Athamaki wa Mbere 9:1-28
9 Na rĩrĩ, rĩrĩa Suleimani aarĩkirie gwaka nyũmba ya Jehova, nyũmba ya mũthamaki,+ na kĩrĩa gĩothe Suleimani eerirĩirie gwaka,+
2 Jehova akiumĩrĩra Suleimani riita rĩa kerĩ, o ta ũrĩa aamumĩrĩire arĩ Gibeoni.+
3 Jehova akĩmwĩra atĩrĩ: “Nĩ njiguĩte mahoya maku na ihoya rĩaku rĩa gwĩtĩkĩrĩka rĩrĩa ũhoete ũrĩ mbere yakwa. Nĩ nyamũrĩte nyũmba ĩno wakĩte na njĩra ya kũiga rĩĩtwa rĩakwa rĩtũũre kuo,+ namo maitho makwa na ngoro yakwa irĩkoragwo kuo hingo ciothe.+
4 Nawe-rĩ, angĩkorũo nĩ ũrĩthiaga mbere yakwa ta ũrĩa thoguo Daudi aathiaga,+ ũrĩ na wĩkindĩru wa ngoro+ na ũrũngĩrĩru,+ na njĩra ya gwĩka ũrĩa wothe ngwathĩte,+ na wathĩkagĩre mawatho makwa na matuĩro makwa,+
5 nĩ ngũhanda gĩtĩ kĩa ũnene kĩa ũthamaki waku igũrũ rĩa Isiraeli tene na tene, o ta ũrĩa nderĩire thoguo Daudi ngiuga ũũ, ‘Gũtirĩ hĩndĩ gũkaaga mũndũ wa kuuma rũciaro-inĩ rwaku ũikarĩire gĩtĩ kĩa ũnene kĩa Isiraeli.’+
6 No wee na ariũ aku mũngĩgarũrũka mũtige kũnũmagĩrĩra na mwage kũrũmagia maathani makwa na mawatho makwa marĩa njigĩte mbere yanyu, na mũthiĩ mũtungatĩre ngai ingĩ na mũcinamĩrĩre,+
7 nĩ ngeeheria Isiraeli kuuma bũrũri ũrĩa ndĩmaheete,+ nayo nyũmba ĩno nyamũrĩte nĩ ũndũ wa rĩĩtwa rĩakwa ndĩmĩeherie mbere ya maitho makwa,+ na andũ a Isiraeli magaatuĩka kĩndũ gĩa kũnyararũo* na manyũrũrio gatagatĩ-inĩ ka ikundi ciothe cia andũ.+
8 Na nyũmba ĩno ĩgaatuĩka hĩba cia mwanangĩko.+ Mũndũ wothe ũkaahĩtũkagĩra hakuhĩ nayo akaamĩroraga agegete na akahuuha mĩrũri akoiga atĩrĩ, ‘Nĩ kĩĩ gĩatũmire Jehova eke bũrũri ũyũ na nyũmba ĩno ũũ?’+
9 Ningĩ macoke moige ũũ, ‘Nĩ tondũ nĩ maatiganĩirie Jehova Ngai wao, ũrĩa warutire maithe mao ma tene bũrũri-inĩ wa Misiri, na makĩhĩmbĩria ngai ingĩ na magĩcinamĩrĩra na magĩcitungatĩra. Nĩkĩo Jehova aamareheire mwanangĩko ũyũ wothe.’”+
10 Gũkinyĩria mũthia-inĩ wa mĩaka 20, ihinda-inĩ rĩrĩa Suleimani aakire nyũmba icio cierĩ, nyũmba ya Jehova na nyũmba ya mũthamaki,+
11 Hiramu+ mũthamaki wa Turo nĩ aaheete Suleimani mbaũ cia mũtarakwa na mbaũ cia mũthengera hamwe na thahabu nyingĩ mũno o ta ũrĩa eerirĩirie,+ nake Mũthamaki Suleimani akĩhe Hiramu matũũra 20 gĩcigo-inĩ kĩa Galili.
12 Nĩ ũndũ ũcio Hiramu akiuma Turo nĩgetha akone matũũra marĩa Suleimani aamũhete, no ndaakenirio nĩmo.*
13 Akĩũria ũũ: “Nĩ matũũra ma mũthemba ũrĩkũ maya wahe, mũrũ wa ithe witũ?” Nĩ ũndũ ũcio matũũra macio magĩtwo Bũrũri wa Kabuli* nginyagia ũmũthĩ.
14 Ihinda-inĩ o rĩu, Hiramu agĩtũmĩra mũthamaki taranda* 120 cia thahabu.+
15 Ũyũ nĩguo ũhoro wĩgiĩ andũ arĩa Mũthamaki Suleimani aathire marute wĩra mũritũ+ ũkonainie na gwaka nyũmba ya Jehova,+ nyũmba yake mwene,* Karĩma,*+ rũthingo rwa Jerusalemu, Hazoru,+ Megido,+ na Gezeri.+
16 (Firauni mũthamaki wa Misiri nĩ aambatĩte na agatunyana itũũra rĩa Gezeri na akarĩcina na mwaki, na ningĩ nĩ ooragĩte Akanaani+ arĩa maaikaraga itũũra-inĩ rĩu. Nĩ ũndũ ũcio akĩrĩheana kũrĩ mwarĩ,+ mũtumia wa Suleimani, rĩrĩ kĩheo gĩa gũtigana.)*
17 Suleimani agĩaka* Gezeri, Bethi-horoni ya Kĩanda,+
18 Baalathu,+ na Tamaru werũ-inĩ, o kũu bũrũri-inĩ,
19 o hamwe na matũũra mothe marĩa Suleimani aaigaga indo, matũũra ma ngaari cia mbarathi,+ matũũra ma atwarithia a mbarathi, na kĩrĩa gĩothe Suleimani eerirĩirie gwaka Jerusalemu, Lebanoni, na bũrũri-inĩ wothe kũrĩa aathanaga.
20 Nao andũ othe arĩa maatigarire kuuma harĩ Aamori, Ahiti, Aperizi, Ahivi, na Ajebusi,+ arĩa mataarĩ Aisiraeli,+
21 njiarũa ciao iria ciatigarire bũrũri-inĩ—iria Aisiraeli mataahotire kũniina—ciaathirũo nĩ Suleimani irutage wĩra mũritũ irĩ ngombo nginyagia ũmũthĩ.+
22 Ĩndĩ Suleimani ndaigana gũtua Mũisiraeli o na ũmwe ngombo,+ nĩ gũkorũo nĩo maarĩ njamba ciake cia ita, ndungata ciake, anene ake, atongoria ake a mbũtũ, na anene a atwarithia ake a ngaari cia mbarathi na atwarithia a mbarathi.
23 Kwarĩ na anene 550 a atongoria arĩa maarũgamagĩrĩra wĩra wa Suleimani, anyabara a kũrũgamĩrĩra andũ arĩa maarutaga wĩra.+
24 Nake mwarĩ wa Firauni+ akĩambata kuuma Itũũra-inĩ rĩa Daudi+ agĩthiĩ nyũmba-inĩ yake mwene ĩrĩa Suleimani aamwakĩire; Suleimani agĩcoka agĩaka Karĩma.*+
25 Suleimani aarutaga magongona ma njino na magongona ma ũiguano maita matatũ o mwaka+ kĩgongona-inĩ kĩrĩa aakĩire Jehova,+ ningĩ nĩ aarutagĩra ndogo ya magongona kĩgongona-inĩ kĩrĩa kĩarĩ mbere ya Jehova, Suleimani agĩkĩrĩkia nyũmba ĩyo.+
26 Ningĩ Mũthamaki Suleimani agĩthondeka gĩkundi kĩa meri kũu Ezioni-geberi,+ ĩrĩa ĩrĩ hakuhĩ na Elothu, rũteere-inĩ rwa Iria Itune bũrũri-inĩ wa Edomu.+
27 Hiramu agĩtũma ndungata ciake mwene na gĩkundi kĩu kĩa meri,+ o hamwe na aruti wĩra a meri arĩa maarĩ na ũmenyeru, magatungate hamwe na ndungata cia Suleimani.
28 Magĩthiĩ Ofiri+ na makĩruta kuo taranda 420 cia thahabu na magĩtwarĩra Mũthamaki Suleimani.
Tũũhoro twa magũrũ-inĩ
^ Ũkk., “thimo.”
^ Ũkk., “matiarĩ mega maitho-inĩ make.”
^ Kana hihi, “Bũrũri wa Tũhũ.”
^ Taranda ĩmwe yaiganaine na kilo 34.2. Rora Ũhoro Muongerere B14.
^ Kana “Milo.” Nĩ kiugo gĩa Kĩhibirania kiugĩte “iyũria.”
^ Kana “nyũmba ya mũthamaki.”
^ Kana “kĩheo kĩa ũhiki; rũracio.”
^ Kana “agĩĩkĩra hinya.”
^ Kana “Milo.” Nĩ kiugo gĩa Kĩhibirania kiugĩte “iyũria.”