Athamaki wa Kerĩ 11:1-21
11 Rĩrĩa Athalia,+ nyina wa Ahazia oonire atĩ mũrũwe nĩ akua,+ agĩũkĩra na akĩananga rũciaro ruothe rwa ũthamaki.*+
2 No rĩrĩ, Jehosheba mwarĩ wa Mũthamaki Jehoramu, ũrĩa warĩ mwarĩ wa nyina na Ahazia, akĩoya Jehoashu+ mũrũ wa Ahazia akĩmũiya kuuma gatagatĩ ka ariũ a mũthamaki arĩa maarĩ moragwo, akĩmũiga hamwe na mũreri wake rumu-inĩ ya thĩinĩ ya toro. Makĩhota kũmũhitha kuuma harĩ Athalia, kwoguo ndooragirũo.
3 Aaikarire nake mĩaka ĩtandatũ, ahithĩtwo nyũmba-inĩ ya Jehova, hĩndĩ ĩyo Athalia aathanaga bũrũri-inĩ ũcio.
4 Mwaka-inĩ wa mũgwanja, Jehoiada agĩtũmanĩra anene a andũ igana a arangĩri a Akaria na a arangĩri a nyũmba ya mũthamaki*+ na magĩthiĩ kũrĩ we nyũmba-inĩ ya Jehova. Akĩgĩa kĩrĩkanĩro hamwe nao na akĩmehĩtithia ũhoro-inĩ wĩgiĩ kĩrĩkanĩro kĩu nyũmba-inĩ ya Jehova, agĩcoka akĩmonia mũrũ wa mũthamaki.+
5 Akĩmaatha akĩmeera atĩrĩ: “Ũndũ ũyũ nĩguo mwagĩrĩirũo gwĩka: Gĩcunjĩ kĩmwe harĩ ithatũ gatagatĩ-inĩ kanyu gĩgaakorũo wĩra mũthenya wa Thabatũ na nĩ gĩkaarangĩra biũ nyũmba ya mũthamaki,+
6 gĩcunjĩ kĩngĩ kĩmwe harĩ ithatũ gĩgaakorũo Kĩhingo-inĩ kĩa Mũthingi na gĩcunjĩ kĩngĩ kĩmwe harĩ ithatũ gĩgaakorũo kĩhingo-inĩ kĩrĩa kĩrĩ thutha wa arangĩri a nyũmba ya mũthamaki. Mũgaaikara mũgĩcenjanagia mũkĩrangĩra nyũmba ĩyo.
7 Ikundi cianyu igĩrĩ iria itagĩrĩire gũkorũo wĩra mũthenya wa Thabatũ no mũhaka ikaarangĩra biũ nyũmba ya Jehova nĩguo igitĩre mũthamaki.
8 Mwagĩrĩirũo gũthiũrũrũkĩria mũthamaki na mĩena yothe, o mũndũ anyitĩte matharaita make na guoko. Mũndũ wothe ũkaaingĩra gatagatĩ-inĩ ga thigari nĩ akooragwo. Mwagĩrĩirũo gũikara na mũthamaki harĩa hothe athiĩ.”*
9 Anene acio a andũ igana+ magĩka o ta ũrĩa Jehoiada ũcio mũthĩnjĩri-Ngai aamaathĩte. O ũmwe wao akĩoya andũ ake arĩa maagĩrĩirũo kũruta wĩra mũthenya wa Thabatũ, o hamwe na arĩa mataagĩrĩirũo kũruta wĩra mũthenya wa Thabatũ, makĩingĩra kũrĩ Jehoiada ũcio mũthĩnjĩri-Ngai.+
10 Nake mũthĩnjĩri-Ngai akĩhe anene acio a andũ igana matimũ na ngo cia gĩthiũrũrĩ iria ciarĩ cia Mũthamaki Daudi, o icio ciarĩ nyũmba-inĩ ya Jehova.
11 Nao arangĩri a nyũmba ya mũthamaki+ makĩrũgama handũ hao, o ũmwe wao anyitĩte matharaita make na guoko, kuuma mwena wa ũrĩo wa nyũmba ĩyo nginya mwena wayo wa ũmotho, hakuhĩ na kĩgongona+ na hakuhĩ na nyũmba ĩyo, magĩthiũrũrũkĩria mũthamaki.
12 Jehoiada agĩcoka akĩruta mũrũ wa mũthamaki+ nja na akĩmũigĩrĩra thũmbĩ* na Ũira,*+ na makĩmũtua mũthamaki na makĩmũitĩrĩria maguta. Makĩambĩrĩria kũhũũra hĩ makiugaga atĩrĩ: “Mũthamaki arotũũra ihinda iraya!”+
13 Rĩrĩa Athalia aaiguire mũgambo wa andũ magĩteng’era, o rĩmwe agĩthiĩ kũrĩ andũ nyũmba-inĩ ya Jehova.+
14 Agĩcoka akĩona mũthamaki arũgamĩte hau hakuhĩ na gĩtugĩ kũringana na mũtugo.+ Anene na ahuuhi tũrumbeta+ maarĩ hamwe na mũthamaki, na andũ othe a bũrũri nĩ gũkena maakenaga makĩhuuhaga tũrumbeta. Athalia ona ũguo agĩtembũra nguo ciake na akĩanĩrĩra akiuga: “Ĩno nĩ njama! Ĩno nĩ njama!”
15 No Jehoiada ũcio mũthĩnjĩri-Ngai agĩatha anene a andũ igana,+ arĩa maathuurĩtwo matongorie mbũtũ, akĩmeera ũũ: “Mweheriei gatagatĩ-inĩ ga thigari, na mũndũ o wothe ũkũmũrũmĩrĩra, mũmũũrage na rũhiũ rwa njora!” Tondũ mũthĩnjĩri-Ngai nĩ ooigĩte atĩrĩ: “Mũtikamũũragĩre nyũmba-inĩ ya Jehova.”
16 Magĩkĩmũnyita, na rĩrĩa aakinyire harĩa mbarathi ciaingĩragĩra nyũmba ya mũthamaki,+ makĩmũũragĩra ho.
17 Nake Jehoiada agĩtũma kũgĩe kĩrĩkanĩro gatagatĩ ka Jehova na mũthamaki na andũ,+ atĩ nĩ mangĩathiire na mbere gũikara marĩ andũ a Jehova, ningĩ agĩtũma kũgĩe kĩrĩkanĩro gatagatĩ ka mũthamaki na andũ.+
18 Thutha ũcio andũ othe a bũrũri magĩthiĩ nyũmba-inĩ* ya Baali na makĩmomora igongona ciake,+ makĩhehenja mĩhianano yake biũ,+ na makĩũragĩra Matani mũthĩnjĩri-ngai wa Baali+ mbere ya igongona icio.
Mũthĩnjĩri-Ngai agĩcoka agĩthuura arori a kũrũgamĩrĩra nyũmba ya Jehova.+
19 Ningĩ akĩoya anene a andũ igana,+ arangĩri a Akaria, arangĩri a nyũmba ya mũthamaki,+ o hamwe na andũ othe a bũrũri nĩguo moimagarie mũthamaki maikũrũkĩte kuuma nyũmba-inĩ ya Jehova, na magĩkinya nyũmba-inĩ ya mũthamaki magereire kĩhingo kĩa arangĩri a nyũmba ya mũthamaki. Nake agĩikarĩra gĩtĩ kĩa ũnene kĩa athamaki.+
20 Nao andũ othe a bũrũri magĩkena na itũũra rĩu rĩkĩhoorera, nĩ gũkorũo nĩ mooragĩte Athalia na rũhiũ rwa njora kũu nyũmba-inĩ ya mũthamaki.
21 Jehoashu+ aarĩ na mĩaka mũgwanja rĩrĩa aatuĩkire mũthamaki.+
Tũũhoro twa magũrũ-inĩ
^ Ũkk., “mbeũ yothe ya ũthamaki.”
^ Ũkk., “a ateng’eri.”
^ Ũkk., “rĩrĩa oima nja na rĩrĩa aingĩra thĩinĩ.”
^ No kũhoteke nĩ gĩkũnjo kĩarĩ na Watho wa Ngai.
^ Kana “thũmbĩ ng’emie.”
^ Kana “hekarũ-inĩ.”
