Athamaki wa Kerĩ 12:1-21
12 Na rĩrĩ, mwaka-inĩ wa mũgwanja wa Jehu,+ Jehoashu+ agĩtuĩka mũthamaki na agĩathana mĩaka 40 thĩinĩ wa Jerusalemu. Nyina eetagwo Zibia wa kuuma Biri-shiba.+
2 Jehoashu agĩthiĩ na mbere gwĩka maũndũ marĩa maagĩrĩire maitho-inĩ ma Jehova matukũ-inĩ marĩa mothe Jehoiada ũrĩa mũthĩnjĩri-Ngai aamũtaaraga.
3 No rĩrĩ, kũndũ kũrĩa gũtũũgĩru+ gũtieheririo, na andũ no maathiaga na mbere kũrutĩra magongona na ndogo ya magongona kũndũ kũu gũtũũgĩru.
4 Nake Jehoashu akĩra athĩnjĩri-Ngai atĩrĩ: “Oyai mbeca ciothe iria irehagwo nyũmba-inĩ ya Jehova nĩ ũndũ wa magongona marĩa matheru,+ mbeca iria o mũndũ agĩrĩirũo nĩ kũruta,+ mbeca iria irutagwo irĩ thogora ũrĩa ũtuĩtwo wa mũndũ, na mbeca iria ciothe o mũndũ atindĩkagwo nĩ ngoro yake kũrehe nyũmba-inĩ ya Jehova.+
5 Athĩnjĩri-Ngai o ene nĩo marĩoyaga mbeca icio kuuma kũrĩ arĩa maciruta* na magacihũthĩra gũthondeka nyũmba, harĩa hothe honeka harĩ hathũku.”*+
6 Gũkinyĩria mwaka wa 23 wa Mũthamaki Jehoashu, athĩnjĩri-Ngai matiathondekete kũrĩa gwathũkangĩte nyũmba-inĩ ĩyo.+
7 Mũthamaki Jehoashu agĩgĩta Jehoiada+ ũcio mũthĩnjĩri-Ngai o hamwe na athĩnjĩri-Ngai acio angĩ akĩmeera atĩrĩ: “Nĩ kĩĩ kĩratũma mwage gũthondeka kũrĩa nyũmba ĩno ĩthũkangĩte? Nĩ ũndũ ũcio, mũtikoe mbeca ingĩ kuuma kũrĩ arĩa macirutaga o tiga akorirũo cikũhũthĩrũo gũthondeka nyũmba ĩno.”+
8 Nao athĩnjĩri-Ngai magĩtĩkĩra atĩ matikuoya mbeca ingĩ kuuma kũrĩ andũ na atĩ tio mekwĩhokerũo wĩra wa gũthondeka nyũmba ĩyo.
9 Nake Jehoiada ũcio mũthĩnjĩri-Ngai akĩoya ithandũkũ+ na agĩtũra irima gĩkunĩko-inĩ kĩarĩo na akĩrĩiga hakuhĩ na kĩgongona mwena wa ũrĩo mũndũ agĩtonya nyũmba-inĩ ya Jehova. Hau nĩho athĩnjĩri-Ngai arĩa maarĩ aikaria a mĩrango maaikagia mbeca iria ciothe ciarehagwo thĩinĩ wa nyũmba ya Jehova.+
10 Rĩrĩa rĩothe mona atĩ harĩ na mbeca nyingĩ ithandũkũ-inĩ, mwandĩki wa mũthamaki na mũthĩnjĩri-Ngai ũrĩa mũnene maathiaga magacokanĩrĩria* na magatara mbeca icio ciarehetwo nyũmba-inĩ ya Jehova.+
11 Maaneanaga mbeca iria ciatarũo kũrĩ arĩa maamũrĩtwo marũgamĩrĩre wĩra ũcio warutagwo nyũmba-inĩ ya Jehova. Nao magacoka makarĩha andũ arĩa maarutaga wĩra wa mbaũ na aaki arĩa maarutaga wĩra nyũmba-inĩ ya Jehova,+
12 o hamwe na mabundi a mahiga na arĩa maaicũhagia mahiga. Ningĩ nĩ maagũrire mbaũ na mahiga maicũhie ma gũthondeka kũrĩa gwathũkangĩte nyũmba-inĩ ya Jehova na makĩhũthĩra mbeca icio kũrũgamĩrĩra mahũthĩro macio mangĩ mothe ma gũthondeka nyũmba ĩyo.
13 O na kũrĩ ũguo, mbeca-inĩ iria ciarehirũo nyũmba-inĩ ya Jehova, gũtirĩ ciahũthĩrirũo gũthondeka iraĩ cia betha, magathĩ ma kũhoria ndambĩ, mbakũri, tũrumbeta,+ kana kĩndũ kĩa mũthemba o wothe gĩa thahabu kana kĩa betha kĩa nyũmba ya Jehova.+
14 Maacineaga o arĩa maarutaga wĩra ũcio, nao magacihũthĩra gũthondeka nyũmba ya Jehova.
15 Matiatuĩragia ũrĩa mbeca irahũthĩrũo kuuma kũrĩ andũ arĩa maanengeraga mbeca icio nĩguo ineo aruti wĩra, tondũ maarĩ ehokeku.+
16 No rĩrĩ, mbeca cia magongona ma mahĩtia+ na mbeca cia magongona ma mehia itiarehagwo nyũmba-inĩ ya Jehova; icio ciarĩ cia athĩnjĩri-Ngai.+
17 Hĩndĩ ĩyo nĩrĩo Hazaeli+ mũthamaki wa Siria aambatire nĩguo akarũe na itũũra rĩa Gathu,+ na akĩrĩtaha, thutha ũcio agĩtua itua rĩa gũtharĩkĩra Jerusalemu.*+
18 Nake Mũthamaki Jehoashu wa Juda akĩoya magongona mothe matheru marĩa maithe make ma tene Jehoshafatu, Jehoramu, na Ahazia, o acio maarĩ athamaki a Juda maamũrĩte, o hamwe na magongona make marĩa matheru na thahabu yothe ĩrĩa yarĩ igĩna-inĩ cia nyũmba ya Jehova na cia nyũmba ya mũthamaki, agĩcitũmanĩra Hazaeli mũthamaki wa Siria.+ Nake agĩtiga gũũkĩrĩra Jerusalemu.
19 Ha ũhoro wa maũndũ macio mangĩ megiĩ Jehoashu, ũrĩa wothe eekire, na githĩ ti maandĩke ibuku-inĩ rĩa maũndũ ma mahinda ma athamaki a Juda?
20 O na kũrĩ ũguo, ndungata ciake ikĩnyitanĩra harĩ njama ya kũmũũkĩrĩra+ na ikĩũragĩra Jehoashu nyũmba-inĩ ya Karĩma,*+ njĩra-inĩ ĩrĩa ĩikũrũkĩte gũthiĩ Sila.
21 Ndungata ciake Jozakaru mũrũ wa Shimeathu na Jehozabadu mũrũ wa Shomeri nĩo maamũtharĩkĩire na makĩmũũraga.+ Makĩmũthika hamwe na maithe make ma tene thĩinĩ wa Itũũra rĩa Daudi, na mũrũwe Amazia agĩtuĩka mũthamaki ithenya rĩake.+
Tũũhoro twa magũrũ-inĩ
^ Kana “arata.”
^ Kana “honeka harĩ na mĩatũka.”
^ Kana “magekĩra mĩhuko-inĩ.” Ũkk., “makoha.”
^ Ũkk., “Hazaeli akĩerekeria ũthiũ wake harĩ Jerusalemu nĩguo amĩũkĩrĩre.”
^ Kana “Bethi-milo.”