Samueli wa Mbere 3:1-21
-
Samueli gwĩtwo atuĩke mũnabii (1-21)
3 Ihinda-inĩ rĩu, kamwana kau ti Samueli gaatungatagĩra+ Jehova karĩ mbere ya Eli, no kiugo kĩa Jehova gĩtiaiguĩkaga kaingĩ matukũ-inĩ macio; cioneki+ itiatheremete mũno.
2 Mũthenya ũmwe, Eli aakomete harĩa aamenyerete gũkoma, na maitho make nĩ maathirĩte hinya wa kuona; ndaahotaga kuona.+
3 Tawa wa Ngai+ ndwahoretio, na Samueli aakomete hekarũ-inĩ*+ ya Jehova, kũrĩa Ithandũkũ rĩa Ngai rĩarĩ.
4 Jehova agĩcoka agĩta Samueli. Nake agĩcokia ũũ: “Ĩ niĩ ũyũ haha.”
5 Agĩteng’era kũrĩ Eli akĩmwĩra atĩrĩ: “Ĩ niĩ ũyũ haha tondũ nĩ wanjĩta.” No we akĩmwĩra ũũ: “Niĩ ndiĩtanĩte. Coka ũgakome.” Agĩgĩthiĩ agĩkoma.
6 Jehova agĩtana o rĩngĩ: “Samueli!” Nĩ ũndũ ũcio Samueli agĩũkĩra agĩthiĩ kũrĩ Eli akĩmwĩra atĩrĩ: “Ĩ niĩ ũyũ haha tondũ nĩ wanjĩta.” No we akĩmwĩra: “Niĩ ndiĩtanĩte, mũrũ wakwa. Coka ũgakome.”
7 (Na rĩrĩ, Samueli ndaakoretwo amenyete Jehova, na kiugo kĩa Jehova gĩtiakoretwo kĩguũrĩtio harĩ we.)+
8 Jehova agĩgĩtana o rĩngĩ, riita rĩa gatatũ: “Samueli!” Nĩ ũndũ ũcio agĩũkĩra agĩthiĩ kũrĩ Eli akĩmwĩra atĩrĩ: “Ĩ niĩ ũyũ haha tondũ nĩ wanjĩta.”
Hĩndĩ ĩyo Eli akĩmenya atĩ nĩ Jehova wetaga kamwana kau.
9 Nĩ ũndũ ũcio Eli akĩra Samueli ũũ: “Thiĩ ũgakome, na angĩgwĩta rĩngĩ, wagĩrĩirũo kuuga atĩrĩ, ‘Jehova, aria, nĩ gũkorũo ndungata yaku nĩ ĩthikĩrĩirie.’” Samueli agĩgĩthiĩ na agĩkoma harĩa aakomaga.
10 Jehova agĩũka akĩrũgama hau, na agĩtana o ta maita macio mangĩ: “Samueli, Samueli!” Nĩ ũndũ ũcio Samueli akiuga atĩrĩ: “Aria, nĩ gũkorũo ndungata yaku nĩ ĩthikĩrĩirie.”
11 Jehova akĩra Samueli ũũ: “Atĩrĩrĩ, nĩ harĩ ũndũ ngwĩka thĩinĩ wa Isiraeli ũtũme matũ meerĩ ma mũndũ o wothe ũkũũigua mararakwo.+
12 Mũthenya ũcio nĩ ngaahingia ũrĩa wothe njugĩte ũkoniĩ Eli ũhoro-inĩ wĩgiĩ nyũmba yake, kuuma kĩambĩrĩria nginya mũico.+
13 No mũhaka ũmwĩre atĩ nĩ ngũrehera nyũmba yake ituĩro rĩa gũtũũra nĩ ũndũ wa mehia marĩa we oĩ ũhoro wamo,+ tondũ ariũ ake marumaga Ngai,+ no ndamarũithagia.+
14 Nĩkĩo ndĩhĩtĩte harĩ nyũmba ya Eli atĩ mehia ma nyũmba ya Eli matikaahumbĩrũo nĩ magongona kana maruta.”+
15 Samueli agĩgĩkoma o nginya rũcinĩ; agĩcoka akĩhingũra mĩrango ya nyũmba ya Jehova. Samueli nĩ eetigagĩra kwĩra Eli ũhoro wa kĩoneki kĩu.
16 No Eli agĩta Samueli: “Samueli, mũrũ wakwa!” Nake akĩmũcokeria atĩrĩ: “Ĩ niĩ ũyũ haha.”
17 Akĩmũũria ũũ: “Akũheire ndũmĩrĩri ĩrĩkũ? Ndagũthaitha ndũkahithe. Ngai arokũrũithia na agwĩke ũguo o na makĩria ũngĩĩhitha kiugo o na kĩmwe harĩ maũndũ marĩa mothe akwĩrire.”
18 Kwoguo Samueli akĩmwĩra maũndũ mothe, na ndaamũhithire ũndũ o na ũmwe. Eli agĩkiuga atĩrĩ: “Nĩ Jehova. Nĩ eke ũrĩa ekuona arĩ wega maitho-inĩ make.”
19 Samueli agĩthiĩ na mbere gũkũra, na Jehova aarĩ hamwe nake+ na ndaarekire kiugo o na kĩmwe harĩ maũndũ marĩa mothe ooigĩte kĩage kũhinga.*
20 Andũ othe a Isiraeli kuuma Dani nginya Biri-shiba makĩmenya atĩ Samueli nĩ aarĩkĩtie kwamũrũo atuĩke mũnabii wa Jehova.
21 Na Jehova agĩthiĩ na mbere kwĩguũria kũu Shilo, nĩ gũkorũo Jehova nĩ eemenyithanagia kũrĩ Samueli kũu Shilo kũgerera kiugo kĩa Jehova.+
