Athamaki wa Kerĩ 16:1-20
16 Mwaka-inĩ wa 17 wa Peka mũrũ wa Remalia, Ahazu+ mũrũ wa Mũthamaki Jothamu wa Juda nĩ aatuĩkire mũthamaki.
2 Ahazu aarĩ na mĩaka 20 rĩrĩa aatuĩkire mũthamaki, na agĩathana mĩaka 16 thĩinĩ wa Jerusalemu. Ndeekire maũndũ marĩa maagĩrĩire maitho-inĩ ma Jehova Ngai wake, ta ũrĩa Daudi ithe wao wa tene eekĩte.+
3 Ithenya rĩa ũguo, aarũmĩrĩire njĩra ya athamaki a Isiraeli,+ o na akĩhĩtũkĩria mũrũ wake mwene mwaki-inĩ,+ akĩrũmĩrĩra mĩtugo ĩrĩ magigi ya ndũrĩrĩ+ iria Jehova aaingatĩte ciehere mbere ya Aisiraeli.
4 Ningĩ agĩthiĩ na mbere kũrutĩra magongona na ndogo ya magongona kũndũ kũrĩa gũtũũgĩru,+ tũrĩma igũrũ, na rungu rwa mũtĩ o wothe mũruru.+
5 Hĩndĩ ĩyo nĩrĩo Mũthamaki Rezini wa Siria na Peka mũrũ wa Remalia mũthamaki wa Isiraeli mookire kũrũa na Jerusalemu.+ Makĩrigicĩria Ahazu no matiahotire gũtaha itũũra rĩu.
6 Hĩndĩ ĩyo Mũthamaki Rezini wa Siria agĩcokia Elathu+ kũrĩ Edomu, thutha ũcio akĩingata Ayahudi* kuuma Elathu. Nao Aedomu makĩingĩra Elathu, na kũu nĩkuo matũire nginya ũmũthĩ ũyũ.
7 Ahazu agĩgĩtũma atũmwo kũrĩ Mũthamaki Tigilathu-pileseru+ wa Ashuri, akĩmwĩra ũũ: “Niĩ ndĩ ndungata yaku na mũrũguo. Ambata ũũke ũũhonokie kuuma guoko-inĩ kwa mũthamaki wa Siria na guoko-inĩ kwa mũthamaki wa Isiraeli, arĩa maratharĩkĩra.”
8 Ahazu agĩcoka akĩoya betha na thahabu iria ciarĩ nyũmba-inĩ ya Jehova na igĩna-inĩ cia nyũmba ya mũthamaki na agĩtũmĩra mũthamaki wa Ashuri ihaki.+
9 Nake mũthamaki wa Ashuri agĩtĩkĩra ihoya rĩake, akĩambata agĩthiĩ Dameski na akĩmĩtaha nao andũ a kuo akĩmatwara ithamĩrio Kiri,+ na akĩũraga Rezini.+
10 Thutha ũcio Mũthamaki Ahazu agĩthiĩ gũcemania na Mũthamaki Tigilathu-pileseru wa Ashuri kũu Dameski. Rĩrĩa Mũthamaki Ahazu oonire kĩgongona kĩrĩa kĩarĩ Dameski, agĩtũmĩra Urija mũthĩnjĩri-Ngai mũcoro wa kĩgongona kĩu, akĩonania mũhianĩre wakĩo na ũrĩa gĩathondeketwo.+
11 Urija+ ũcio mũthĩnjĩri-Ngai agĩaka kĩgongona+ kũringana na mĩtaratara yothe ĩrĩa Mũthamaki Ahazu aatũmĩte kuuma Dameski. Urija ũcio mũthĩnjĩri-Ngai akĩrĩkia gwaka kĩgongona kĩu Mũthamaki Ahazu atacokete kuuma Dameski.
12 Rĩrĩa mũthamaki aacokire kuuma Dameski akĩona kĩgongona kĩu, agĩthiĩ harĩa kĩgongona kĩu kĩarĩ na akĩrutĩra magongona igũrũ rĩakĩo.+
13 Na agĩthiĩ na mbere kũrutĩra ndogo ya magongona make ma njino na magongona make ma mũtu kĩgongona-inĩ kĩu; ningĩ agĩita magongona make ma ndibei na akĩminjaminjia thakame ya magongona make ma ũiguano igũrũ rĩakĩo.
14 Ningĩ agĩthamia kĩgongona gĩa gĩcango+ kĩrĩa kĩarĩ mbere ya Jehova kuuma handũ hakĩo mbere ya nyũmba ĩyo, kuuma gatagatĩ ga kĩgongona gĩake mwene na nyũmba ya Jehova, agĩkĩiga mwena wa rũgongo wa kĩgongona gĩake mwene.
15 Mũthamaki Ahazu agĩatha Urija+ ũcio mũthĩnjĩri-Ngai akĩmwĩra atĩrĩ: “Rutagĩra ndogo ya igongona rĩa njino rĩa rũcinĩ igũrũ rĩa kĩgongona kĩrĩa kĩnene,+ o hamwe na igongona rĩa mũtu rĩa hwaĩ-inĩ,+ igongona rĩa njino rĩa mũthamaki, na igongona rĩake rĩa mũtu, o na magongona ma njino, magongona ma mũtu, na magongona ma ndibei ma andũ othe. Wagĩrĩirũo gũkĩminjaminjĩria thakame yothe ya magongona ma njino, na thakame yothe ya magongona macio mangĩ. Ha ũhoro wa kĩgongona gĩa gĩcango, nĩ ngũtua ũrĩa ngwĩka nakĩo.”
16 Nake Urija ũcio mũthĩnjĩri-Ngai agĩka maũndũ mothe marĩa Mũthamaki Ahazu aamwathĩte.+
17 Makĩria ma ũguo, Mũthamaki Ahazu agĩtinangia tũbaati twa mwena-inĩ twa tũkaari+ tũcunjĩ tũcunjĩ na akĩeheria iraĩ kuuma harĩ tuo,+ o na akĩeheria Karia kuuma igũrũ rĩa ndegwa cia gĩcango+ iria ciagatiirĩrĩire agĩkaiga gacĩra-inĩ ka mahiga.+
18 Nakĩo gĩthaku gĩa Thabatũ kĩrĩa gĩakĩtwo nyũmba-inĩ ĩyo na itonyero rĩa na nja rĩa mũthamaki agĩcieheria kuuma nyũmba-inĩ ya Jehova; eekire ũguo nĩ ũndũ wa mũthamaki wa Ashuri.
19 Ha ũhoro wa maũndũ macio mangĩ megiĩ Ahazu, ũrĩa eekire, na githĩ ti maandĩke ibuku-inĩ rĩa maũndũ ma mahinda ma athamaki a Juda?+
20 Thutha ũcio Ahazu akĩhurũkio hamwe na maithe make ma tene, na agĩthikwo hamwe na maithe make ma tene thĩinĩ wa Itũũra rĩa Daudi; na mũrũwe Hezekia*+ agĩtuĩka mũthamaki ithenya rĩake.
