Marũa ma Mbere ma Petero 1:1-25
1 Nĩ niĩ Petero, mũtũmwo+ wa Jesu Kristo, kũrĩ aikari a kahinda kanini arĩa mahurunjũkĩte Ponto, Galatia, Kapadokia,+ Asia, na Bithinia, kũrĩ arĩa athuure
2 kũringana na ũrĩa Ngai aamenyete o mbere, o we Ithe witũ,+ akamũtheria na roho,+ nĩguo mũtuĩke andũ athĩki na mũminjaminjĩrio thakame ya Jesu Kristo:+
Mũroingĩhĩrũo nĩ ũtugi mũnene na thayũ.
3 Ngai na Ithe wa Mwathani witũ Jesu Kristo arogoocwo, nĩ gũkorũo kũringana na tha ciake nyingĩ nĩ aatũmire tũciarũo rĩngĩ+ nĩguo tũgĩe na kĩĩrĩgĩrĩro kĩrĩ muoyo+ kũgerera ũriũkio wa Jesu Kristo kuuma kũrĩ arĩa akuũ,+
4 agĩtũhe igai rĩtangĩbutha na rĩtarĩ na thahu na rĩtangĩthira.+ Igai rĩu mũigĩirũo kũrĩa igũrũ,+
5 o inyuĩ mũragitĩrũo nĩ hinya wa Ngai kũgerera wĩtĩkio nĩ ũndũ wa ũhonokio ũrĩa ũkaaguũrio mahinda-inĩ ma mũico.
6 Ũndũ ũcio nĩ ũtũmĩte mũgĩe na gĩkeno kĩnene, o na gũtuĩka gwa kahinda kanini, angĩkorũo no mũhaka, nĩ mũtangĩkĩte nĩ ũndũ wa magerio matiganĩte,+
7 nĩguo wĩtĩkio wanyu ũrĩa ũgeretio,+ o ũcio wa goro gũkĩra thahabu ĩrĩa ĩthiraga o na gũtuĩka ĩkoragwo ĩgeretio* na mwaki, ũgaakorũo ũrĩ gĩtũmi gĩa kũgaathĩrĩrio na kũheo riri na gĩtĩo hĩndĩ ya kũguũrio kwa Jesu Kristo.+
8 O na gũtuĩka mũtiamuonire-rĩ, nĩ mũmwendete. O na gũtuĩka rĩu mũtiramuona, no muonanagia wĩtĩkio harĩ we, na nĩ mũkenaga mũno mũrĩ na gĩkeno kĩrĩ na riri gĩtangĩtaarĩrio ũhoro wakĩo,
9 mũgĩkinyagĩra muoroto wa wĩtĩkio wanyu, na nĩguo ũhonokio wanyu.*+
10 Ũhoro-inĩ wĩgiĩ ũhonokio ũcio, anabii arĩa maarathire igũrũ rĩa ũtugi mũnene ũrĩa mũngĩkaamũkĩra, nĩ maatuĩririe na kĩyo na magĩthuthuria na kinyi.+
11 Magĩthiĩ na mbere gũthuthuria mamenye nĩ ihinda rĩrĩkũ kũna kana nĩ hĩndĩ ĩrĩkũ roho ũrĩa warĩ thĩinĩ wao woonanagia ũhoro-inĩ wĩgiĩ Kristo+ ũkĩruta ũira o mbere ũkoniĩ maũndũ marĩa Kristo angĩkanyamarĩka+ na riri ũrĩa ũngĩkaarũmĩrĩra.
12 Nĩ maaguũrĩirio atĩ ti o ene meetungatagĩra, no nĩ inyuĩ maatungatagĩra ũhoro-inĩ ũkoniĩ maũndũ marĩa rĩu mũmenyithĩtio nĩ arĩa maamũhunjĩirie ũhoro ũrĩa mwega marĩ na roho mũtheru ũtũmĩtwo kuuma igũrũ.+ Araika nĩ meriragĩria gũcũthĩrĩria thĩinĩ wa maũndũ macio.
13 Hakĩrĩ ũguo-rĩ, mwĩhotorei meciria manyu nĩ ũndũ wa wĩra;+ tũũriai biũ ũhoti wanyu wa gwĩciria;+ igagai kĩĩrĩgĩrĩro kĩanyu harĩ ũtugi mũnene ũrĩa mũkaareherũo hĩndĩ ya kũguũrio kwa Jesu Kristo.
14 Ta ciana njathĩki-rĩ, tigai gwĩkaga kũringana na* merirĩria marĩa mwarĩ namo hau kabere rĩrĩa mũtaarĩ na ũmenyo,
15 no o ta Ũrĩa Mũtheru o ũcio wamwĩtire, tuĩkai atheru inyuĩ ene mĩthiĩre-inĩ yanyu yothe,+
16 tondũ nĩ kwandĩke ũũ: “No mũhaka mũkorũo mũrĩ atheru, tondũ niĩ ndĩ mũtheru.”+
17 Na angĩkorũo nĩ mũkayagĩra Ithe witũ ũcio ũtuanagĩra atarĩ na mũthutũkanio+ kũringana na ciĩko cia o mũndũ, ikaragai mũmwĩtigĩrĩte+ ihinda-inĩ rĩrĩa mũgũkorũo mũrĩ aikari a kahinda kanini.
18 Nĩ gũkorũo nĩ mũĩ atĩ ti kũgerera indo iria ithũkaga, ta betha kana thahabu mwohorirũo*+ kuuma mũtũũrĩre-inĩ wanyu wa tũhũ ũrĩa mwatigĩirũo nĩ maithe manyu ma tene.*
19 No nĩ kũgerera thakame ya goro,+ o ta ya gatũrũme gatarĩ na kaũgũ kana kameni,+ ĩrĩa ya Kristo.+
20 Nĩ ma, ũcio nĩ ooĩkaine o tene mbere ya kĩambĩrĩria gĩa thĩ,+ no aaguũririo mũthia-inĩ wa mahinda nĩ ũndũ wanyu.+
21 Kũgerera harĩ we inyuĩ nĩ mwĩtĩkĩtie Ngai,+ o ũcio wamũriũkirie kuuma kũrĩ arĩa akuũ+ na akĩmũhe riri,+ nĩguo wĩtĩkio na kĩĩrĩgĩrĩro kĩanyu ikorũo harĩ Ngai.
22 Tondũ rĩu nĩ mwĩtheretie kũgerera wathĩki wanyu harĩ ũhoro wa ma mũkagĩa na wendo ta wa andũ a nyina ũmwe+ mũtarĩ na ũhinga-rĩ, endanagai biũ inyuĩ ene kuuma ngoro.+
23 Nĩ gũkorũo nĩ mũciarĩtwo rĩngĩ,+ na ti kuumana na mbeũ ĩrĩa ĩngĩbutha no nĩ kuumana na mbeũ ĩrĩa ĩtangĩbutha,*+ kũgerera kiugo kĩa Ngai ũrĩa ũrĩ muoyo na ũtũũraga tene na tene.+
24 Tondũ “andũ othe mahaana* ta nyeki, na riri wao wothe ũhaana ta ihũa rĩa mũgũnda; nyeki nĩ ĩhoohaga, na ihũa rĩkoma,
25 no uuge wa* Jehova* ũtũũraga tene na tene.”+ Na “uuge” ũcio nĩguo* ũhoro mwega ũrĩa mwahunjĩirio.+
Tũũhoro twa magũrũ-inĩ
^ Kana “ĩtheretio.”
^ Kana “ũhonokio wa mĩoyo yanyu.”
^ Kana “kũrũmagĩrĩra.”
^ Ũkk., “mwakũũrirũo.”
^ Kana “kũgerera kĩrĩra.”
^ Ũguo nĩ kuuga, mbeũ ĩngĩhota gũciara, kana kũruta maciaro.
^ Ũkk., “mĩĩrĩ yothe ya nyama ĩhaana.”
^ Kana “kiugo kĩa.”
^ Rora Ũhoro Muongerere A5.
^ Kana “kiugo kĩu nĩkĩo.”
