Athamaki wa Kerĩ 10:1-36
10 Na rĩrĩ, Ahabu+ aarĩ na ariũ 70 thĩinĩ wa Samaria. Nĩ ũndũ ũcio Jehu akĩandĩka marũa na akĩmatũma Samaria, kũrĩ anene a Jezireeli, athuri,*+ na areri a ciana cia Ahabu,* akĩmeera ũũ:
2 “Marũa maya makĩmũkinyĩra, ariũ a mwathi wanyu megũkorũo hamwe na inyuĩ, o hamwe na ngaari cia mbaara, mbarathi, itũũra rĩrĩ na ũgitĩri, na matharaita.
3 Thuurai mũndũ ũrĩa mwega biũ na wagĩrĩire* mũno gatagatĩ-inĩ ka ariũ a mwathi wanyu na mũmũige gĩtĩ-inĩ kĩa ũnene gĩa ithe. Mũcoke mũrũĩrĩre nyũmba ya mwathi wanyu.”
4 No o magĩtoorio nĩ guoya makiuga ũũ: “Atĩrĩrĩ, angĩkorũo athamaki erĩ matinetiiria mbere yake-rĩ,+ ithuĩ tũngĩkĩhota atĩa gwĩtiiria?”
5 Nĩ ũndũ ũcio, mũrori wa nyũmba ya mũthamaki, ngavana wa itũũra, athuri, na areri acio magĩtũmĩra Jehu ndũmĩrĩri ĩno: “Ithuĩ tũrĩ ndungata ciaku na tũgwĩka ũrĩa wothe ũgũtwĩra twĩke. Gũtirĩ mũndũ o na ũmwe tũgũtua mũthamaki. Ĩka ũndũ ũrĩa ũkuona ũrĩ mwega maitho-inĩ maku.”
6 Nake akĩmatũmĩra marũa ma kerĩ, akĩmeera ũũ: “Angĩkorũo mũrĩ akwa na nĩ mwĩhaarĩirie kũnjathĩkĩra, rehei ciongo cia ariũ a mwathi wanyu na mũũke kũrĩ niĩ Jezireeli ihinda-inĩ o ta rĩrĩ rũciũ.”
Hĩndĩ ĩyo ariũ 70 a mũthamaki maarĩ hamwe na andũ arĩa atĩĩku a itũũra rĩu arĩa maamareraga.
7 Rĩrĩa marũa macio maamakinyĩire, makĩoya ariũ a mũthamaki na makĩmoraga, arũme 70,+ na magĩĩkĩra ciongo ciao ikabu-inĩ magĩcitũma kũrĩ we kũu Jezireeli.
8 Mũtũmwo agĩthiĩ kũrĩ we akĩmwĩra: “Nĩ marehe ciongo cia ariũ a mũthamaki.” Nake akiuga atĩrĩ: “Cigei hĩba igĩrĩ itonyero-inĩ rĩa kĩhingo gĩa itũũra o nginya rũcinĩ.”
9 Rĩrĩa ooimire nja rũcinĩ, akĩrũgama mbere ya andũ othe akiuga atĩrĩ: “Inyuĩ mũtirĩ na mahĩtia.* Nĩ niĩ ndĩrabangire njama ya gũũkĩrĩra mwathi wakwa na ndĩramũũraga,+ no rĩrĩ, nũũ ũroragire aya othe?
10 Kĩmenyei atĩ gũtirĩ kiugo o na kĩmwe kĩa Jehova kĩrĩa Jehova oigĩte kwerekera nyũmba ya Ahabu gĩtekũhinga,*+ na Jehova nĩ ekĩte ũrĩa ooigire kũgerera harĩ Elija ndungata yake.”+
11 Ningĩ Jehu akĩũraga arĩa othe maatigarĩte a nyũmba ya Ahabu kũu Jezireeli, o hamwe na andũ ake othe arĩa atĩĩku, arata ake, na athĩnjĩri-ngai ake,+ agĩtigĩrĩra atĩ gũtirĩ mũndũ o na ũmwe wake watigara.+
12 Agĩcoka agĩũkĩra na akiumagara erekeire Samaria. Nyũmba ya kũhingĩra ng’ondu* ya arĩithi yarĩ njĩra-inĩ.
13 Jehu agĩcemania na ariũ a ithe na Mũthamaki Ahazia+ wa Juda hau, akĩmoria atĩrĩ, “Inyuĩ nĩ inyuĩ a?” Nao makĩmwĩra: “Ithuĩ tũrĩ ariũ a ithe na Ahazia, na tũikũrũkĩte nĩguo tũkorie kana maũndũ mothe nĩ mega harĩ ariũ a mũthamaki na ariũ a nyina wa mũthamaki.”
14 O hĩndĩ ĩyo akiuga: “Manyitei marĩ muoyo!” Magĩkĩmanyita marĩ muoyo na makĩmoragĩra irima-inĩ rĩa maĩ rĩa nyũmba ĩyo ya kũhingĩra ng’ondu, arũme 42. Ndaarekire o na ũmwe wao ahonoke.+
15 Arĩ njĩra-inĩ oimĩte hau, agĩcemania na Jehonadabu+ mũrũ wa Rekabu,+ ũrĩa wokaga kũmũtũnga. Rĩrĩa aamũgeithirie,* akĩmũũria atĩrĩ: “Hihi ngoro yaku ĩrĩ hamwe na niĩ biũ,* o ta ũrĩa ngoro yakwa ĩrĩ hamwe na ngoro yaku?”
Jehonadabu akĩmũcokeria akiuga: “Ĩĩ ĩrĩ hamwe nawe.”
“Angĩkorũo nĩguo, rehe guoko gwaku.”
Nake akĩmũnengera guoko gwake, na Jehu akĩmũgucia na igũrũ aingĩre ngaari-inĩ ya mbarathi harĩ we.
16 Agĩcoka akĩmwĩra: “Nĩ tũthiĩ hamwe nawe, wone ũrĩa itakiragĩrĩria wagi wa wĩhokeku* harĩ Jehova.”+ Magĩkĩmũkuua na ngaari yake ya mbaara.
17 Agĩcoka agĩthiĩ Samaria, na akĩũraga andũ arĩa othe maatigarĩte a nyũmba ya Ahabu kũu Samaria nginya akĩmaniina,+ kũringana na kiugo kĩa Jehova kĩrĩa eerĩte Elija.+
18 Ningĩ Jehu agĩcokanĩrĩria andũ othe hamwe akĩmeera atĩrĩ: “Ahabu aathathayagia Baali o hanini,+ no Jehu ekũmũthathaiya o na makĩria.
19 Nĩ ũndũ ũcio ĩtai anabii othe a Baali,+ athathaiya ake othe, na athĩnjĩri-ngai ake othe+ moke kũrĩ niĩ. Mũtikareke o na ũmwe wao age, tondũ ndĩ na igongona inene rĩa Baali. Mũndũ wothe ũtegũkorũo kuo ndegũtũũra muoyo.” No Jehu aahũthagĩra wara nĩgetha anange athathaiya a Baali.
20 Ningĩ Jehu akiuga atĩrĩ: “Menyithaniai* kĩgomano gĩtheru kĩa Baali.” Nao magĩkĩmenyithania.
21 Thutha ũcio Jehu agĩtũmana kũndũ guothe thĩinĩ wa Isiraeli, na athathaiya othe a Baali magĩũka. Gũtirĩ o na ũmwe watigarire akĩaga gũka. Magĩkĩingĩra nyũmba* ya Baali,+ na nyũmba ĩyo ya Baali ĩkĩiyũra kuuma mũthia ũmwe nginya ũrĩa ũngĩ.
22 Nake akĩra ũrĩa warũgamagĩrĩra harĩa nguo ciaigagwo atĩrĩ: “Rehera athathaiya othe a Baali nguo.” Nake akĩmarehera nguo.
23 Na rĩrĩ, Jehu na Jehonadabu+ mũrũ wa Rekabu makĩingĩra nyũmba ĩyo ya Baali. Agĩkĩra athathaiya acio a Baali atĩrĩ: “Cariai biũ mũtigĩrĩre atĩ gũtirĩ athathaiya a Jehova gũkũ, o tiga athathaiya a Baali.”
24 Thutha-inĩ magĩthiĩ kũruta magongona o hamwe na magongona ma njino. Jehu nĩ aaigĩte arũme ake 80 kũu nja na akameera ũũ: “Mũndũ o wothe gatagatĩ-inĩ ka andũ arĩa ndĩraiga moko-inĩ manyu angĩũra, mũkũrĩha muoyo wake na muoyo wanyu.”
25 Rĩrĩa Jehu aarĩkirie kũruta igongona rĩa njino, akĩra arangĩri* na anene arĩa maamũteithagĩrĩria atĩrĩ: “Tonyai mũmorage! Mũtikareke o na ũmwe ethare!”+ Nĩ ũndũ ũcio arangĩri na anene acio maamũteithagĩrĩria makĩmoraga na rũhiũ rwa njora na makĩmaikia nja, magĩtonya nginya handũ harĩa hatheru* ha thĩinĩ ha nyũmba ya Baali.
26 Magĩcoka makĩruta itugĩ cia kũhoywo+ cia nyũmba ĩyo ya Baali na magĩcicina ciothe.+
27 Makĩmomora gĩtugĩ gĩa kũhoywo+ kĩa Baali, na makĩmomora nyũmba ya Baali+ makĩmĩtua cioro, na noguo ĩtũire nginya ũmũthĩ.
28 Na njĩra ĩyo Jehu akĩniina Baali thĩinĩ wa Isiraeli.
29 O na kũrĩ ũguo, Jehu ndaatiganire na mehia marĩa Jeroboamu mũrũ wa Nebati aatũmĩte Isiraeli mehie ũhoro-inĩ wĩgiĩ njaũ cia thahabu iria ciarĩ Betheli na thĩinĩ wa Dani.+
30 Nake Jehova akĩra Jehu atĩrĩ: “Tondũ nĩ wĩkĩte wega na ũgeka ũndũ ũrĩa mwagĩrĩru maitho-inĩ makwa na njĩra ya kũhingia maũndũ mothe marĩa maarĩ ngoro-inĩ yakwa ndabangĩte gwĩka nyũmba ya Ahabu-rĩ,+ njiarũa inya cia ariũ aku nĩ igaaikarĩra gĩtĩ kĩa ũnene kĩa Isiraeli.”+
31 No Jehu ndaigana kwĩmenyerera nĩguo arũmĩrĩre Watho wa Jehova Ngai wa Isiraeli na ngoro yake yothe.+ Ndaatiganire na mehia marĩa Jeroboamu aatũmĩte Isiraeli mehie.+
32 Matukũ-inĩ macio Jehova akĩambĩrĩria gũtinia* Isiraeli gĩcunjĩ gĩcunjĩ. Hazaeli agĩthiĩ na mbere kũmatharĩkĩra gĩcigo-inĩ gĩothe kĩa Isiraeli,+
33 kuuma Jorodani kwerekera mwena wa irathĩro, bũrũri wothe wa Gileadi—wa Agadi, Arubeni, na wa Amanase+—kuuma Aroeru, ĩrĩa ĩrĩ hakuhĩ na Mũkuru wa Arinoni, nginya Gileadi na Bashani.+
34 Na rĩrĩ, maũndũ macio mangĩ megiĩ Jehu, ũrĩa wothe eekire o na hinya wake wothe, na githĩ ti maandĩke ibuku-inĩ rĩa maũndũ ma mahinda ma athamaki a Isiraeli?
35 Thutha ũcio Jehu akĩhurũkio hamwe na maithe make ma tene, na makĩmũthika thĩinĩ wa Samaria; na mũrũwe Jehoahazu+ agĩtuĩka mũthamaki ithenya rĩake.
36 Ihinda rĩrĩa* Jehu aathanire Isiraeli nĩ mĩaka 28 thĩinĩ wa Samaria.
Tũũhoro twa magũrũ-inĩ
^ Ũkk., “areri a Ahabu.”
^ Athuri arĩa meehokeirũo maũndũ.
^ Kana “mũrũngĩrĩru.”
^ Kana “mũrĩ athingu.”
^ Ũkk., “gĩkũgwa thĩ.”
^ Kwahoteka nĩ harĩa ng’ondu ciahingagĩrũo nĩguo cienjwo guoya.
^ Kana “aamũrathimire.”
^ Ũkk., “nĩ nũngĩrĩru harĩ niĩ.”
^ Kana “wone kĩyo gĩakwa.”
^ Ũkk., “Amũrai.”
^ Kana “hekarũ.”
^ Ũkk., “ateng’eri.”
^ Ũkk., “itũũra,” hihi nĩ nyũmba ĩtariĩ ta handũ ha kwĩgitia.
^ Kana “kũnyihia.”
^ Ũkk., “Matukũ marĩa.”