Samueli wa Mbere 11:1-15
11 Thutha ũcio Nahashu Mũamoni+ akĩambata na akĩamba hema nĩguo atharĩkĩre Jabeshi+ kũu Gileadi. Arũme othe a Jabeshi makĩra Nahashu ũũ: “Thondeka kĩrĩkanĩro* hamwe na ithuĩ, na nĩ tũgũgũtungatĩra.”
2 Nake Nahashu ũcio Mũamoni akĩmeera atĩrĩ: “Nĩ ngũthondeka kĩrĩkanĩro hamwe na inyuĩ angĩkorũo nĩ mũgwĩka ũndũ ũyũ: inyuothe mũkũũrũo riitho rĩa mwena wa ũrĩo. Ngwĩka ũguo nĩguo nyararithie andũ othe a Isiraeli.”
3 Athuri* a Jabeshi makĩmũcokeria atĩrĩ: “Tũhe ihinda rĩa thikũ mũgwanja nĩguo tũtũme atũmwo gĩcigo-inĩ gĩothe kĩa Isiraeli. Thutha ũcio, kũngĩaga mũndũ wa gũtũhonokia, nĩ tũkwĩneana kũrĩ wee.”
4 Thutha wa ihinda atũmwo magĩkinya Gibea+ ya Saulu na makĩheana ũhoro ũcio andũ mathikĩrĩirie, nao andũ acio othe makĩrĩra na kayũ kanene.
5 Na rĩrĩ, Saulu nĩ kuuma ooimaga werũ-inĩ arĩ thutha wa rũũru rwa ng’ombe, Saulu agĩkĩũria atĩrĩ: “Nĩ kĩĩ andũ meka? Mararĩra nĩkĩ?” Magĩkĩmwĩra ciugo ciothe cia arũme acio a Jabeshi.
6 Roho wa Ngai ũgĩtũma Saulu agĩe na hinya+ aigua ciugo icio, na agĩcinwo nĩ marakara.
7 Nĩ ũndũ ũcio akĩoya ndegwa igĩrĩ agĩcitinangia icunjĩ, agĩcoka agĩtũma atũmwo macitware gĩcigo-inĩ gĩothe kĩa Isiraeli, na moige ũũ: “Ũrĩa wothe ũtekũrũmĩrĩra Saulu na Samueli amenye ũũ nĩguo ng’ombe ciake igwĩkwo!” Nao andũ magĩĩtigĩra Jehova, na nĩ ũndũ ũcio makĩĩyumĩria marĩ kĩndũ kĩmwe.*
8 Agĩcoka akĩmatara marĩ Bezeki, na maarĩ Aisiraeli 300,000 na arũme 30,000 a Juda.
9 Magĩcoka makĩra atũmwo acio mookĩte atĩrĩ: “Ũũ nĩguo mwagĩrĩirũo kwĩra arũme a Jabeshi kũu Gileadi, ‘Rũciũ rĩrĩa riũa rĩgaakorũo rĩhiũhĩte-rĩ, nĩ mũkaahonokio.’” Kwoguo atũmwo acio magĩthiĩ makĩra arũme a Jabeshi ũguo, nao magĩkena mũno.
10 Nĩ ũndũ ũcio arũme a Jabeshi makiuga atĩrĩ: “Rũciũ nĩ tũkeeneana kũrĩ inyuĩ, na no mũtwĩke ũrĩa mũkoona arĩ wega.”+
11 Mũthenya ũrĩa warũmĩrĩire, Saulu akĩgayania andũ ikundi ithatũ, na magĩthiĩ o nginya gatagatĩ ga kambĩ hĩndĩ ya ituanĩra rĩa rũcinĩ* na makĩũraga Aamoni+ nginya mũthenya riũa rĩahiũha. Nao arĩa maahonokire makĩhurunjũka, ũũ atĩ gũtirĩ andũ erĩ maatigĩtwo marĩ hamwe.
12 Andũ magĩcoka makĩra Samueli ũũ: “Nĩa mooragia atĩrĩ, ‘Rĩu Saulu nĩwe ũgũtuĩka mũthamaki wa gũtũthamakĩra?’+ Tũnengere arũme acio nĩguo tũmorage.”
13 No Saulu akiuga atĩrĩ: “Gũtirĩ mũndũ o na ũmwe wagĩrĩire kũũragwo mũthenya ũyũ wa ũmũthĩ,+ nĩ gũkorũo ũmũthĩ Jehova nĩ ahonoketie Isiraeli.”
14 Thutha-inĩ Samueli akĩra andũ atĩrĩ: “Ũkai tũthiĩ Giligali+ tũgekĩre ũthamaki mũkonde.”+
15 Nĩ ũndũ ũcio andũ othe magĩthiĩ Giligali, na kũu Giligali magĩtua Saulu mũthamaki marĩ mbere ya Jehova. Magĩcoka makĩruta magongona ma ũiguano hau mbere ya Jehova,+ na Saulu na arũme othe a Isiraeli magĩkũngũĩra makenete mũno.+
Tũũhoro twa magũrũ-inĩ
^ Kana “ũiguano.”
^ Athuri arĩa meehokeirũo maũndũ.
^ Ũkk., “ta mũndũ ũmwe.”
^ Ũguo nĩ kuuga, ta thaa inyanya cia ũtukũ nginya thinacara cia rũcinĩ.
