo kĩa Isakaru;
18 Shimei+ mũrũ wa Ela, gĩcigo kĩa Benjamini;+
19 Geberi mũrũ wa Uri, bũrũri wa Gileadi,+ bũrũri wa Sihoni+ mũthamaki wa Aamori na wa Ogu+ mũthamaki wa Bashani. Ningĩ nĩ kwarĩ na mũnene ũmwe ũrĩa warũgamagĩrĩra anene acio angĩ othe a bũrũri.
20 Juda na Isiraeli maarĩ aingĩ mũno o ta mũthanga ũrĩa ũkoragwo hakuhĩ na iria;+ maarĩaga na makanyua na magacanjamũka.+
21 Suleimani aathamakagĩra mothamaki mothe kuuma Rũũĩ-inĩ*+ gũthiĩ bũrũri-inĩ wa Afilisti na gũthiĩ nginya mũhaka-inĩ wa Misiri. Nĩ maarehaga irĩhi rĩa igooti na maatungatĩire Suleimani matukũ mothe ma ũtũũro wake.+
22 Irio cia Suleimani cia o mũthenya ciarĩ mũtu mũhinyu ithimi 30 cia kori* na mũtu ithimi 60 cia kori,
23 ng’ombe 10 norie, ng’ombe 20 cia kũrĩithio, na ng’ondu 100, o hamwe na thwariga, thiya, thuni, na nyoni norie.
24 Nĩ gũkorũo nĩwe wathamakagĩra indo ciothe mwena ũyũ wa Rũũĩ,*+ kuuma Tifisa gũthiĩ nginya Gaza,+ o hamwe na athamaki othe a mwena ũyũ wa Rũũĩ; na aakenagĩra thayũ icigo-inĩ ciothe iria ciamũthiũrũrũkĩirie mĩena yothe.+
25 Juda na Isiraeli maatũũraga marĩ na ũgitĩri, o mũndũ rungu rwa mũthabibũ wake na rungu rwa mũkũyũ wake, kuuma Dani nginya Biri-shiba, matukũ-inĩ mothe ma Suleimani.
26 Na Suleimani aarĩ na ciugũ 4,000* cia mbarathi nĩ ũndũ wa ngaari cia gũkururio na mbarathi* 12,000.+
27 Anene acio maaheaga Mũthamaki Suleimani irio o hamwe na arĩa othe maarĩagĩra metha-inĩ ya Mũthamaki Suleimani. O mũndũ aarutaga wĩra ũcio mweri wake na aatigagĩrĩra atĩ gũtirĩ kĩndũ kĩraga.+
28 Maarehaga nginya cairi na nyeki kũrĩa guothe ciabataranagia nĩ ũndũ wa mbarathi na nĩ ũndũ wa ikundi cia mbarathi, o mũndũ kũringana na ũrĩa aathĩtwo.
29 Na Ngai agĩkĩhe Suleimani ũũgĩ na ũtaũku na gĩkĩro kĩnene mũno na wariĩ wa ngoro* o ta mũthanga ũrĩa ũkoragwo hũgũrũrũ-inĩ cia iria.+
30 Ũũgĩ wa Suleimani wakĩrĩte ũũgĩ wa andũ othe a mwena wa Irathĩro na ũũgĩ wothe wa Misiri.+
31 Aarĩ mũũgĩ gũkĩra mũndũ ũngĩ o wothe, aarĩ mũũgĩ gũkĩra Ethani+ ũrĩa Mũezara na Hemani,+ Kalikoli,+ na Darida, ariũ a Maholu; ngumo yake yatheremire gatagatĩ-inĩ ka ndũrĩrĩ iria ciothe ciathiũrũrũkĩirie kũu.+
32 Aatungire* thimo 3,000+ na nyĩmbo ciake+ ciarĩ 1,005.
33 Aaragĩrĩria ũhoro wĩgiĩ mĩtĩ, kuuma mĩtarakwa ya Lebanoni o nginya mũthobi+ ũrĩa ũkũraga rũthingo-inĩ; akarĩrĩria ũhoro wĩgiĩ nyamũ,+ nyoni,*+ ciũmbe iria itambaga thĩ,*+ na thamaki.
34 Andũ kuuma ndũrĩrĩ ciothe nĩ mookaga kũigua ũũgĩ wa Suleimani, nginya athamaki kuuma thĩ yothe arĩa maaiguĩte ũhoro wĩgiĩ ũũgĩ wake.+
Tũũhoro twa magũrũ-inĩ
^ Nĩ Rũũĩ rwa Farati.
^ Kori ĩmwe yaiganaine na lita 220. Rora Ũhoro Muongerere B14.
^ Nĩ mwena wa ithũĩro wa Rũũĩ rwa Farati.
^ Mũigana ũcio ũkoragwo maandĩko-inĩ mamwe ma tene o hamwe na mũhari-inĩ ũngĩ warĩrĩirie ũhoro ũcio. Maandĩko mangĩ ma tene moigaga 40,000.
^ Kana “atwarithia a mbarathi.”
^ Kana “ngoro ĩrĩ na ũtaũku.”
^ Kana “Aaririe.”
^ Kana “ciũmbe iria ciũmbũkaga.”
^ Hihi nginya ciũmbe ta njagathi na tũtambi.
