Athamaki wa Kerĩ 15:1-38
15 Na rĩrĩ, mwaka-inĩ wa 27 wa Mũthamaki Jeroboamu* wa Isiraeli, Azaria*+ mũrũ wa Mũthamaki Amazia+ wa Juda nĩ aatuĩkire mũthamaki.+
2 Aarĩ na mĩaka 16 rĩrĩa aatuĩkire mũthamaki, na agĩathana mĩaka 52 thĩinĩ wa Jerusalemu. Nyina eetagwo Jekolia wa kuuma Jerusalemu.
3 Nake agĩthiĩ na mbere gwĩka maũndũ marĩa magĩrĩire maitho-inĩ ma Jehova, o ta ũrĩa ithe Amazia eekĩte.+
4 No rĩrĩ, kũndũ kũrĩa gũtũũgĩru gũtieheririo,+ na andũ no maathiaga na mbere kũrutĩra magongona na ndogo ya magongona kũndũ kũu gũtũũgĩru.+
5 Jehova akĩrehera mũthamaki ihũũra, nake agĩtũũra arĩ na mangũ+ nginya mũthenya ũrĩa aakuire; na aaikaraga thĩinĩ wa nyũmba yarĩ handũ mwanya,+ nake Jothamu mũrũ wa mũthamaki+ nĩwe warũgamagĩrĩra nyũmba,* agatuĩra andũ a bũrũri ciira.+
6 Ha ũhoro wa maũndũ macio mangĩ megiĩ Azaria,+ ũrĩa wothe eekire, na githĩ ti maandĩke ibuku-inĩ rĩa maũndũ ma mahinda ma athamaki a Juda?
7 Thutha ũcio Azaria akĩhurũkio hamwe na maithe make ma tene,+ na agĩthikwo hamwe na maithe make ma tene thĩinĩ wa Itũũra rĩa Daudi; na mũrũwe Jothamu agĩtuĩka mũthamaki ithenya rĩake.
8 Mwaka-inĩ wa 38 wa Mũthamaki Azaria+ wa Juda, Zekaria+ mũrũ wa Jeroboamu nĩ aatuĩkire mũthamaki wa Isiraeli thĩinĩ wa Samaria, na agĩathana mĩeri itandatũ.
9 Nake agĩka maũndũ moru maitho-inĩ ma Jehova, o ta ũrĩa maithe make ma tene meekĩte. Ndaatiganire na mehia marĩa Jeroboamu mũrũ wa Nebati aatũmĩte Isiraeli mehie.+
10 Nake Shalumu mũrũ wa Jabeshi akĩbanga njama ya kũmũũkĩrĩra na akĩmũũragĩra+ Ibileamu.+ Thutha wa kũmũũraga, agĩtuĩka mũthamaki ithenya rĩake.
11 Ha ũhoro wa maũndũ macio mangĩ megiĩ Zekaria, nĩ maandĩke ibuku-inĩ rĩa maũndũ ma mahinda ma athamaki a Isiraeli.
12 Ũndũ ũcio nĩ wahingirie kiugo kĩa Jehova kĩrĩa eerĩte Jehu atĩrĩ: “Njiarũa inya cia ariũ aku+ nĩ igaaikarĩra gĩtĩ kĩa ũnene kĩa Isiraeli.”+ Na ũguo noguo gwekĩkire.
13 Shalumu mũrũ wa Jabeshi aatuĩkire mũthamaki mwaka-inĩ wa 39 wa Mũthamaki Uzia+ wa Juda, na agĩathana mweri mũgima thĩinĩ wa Samaria.
14 Nake Menahemu mũrũ wa Gadi akĩambata kuuma Tiriza+ agĩthiĩ Samaria na akĩũraga Shalumu+ mũrũ wa Jabeshi kũu Samaria. Thutha wa kũmũũraga, agĩtuĩka mũthamaki ithenya rĩake.
15 Ha ũhoro wa maũndũ macio mangĩ megiĩ Shalumu na njama ĩrĩa aabangire, nĩ maandĩke ibuku-inĩ rĩa maũndũ ma mahinda ma athamaki a Isiraeli.
16 Hĩndĩ ĩyo nĩrĩo Menahemu ookire kuuma Tiriza na akĩhũũra itũũra rĩa Tifisa o hamwe na andũ arĩa othe maarĩ thĩinĩ warĩo na gĩcigo-inĩ kĩarĩo, tondũ nĩ rĩaregire kũmũhingũrĩra ihingo. Akĩrĩhũũra na agĩtarũra nda cia atumia a kuo arĩa maarĩ na nda.
17 Mwaka-inĩ wa 39 wa Mũthamaki Azaria wa Juda, Menahemu mũrũ wa Gadi nĩ aatuĩkire mũthamaki wa Isiraeli, na agĩathana mĩaka ikũmi thĩinĩ wa Samaria.
18 Nake agĩthiĩ na mbere gwĩka maũndũ moru maitho-inĩ ma Jehova. Ndaatiganire na mehia mothe marĩa Jeroboamu mũrũ wa Nebati aatũmĩte Isiraeli mehie,+ matukũ-inĩ make mothe.
19 Mũthamaki Puli+ wa Ashuri agĩũka bũrũri-inĩ, na Menahemu akĩnengera Puli taranda* 1,000 cia betha nĩguo amũteithie gwĩkĩra hinya wathani wake ũthamaki-inĩ ũcio.+
20 Nĩ ũndũ ũcio, Menahemu agĩcokanĩrĩria betha icio kuuma harĩ Isiraeli na njĩra ya gũciĩtia kuuma kũrĩ andũ arĩa maarĩ igweta na itonga.+ Akĩnengera mũthamaki wa Ashuri cekeri* 50 cia betha cia o mũndũ. Nake mũthamaki wa Ashuri akĩhũndũka na ndaaikarire bũrũri-inĩ.
21 Ha ũhoro wa maũndũ macio mangĩ megiĩ Menahemu,+ ũrĩa wothe eekire, na githĩ ti maandĩke ibuku-inĩ rĩa maũndũ ma mahinda ma athamaki a Isiraeli?
22 Thutha ũcio Menahemu akĩhurũkio hamwe na maithe make ma tene; na mũrũwe Pekahia agĩtuĩka mũthamaki ithenya rĩake.
23 Mwaka-inĩ wa 50 wa Mũthamaki Azaria wa Juda, Pekahia mũrũ wa Menahemu nĩ aatuĩkire mũthamaki wa Isiraeli thĩinĩ wa Samaria, na agĩathana mĩaka ĩĩrĩ.
24 Nake agĩthiĩ na mbere gwĩka maũndũ moru maitho-inĩ ma Jehova. Ndaatiganire na mehia marĩa Jeroboamu mũrũ wa Nebati aatũmĩte Isiraeli mehie.+
25 Na rĩrĩ, mũnene ũrĩa wamũteithagĩrĩria, Peka+ mũrũ wa Remalia, akĩbanga njama ya kũmũũkĩrĩra na akĩmũũragĩra Samaria nyũmba-inĩ ĩrĩa ndaya na igũrũ ĩrĩ na ũgitĩri ya nyũmba ya mũthamaki hamwe na Arigobu na Ariehi. Aarĩ na arũme 50 a Gileadi; na thutha wa kũmũũraga, agĩtuĩka mũthamaki ithenya rĩake.
26 Ha ũhoro wa maũndũ macio mangĩ megiĩ Pekahia, ũrĩa wothe eekire, nĩ maandĩke ibuku-inĩ rĩa maũndũ ma mahinda ma athamaki a Isiraeli.
27 Mwaka-inĩ wa 52 wa Mũthamaki Azaria wa Juda, Peka+ mũrũ wa Remalia nĩ aatuĩkire mũthamaki wa Isiraeli thĩinĩ wa Samaria, na agĩathana mĩaka 20.
28 Nake agĩthiĩ na mbere gwĩka maũndũ moru maitho-inĩ ma Jehova na ndaatiganire na mehia marĩa Jeroboamu mũrũ wa Nebati aatũmĩte Isiraeli mehie.+
29 Matukũ-inĩ ma Mũthamaki Peka wa Isiraeli, Mũthamaki Tigilathu-pileseru+ wa Ashuri nĩ aatharĩkĩire na agĩtaha Ijoni, Abeli-bethi-maaka,+ Janoa, Kedeshi,+ Hazoru, Gileadi,+ na Galili, bũrũri wothe wa Nafitali,+ na akĩoya aikari a kuo akĩmatwara ithamĩrio Ashuri.+
30 Nake Hoshea+ mũrũ wa Ela akĩbanga njama ya gũũkĩrĩra Peka mũrũ wa Remalia, akĩmũtharĩkĩra na akĩmũũraga; na agĩtuĩka mũthamaki ithenya rĩake mwaka-inĩ wa 20 wa Jothamu+ mũrũ wa Uzia.
31 Ha ũhoro wa maũndũ macio mangĩ megiĩ Peka, ũrĩa wothe eekire, nĩ maandĩke ibuku-inĩ rĩa maũndũ ma mahinda ma athamaki a Isiraeli.
32 Mwaka-inĩ wa kerĩ wa Peka mũrũ wa Remalia mũthamaki wa Isiraeli, Jothamu+ mũrũ wa Mũthamaki Uzia+ wa Juda nĩ aatuĩkire mũthamaki.
33 Aarĩ na mĩaka 25 rĩrĩa aatuĩkire mũthamaki, na agĩathana mĩaka 16 thĩinĩ wa Jerusalemu. Nyina eetagwo Jerusha, mwarĩ wa Zadoku.+
34 Nake agĩthiĩ na mbere gwĩka maũndũ marĩa magĩrĩire maitho-inĩ ma Jehova, o ta ũrĩa ithe Uzia eekĩte.+
35 No rĩrĩ, kũndũ kũrĩa gũtũũgĩru gũtieheririo, na andũ no maathiaga na mbere kũrutĩra magongona na ndogo ya magongona kũndũ kũu gũtũũgĩru.+ Nĩwe waakire kĩhingo kĩa rũgongo kĩa nyũmba ya Jehova.+
36 Ha ũhoro wa maũndũ macio mangĩ megiĩ Jothamu, ũrĩa eekire, na githĩ ti maandĩke ibuku-inĩ rĩa maũndũ ma mahinda ma athamaki a Juda?
37 Matukũ-inĩ macio, Jehova akĩambĩrĩria gũtũma Rezini mũthamaki wa Siria na Peka+ mũrũ wa Remalia mokĩrĩre Juda.+
38 Thutha ũcio Jothamu akĩhurũkio hamwe na maithe make ma tene, na agĩthikwo hamwe na maithe make ma tene thĩinĩ wa Itũũra rĩa Daudi ithe wao wa tene. Na mũrũwe Ahazu agĩtuĩka mũthamaki ithenya rĩake.
Tũũhoro twa magũrũ-inĩ
^ Rĩĩtwa rĩu riugĩte “Jehova Nĩ Ateithĩtie.” Nowe wĩtĩtwo Uzia thĩinĩ wa 2Ath 15:13; 2Maũ 26:1-23; Isa 6:1; na Zek 14:5.
^ Nĩ Jeroboamu wa Kerĩ.
^ Kana “nyũmba ya mũthamaki.”
^ Taranda ĩmwe yaiganaine na kilo 34.2. Rora Ũhoro Muongerere B14.
^ Cekeri ĩmwe yaiganaine na ngiramu 11.4. Rora Ũhoro Muongerere B14.
