Athamaki wa Kerĩ 14:1-29
14 Mwaka-inĩ wa kerĩ wa Jehoashu+ mũrũ wa Jehoahazu mũthamaki wa Isiraeli, Amazia mũrũ wa Mũthamaki Jehoashu wa Juda nĩ aatuĩkire mũthamaki.
2 Aarĩ na mĩaka 25 rĩrĩa aatuĩkire mũthamaki, na agĩathana mĩaka 29 thĩinĩ wa Jerusalemu. Nyina eetagwo Jehoadini wa kuuma Jerusalemu.+
3 Nake agĩthiĩ na mbere gwĩka maũndũ marĩa magĩrĩire maitho-inĩ ma Jehova, no ti ta Daudi+ ithe wao wa tene. Eekire maũndũ mothe o ta ũrĩa ithe Jehoashu eekĩte.+
4 No rĩrĩ, kũndũ kũrĩa gũtũũgĩru gũtieheririo,+ na andũ no maathiaga na mbere kũrutĩra magongona na ndogo ya magongona kũndũ kũu gũtũũgĩru.+
5 Rĩrĩa ũthamaki warũmire moko-inĩ make, akĩũraga ndungata ciake iria cioragĩte ithe, o ũcio warĩ mũthamaki.+
6 Ĩndĩ ndooragire ariũ a oragani acio, kũringana na rĩathani rĩrĩ rĩa Jehova rĩrĩa rĩandĩkĩtwo ibuku-inĩ rĩa Watho wa Musa: “Maithe matiagĩrĩire kũũragwo nĩ ũndũ wa ariũ ao, na ariũ matiagĩrĩire kũũragwo nĩ ũndũ wa maithe mao; no o mũndũ agĩrĩire kũũragwo nĩ ũndũ wa mehia make we mwene.”+
7 Ooragire Aedomu+ Mũkuru-inĩ wa Cumbĩ,+ andũ 10,000, na agĩtaha itũũra rĩa Sela mbaara-inĩ,+ na rĩĩtwa rĩarĩo rĩgĩtuĩka Jokitheeli nginya ũmũthĩ ũyũ.
8 Amazia agĩcoka agĩtũma atũmwo kũrĩ Jehoashu mũrũ wa Jehoahazu mũrũ wa Jehu mũthamaki wa Isiraeli, akĩmwĩra atĩrĩ: “Ũka tũng’ethanĩre mbaara-inĩ.”*+
9 Nake Mũthamaki Jehoashu wa Isiraeli agĩtũmana ndũmĩrĩri ĩno kũrĩ Mũthamaki Amazia wa Juda: “Ria rĩrĩa rĩrĩ mĩigua kũu Lebanoni nĩ rĩatũmanire ndũmĩrĩri kũrĩ mũtarakwa kũu Lebanoni rĩkiuga, ‘Heana mwarĩ waku atuĩke mũtumia wa mũrũ wakwa.’ No rĩrĩ, nyamũ ya gĩthaka ya Lebanoni ĩkĩhĩtũkĩra hau na ĩkĩrangĩrĩria ria rĩu rĩarĩ na mĩigua.
10 Nĩ ma nĩ ũhũũrĩte Edomu,+ nĩkĩo ngoro yaku ĩgĩĩte na mwĩtĩo. Kenera riri waku, ĩndĩ ũikare nyũmba-inĩ yaku mwene.* Nĩ kĩĩ gĩgũtũma wĩrehere thĩna ũcoke ũgwe, na ũtũme Juda ĩgwe hamwe nawe?”
11 No Amazia ndaigana gũthikĩrĩria.+
Nĩ ũndũ ũcio Mũthamaki Jehoashu wa Isiraeli akĩambata, na we hamwe na Mũthamaki Amazia wa Juda makĩng’ethanĩra mbaara-inĩ kũu Bethi-shemeshi+ ya Juda.+
12 Juda ĩkĩhootwo nĩ Isiraeli, nĩ ũndũ ũcio o ũmwe wao akĩũra agĩthiĩ gwake mũciĩ.*
13 Mũthamaki Jehoashu wa Isiraeli agĩkĩnyita Mũthamaki Amazia wa Juda, mũrũ wa Jehoashu mũrũ wa Ahazia, kũu Bethi-shemeshi. Magĩcoka magĩthiĩ Jerusalemu, na agĩthondeka mwanya rũthingo-inĩ rwa Jerusalemu kuuma Kĩhingo-inĩ kĩa Efiraimu+ nginya Kĩhingo-inĩ gĩa Kona,+ mĩkono 400.*
14 Akĩoya thahabu yothe o na betha na indo ciothe iria ciarĩ nyũmba-inĩ ya Jehova na igĩna-inĩ cia nyũmba ya mũthamaki, na akĩnyita andũ mĩgwate. Thutha ũcio agĩcoka Samaria.
15 Ha ũhoro wa maũndũ macio mangĩ megiĩ Jehoashu, ũrĩa eekire o na hinya wake na ũrĩa aarũire na Mũthamaki Amazia wa Juda, na githĩ ti maandĩke ibuku-inĩ rĩa maũndũ ma mahinda ma athamaki a Isiraeli?
16 Thutha ũcio Jehoashu akĩhurũkio hamwe na maithe make ma tene na agĩthikwo thĩinĩ wa Samaria+ hamwe na athamaki a Isiraeli; na mũrũwe Jeroboamu*+ agĩtuĩka mũthamaki ithenya rĩake.
17 Amazia+ mũrũ wa Jehoashu mũthamaki wa Juda agĩtũũra mĩaka 15 thutha wa gĩkuũ kĩa Jehoashu+ mũrũ wa Jehoahazu mũthamaki wa Isiraeli.+
18 Ha ũhoro wa maũndũ macio mangĩ megiĩ Amazia, na githĩ ti maandĩke ibuku-inĩ rĩa maũndũ ma mahinda ma athamaki a Juda?
19 Thutha ũcio gũkĩbangwo njama ya kũmũũkĩrĩra+ kũu Jerusalemu, nake akĩũra agĩthiĩ Lakishi, no magĩtũma andũ mamũrũmĩrĩre nginya Lakishi na makĩmũũragĩra kuo.
20 Magĩkĩmũkuua na mbarathi makĩmũcokia, na agĩthikwo Jerusalemu hamwe na maithe make ma tene Itũũra-inĩ rĩa Daudi.+
21 Nao andũ othe a Juda makĩoya Azaria,*+ ũrĩa warĩ na mĩaka 16,+ makĩmũtua mũthamaki ithenya rĩa ithe Amazia.+
22 Nĩ aakire itũũra rĩa Elathu+ rĩngĩ na akĩrĩcokia Juda thutha wa mũthamaki* kũhurũkio hamwe na maithe make ma tene.+
23 Mwaka-inĩ wa 15 wa Amazia mũrũ wa Jehoashu mũthamaki wa Juda, Jeroboamu+ mũrũ wa Mũthamaki Jehoashu wa Isiraeli nĩ aatuĩkire mũthamaki thĩinĩ wa Samaria, na agĩathana mĩaka 41.
24 Nake agĩthiĩ na mbere gwĩka maũndũ moru maitho-inĩ ma Jehova. Ndaatiganire na mehia mothe marĩa Jeroboamu mũrũ wa Nebati aatũmĩte Isiraeli mehie.+
25 Nĩ aacokirie mũhaka wa Isiraeli kuuma Lebo-hamathu*+ o nginya Iria rĩa Araba,*+ kũringana na kiugo kĩrĩa Jehova Ngai wa Isiraeli ooigĩte kũgerera ndungata yake Jona+ mũrũ wa Amitai, mũnabii wa kuuma Gathu-heferi.+
26 Tondũ Jehova nĩ oonete mĩnyamaro mĩnene ya Isiraeli.+ Gũtirĩ mũndũ watigarĩte ũngĩateithirie Isiraeli, o na arĩa matarĩ na ũteithio kana arĩa matarĩ hinya.
27 No Jehova nĩ eeranĩire atĩ ndangĩkaaniina rĩĩtwa rĩa Isiraeli mũhuro wa riũa.+ Kwoguo akĩmahonokia kũgerera guoko kwa Jeroboamu mũrũ wa Jehoashu.+
28 Ha ũhoro wa maũndũ macio mangĩ megiĩ Jeroboamu, ũrĩa wothe eekire o na hinya wake, ũrĩa aarũire na ũrĩa aacokirie Dameski+ na Hamathu+ kũrĩ Juda thĩinĩ wa Isiraeli, na githĩ ti maandĩke ibuku-inĩ rĩa maũndũ ma mahinda ma athamaki a Isiraeli?
29 Thutha ũcio Jeroboamu akĩhurũkio hamwe na maithe make ma tene, hamwe na athamaki a Isiraeli; na mũrũwe Zekaria+ agĩtuĩka mũthamaki ithenya rĩake.
Tũũhoro twa magũrũ-inĩ
^ Kana “tũcemanie ũthiũ kwa ũthiũ.”
^ Kana “nyũmba-inĩ yaku ya ũthamaki.”
^ Ũkk., “hema-inĩ yake.”
^ Nĩ ta mita 178 (fiti 584). Rora Ũhoro Muongerere B14.
^ Nĩ Jeroboamu wa Kerĩ.
^ Rĩĩtwa rĩu riugĩte “Jehova Nĩ Ateithĩtie.” Nowe wĩtĩtwo Uzia thĩinĩ wa 2Ath 15:13; 2Maũ 26:1-23; Isa 6:1; na Zek 14:5.
^ Nĩ ithe, Amazia.
^ Nĩ Iria rĩa Cumbĩ.
^ Kana “itonyero rĩa Hamathu.”
