Marũa ma Mbere Kũrĩ Timotheo 5:1-25
5 Ndũkanakũũme mũthuri mũkũrũ.+ Handũ ha ũguo, mũthaithage ta arĩ thoguo, nao anake ta arĩ ariũ a nyũkwa,
2 nao atumia akũrũ ta arĩ maitũguo, nao airĩtu ta aarĩ a nyũkwa, ũrĩ na ũtheru wothe.
3 Rũmbũyagia* atumia arĩa a ndigwa kũna.*+
4 No mũtumia wa ndigwa angĩkorũo na ciana kana ciana cia ciana ciake, nĩ ciambe cionanie wĩrutĩri wacio harĩ Ngai irĩ o kwao mũciĩ,+ ikaheaga aciari na aciari a aciari a cio kĩrĩa kĩmagĩrĩire,+ tondũ ũndũ ũcio nĩ mwĩtĩkĩrĩku maitho-inĩ ma Ngai.+
5 Na rĩrĩ, mũtumia wa ndigwa kũna ũrĩa ũtigĩtwo atarĩ kĩndũ, aigaga kĩĩrĩgĩrĩro gĩake harĩ Ngai+ na agathiĩ na mbere gũthaithana na kũhoya ũtukũ na mũthenya.+
6 No ũrĩa wĩheanaga harĩ merirĩria ma mwĩrĩ nĩ mũkuũ o na arĩ muoyo.
7 Kwoguo thiĩ na mbere kũmahe motaaro* macio, nĩguo matigakorũo na ũcuke.
8 Hatarĩ nganja mũndũ o wothe angĩkorũo ndateithagia andũ ao, na makĩria arĩa a nyũmba yake mwene, nĩ akaanĩte wĩtĩkio na nĩ mũũru gũkĩra mũndũ ũtarĩ wĩtĩkio.+
9 Mũtumia wa ndigwa ũrĩa wagĩrĩire kwandĩkithio agĩrĩire gũkorũo atanyihĩirie ũkũrũ wa mĩaka 60, akorũo aarĩ mũtumia wa mũthuri ũmwe,
10 ũrĩ na ngumo ya gwĩkaga ciĩko njega,+ nĩ aarerire ciana,+ aarĩ mũnyitani ũgeni,+ nĩ aathambagia arĩa aamũre magũrũ,+ nĩ aateithagia arĩa marathĩnĩka,+ na nĩ eerutagĩra wĩra-inĩ o wothe mwega.
11 No rĩrĩ, ndũkandĩkithie atumia a ndigwa arĩa ethĩ, tondũ rĩrĩa merirĩria mao ma ngomanio moka gatagatĩ kao na Kristo, nĩ mendaga kũhika.
12 Na nĩ magaatuĩrũo nĩ gũkorũo nĩ matigĩte wĩtĩkio ũrĩa moonanagia mbere.*
13 Ningĩ nĩ makũragia mũtugo wa kwaga kũruta wĩra, makĩũrũraga kuuma nyũmba ĩmwe nginya ĩrĩa ĩngĩ; na to wĩra matarutaga, no ningĩ maheanaga mũcene, na makaingĩrĩra maũndũ ma andũ arĩa angĩ,+ makaaragia maũndũ matagĩrĩirũo kwaria.
14 Nĩ ũndũ ũcio-rĩ, ingĩenda atumia a ndigwa arĩa ethĩ mahike,+ magĩe ciana,+ marorage mĩciĩ yao, matikaheage mũkararia mweke wa gũcambia.
15 Ũrĩa kũrĩ nĩ atĩ, amwe nĩ marĩkĩtie kũgarũrũka makarũmĩrĩra Shaitani.
16 Mũtumia o wothe mwĩtĩkia angĩkorũo na atumia a ndigwa a mbarĩ ciao, nĩ amateithagie nĩguo kĩũngano gĩtikaritũhagĩrũo. Na hĩndĩ ĩyo no kĩhote gũteithia arĩa a ndigwa kũna.*+
17 Athuri arĩa marũgamagĩrĩra maũndũ na njĩra njega+ mabatiĩ kuonagwo magĩrĩire kũheo gĩtĩo maita merĩ,+ na makĩria arĩa merutanagĩria ũhoro-inĩ wĩgiĩ kwaria na kũrutana.+
18 Nĩ gũkorũo rĩandĩko riugĩte, “Ndũkanohe ndegwa kanua hĩndĩ ĩrĩa ĩrahũũra ngano,”+ ningĩ “Mũruti wĩra nĩ agĩrĩire mũcara wake.”+
19 Ndũkanetĩkĩre thitango ĩgiĩ mũthuri mũkũrũ* o tiga hagĩire na ũira wa andũ erĩ kana atatũ.+
20 Andũ arĩa mamenyerete kwĩhia-rĩ,+ makaanagie+ mbere ya andũ othe, nĩguo ũndũ ũcio ũtuĩkage mũkaana harĩ acio angĩ.*
21 Ndagwatha mbere ya Ngai na Kristo Jesu na araika arĩa athuure atĩ ũrũmagĩrĩre motaaro macio ũtarĩ na kĩmenyano kana mũthutũkanio.+
22 Ndũkanahĩkĩke kũigĩrĩra mũndũ o na ũrĩkũ moko;*+ o na kana ũnyitanĩre mehia-inĩ ma andũ angĩ; tũũra ũrĩ mũtheru.
23 Ndũgacoke kũnyua maĩ,* no nyuaga ndibei nini nĩ ũndũ wa nda yaku na nĩ ũndũ wa ũrĩa ũrwaraga kaingĩ.
24 Mehia ma andũ amwe nĩ mamenyekaga nĩ andũ othe, makamatongoria harĩ ituĩro o hĩndĩ ĩyo, no ma andũ angĩ macokaga kũmenyeka thutha-inĩ.+
25 O ũndũ ũmwe na ũguo, ciĩko njega imenyekaga nĩ andũ othe+ na iria itamenyekete itingĩtũũra irĩ hithe.+
Tũũhoro twa magũrũ-inĩ
^ Kana “Wĩcũranagie.”
^ Kana “Tĩaga.”
^ Kana “atumia a ndigwa arĩa marĩ na bata kũna”; ũguo nĩ kuuga, arĩa matarĩ na wa kũmateithia.
^ Kana “mawatho.”
^ Kana “kĩĩranĩro kĩao kĩa mbere.”
^ Kana “mũthuri wa kĩũngano.”
^ Ũkk., “nĩguo acio angĩ makoragwo na guoya.”
^ Ũguo nĩ kuuga, ndũkanahĩkĩke kwamũra mũndũ o na ũrĩkũ.
^ Kana “Tiga kũnyuaga o maĩ matheri.”
