Samueli wa Mbere 4:1-22
4 Naguo uuge wa Samueli ũgĩkinyĩra andũ othe a Isiraeli.
Andũ a Isiraeli magĩgĩthiĩ gũtũngana na Afilisti mbaara-inĩ; makĩamba hema ciao hakuhĩ na Ebenezeri, nao Afilisti maambĩte hema ciao Afeku.
2 Afilisti makĩĩbanga marĩ mbũtũ nĩguo matũngane na andũ a Isiraeli, no mbaara ĩyo ĩgĩthiĩ ũũru na andũ a Isiraeli makĩhootwo nĩ Afilisti, arĩa mooragire arũme 4,000 werũ-inĩ arĩa maarĩ mbaara-inĩ ĩyo.
3 Rĩrĩa andũ acio maacokire kambĩ-inĩ, athuri* a Isiraeli makiuga atĩrĩ: “Nĩ kĩĩ gĩtũmire Jehova atũrekererie tũhootwo ũmũthĩ nĩ Afilisti?*+ Nĩ tũgĩrei ithandũkũ rĩa kĩrĩkanĩro kĩa Jehova kuuma Shilo,+ nĩguo rĩkorũo hamwe na ithuĩ rĩtũhonokie kuuma guoko-inĩ gwa thũ citũ.”
4 Kwoguo andũ acio magĩtũma arũme Shilo, na kuuma kũu magĩkuua ithandũkũ rĩa kĩrĩkanĩro kĩa Jehova mũnene wa ita, o we ũrĩa ũikarĩire gĩtĩ kĩa ũnene igũrũ rĩa* akerubi.+ O nao ariũ eerĩ a Eli, Hofini na Finehasi,+ maarĩ hau hamwe na ithandũkũ rĩa kĩrĩkanĩro kĩa Ngai ũrĩa wa ma.
5 Na rĩrĩa ithandũkũ rĩa kĩrĩkanĩro kĩa Jehova rĩakinyire kambĩ-inĩ, Aisiraeli othe makiugĩrĩria na mũgambo mũnene, nginya thĩ ĩkĩinaina.
6 Rĩrĩa Afilisti maaiguire mũgambo ũcio wa mbugĩrĩrio, makĩũria ũũ: “Mbugĩrĩrio ĩyo nene ĩrĩ kambĩ-inĩ ya Ahibirania nĩ ya kĩĩ?” Magĩcoka makĩmenya atĩ Ithandũkũ rĩa Jehova nĩ rĩũkĩte kambĩ-inĩ.
7 Afilisti makĩigua guoya, nĩ gũkorũo mooigire ũũ: “Ngai arĩ gũka kambĩ-inĩ!”+ Nĩ ũndũ ũcio makiuga atĩrĩ: “Kaĩ nĩ tũkuona ũũru-ĩ, nĩ gũkorũo gũtirĩ gwekĩka ũndũ ta ũyũ rĩngĩ!
8 Kaĩ nĩ tũkuona ũũru-ĩ! Nũũ ũgũtũhonokia kuuma guoko-inĩ kwa Ngai ũyũ ũrĩ hinya? Ũyũ nĩwe Ngai ũrĩa wahũũrire Misiri na njũragano cia mĩthemba yothe werũ-inĩ.+
9 Gĩai na ũmĩrĩru na mwĩke o ta arũme ki, inyuĩ Afilisti, nĩgetha mũtigatungatĩre Ahibirania o ta ũrĩa matũire mamũtungatĩire.+ Ĩkai o ta arũme ki, mũrũe!”
10 Nĩ ũndũ ũcio Afilisti makĩrũa na andũ a Isiraeli na makĩmahoota,+ na o mũndũ akĩũra agĩthiĩ hema-inĩ yake. Njũragano ĩyo yarĩ nene mũno; mwena wa Isiraeli kuoragirũo thigari 30,000 cia gũthiĩ na magũrũ.
11 Makĩria ma ũguo, Ithandũkũ rĩa Ngai rĩgĩtahwo, nao ariũ eerĩ a Eli, Hofini na Finehasi, magĩkua.+
12 Na mũndũ ũmwe wa Benjamini agĩteng’era oimĩte mbaara-inĩ agĩthiĩ agĩkinya Shilo mũthenya o ro ũcio nguo ciake irĩ ndembũre na arĩ na tĩri mũtwe.+
13 Rĩrĩa mũndũ ũcio aakinyire-rĩ, Eli aaikarĩte thĩ gĩtĩ-inĩ mũkĩra-inĩ wa njĩra acũthĩrĩirie, tondũ ngoro yake yainainaga kũinaina nĩ ũndũ wa Ithandũkũ rĩa Ngai ũrĩa wa ma.+ Mũndũ ũcio agĩkĩingĩra itũũra-inĩ kũheana ndũmĩrĩri ĩyo, narĩo itũũra rĩu rĩothe rĩkĩambĩrĩria kũrĩra.
14 Rĩrĩa Eli aaiguire mũgambo ũcio wa kĩrĩro, akĩũria atĩrĩ: “Mũgambo ũcio wa kĩrĩro nĩ wa kĩĩ?” Mũndũ o ũrĩa agĩteng’era agĩthiĩ agĩkinyĩria Eli ndũmĩrĩri ĩyo.
15 (Na rĩrĩ, Eli aarĩ na mĩaka 98, namo maitho make maaikaraga o marorete mbere, na ndaahotaga kuona.)+
16 Mũndũ ũcio agĩkĩra Eli atĩrĩ: “Niĩ nĩ niĩ njũkĩte kuuma mbaara-inĩ! Njũrire kuuma mbaara-inĩ o ũmũthĩ ũyũ.” Nĩ ũndũ ũcio akĩmũũria ũũ: “Gũthiire atĩa, mũrũ wakwa?”
17 Mũndũ ũcio wokire na ndũmĩrĩri ĩyo agĩkĩmwĩra atĩrĩ: “Isiraeli nĩ morĩire Afilisti, na andũ acio mahootwo biũ;+ o na ariũ aku eerĩ, Hofini na Finehasi, nĩ makuire,+ na Ithandũkũ rĩa Ngai ũrĩa wa ma rĩatahwo.”+
18 Na rĩrĩa aagwetire Ithandũkũ rĩa Ngai ũrĩa wa ma, Eli no kũgwa aagũire na ngara kuuma gĩtĩ-inĩ gĩake hakuhĩ na kĩhingo, ngingo yake ĩkiunĩka na agĩkua, tondũ aarĩ mũkũrũ na akaritũha. Aatiirĩrĩire Isiraeli mĩaka 40.
19 Mũtumia wa mũrũwe, nĩwe mũtumia wa Finehasi, aarĩ na nda na aarĩ hakuhĩ gũciara. Rĩrĩa aaiguire atĩ Ithandũkũ rĩa Ngai ũrĩa wa ma nĩ rĩtahe na atĩ ithe wa mũthuriwe hamwe na mũthuriwe nĩ makuĩte, akĩinamĩrĩra na o rĩmwe akĩambĩrĩria kũigua ruo rwa kũgĩa mwana na agĩciara.
20 Na rĩrĩa aakuaga, atumia arĩa maarũgamĩte hakuhĩ nake makĩmwĩra atĩrĩ: “Ndũgetigĩre, nĩ gũkorũo nĩ waciara mwana wa kahĩĩ.” No ndaacokirie ũndũ o na ndaatindanĩire na ũhoro ũcio.*
21 No agĩta kahĩĩ kau Ikabodu,*+ akiuga atĩrĩ: “Riri nĩ weherete Isiraeli ũgathiĩ ithamĩrio,”+ akĩaria ũhoro wĩgiĩ gũtahwo gwa Ithandũkũ rĩa Ngai ũrĩa wa ma na ũrĩa gwekĩkire harĩ ithe wa mũthuriwe hamwe na mũthuriwe.+
22 Akiuga ũũ: “Riri nĩ weherete Isiraeli ũgathiĩ ithamĩrio, tondũ Ithandũkũ rĩa Ngai ũrĩa wa ma nĩ rĩtahĩtwo.”+
Tũũhoro twa magũrũ-inĩ
^ Athuri arĩa meehokeirũo maũndũ.
^ Ũkk., “Nĩ kĩĩ gĩtũmĩte Jehova atũhoote ũmũthĩ kũgerera Afilisti?”
^ Kana hihi, “gatagatĩ-inĩ ka.”
^ Kana “ndaaigire ũndũ ũcio ngoro-inĩ yake.”
^ Rĩĩtwa rĩu riugĩte “Riri ũrĩ Kũ?”
