Athamaki wa Kerĩ 19:1-37
19 Rĩrĩa Mũthamaki Hezekia aaiguire ũhoro ũcio, agĩtembũra nguo ciake o hĩndĩ ĩyo na akĩĩhumba nguo ya ikũnia na agĩthiĩ akĩingĩra nyũmba-inĩ ya Jehova.+
2 Agĩcoka agĩtũma Eliakimu, ũrĩa warũgamĩrĩire maũndũ ma nyũmba,* Shebina ũrĩa warĩ mwandĩki, na athuri* kuuma harĩ athĩnjĩri-Ngai, mehumbĩte nguo cia makũnia, akĩmatũma kũrĩ mũnabii Isaia,+ mũrũ wa Amozu.
3 Makĩmwĩra atĩrĩ: “Ũũ nĩguo Hezekia ekuuga, ‘Mũthenya ũyũ nĩ mũthenya wa mĩtangĩko, wa gũkũũmwo,* na wa gĩconoko; nĩ gũkorũo twana nĩ tũkinyĩte ihinda rĩa gũciarũo,* no hatirĩ na hinya wa gũciara.+
4 No gũkorũo Jehova Ngai waku nĩ ekũigua ciugo ciothe cia Rabishake, ũrĩa ũtũmĩtwo nĩ mwathi wake mũthamaki wa Ashuri nĩguo anyũrũrie Ngai ũrĩa ũtũũraga muoyo,+ na nĩ ekũmũherithia nĩ ũndũ wa ciugo icio Jehova Ngai waku aiguĩte. Kwoguo hoya+ nĩ ũndũ wa andũ arĩa matigarĩte muoyo.’”
5 Nĩ ũndũ ũcio ndungata icio cia Mũthamaki Hezekia igĩthiĩ kũrĩ Isaia,+
6 nake Isaia agĩciĩra atĩrĩ: “Ũũ nĩguo mũkwĩra mwathi wanyu, ‘Jehova oigĩte ũũ: “Ndũgetigĩre+ tondũ wa ciugo icio ũiguĩte, ciugo icio ndungata cia mũthamaki wa Ashuri cinumĩte nacio.+
7 Nĩ ngwĩkĩra ũndũ mũna meciria-inĩ make,* na nĩ ekũigua ũhoro mũna na acoke bũrũri wake; na nĩ ngaatũma oragwo na rũhiũ rwa njora arĩ bũrũri-inĩ wake mwene.”’”+
8 Rĩrĩa Rabishake aaiguire atĩ mũthamaki wa Ashuri nĩ athiĩte akehera Lakishi,+ agĩcoka kũrĩ we na akĩmũkora akĩrũa na Libina.+
9 Nake mũthamaki ũcio akĩigua gũkĩĩrũo ũũ ũhoro ũkoniĩ Mũthamaki Tirihaka wa Ethiopia: “Atĩrĩrĩ, nĩ okĩte kũrũa nawe.” Kwoguo agĩtũma atũmwo+ o rĩngĩ kũrĩ Hezekia, akiuga ũũ:
10 “Ũũ nĩguo mũkwĩra Mũthamaki Hezekia wa Juda, ‘Ndũkareke Ngai waku ũrĩa wĩhokete akũheenie agĩkwĩra ũũ: “Jerusalemu ndĩkũneanwo guoko-inĩ kwa mũthamaki wa Ashuri.”+
11 Atĩrĩrĩ, wee nĩ ũiguĩte ũrĩa athamaki a Ashuri meekire mabũrũri mothe rĩrĩa maamanangire.+ Wee nowe wiki ũgũkĩhonokio?
12 Hihi ngai cia andũ a ndũrĩrĩ iria maithe maitũ ma tene maanangire nĩ ciamahonokirie? Gozani, Harani,+ na Rezefu ikĩrĩ kũ, o hamwe na andũ a Edeni arĩa maarĩ Teli-asaru?
13 Arĩ kũ mũthamaki wa Hamathu, mũthamaki wa Aripadi, na mũthamaki wa matũũra ma Sefarivaimu, na wa Hena na wa Iva?’”+
14 Nake Hezekia akĩoya marũa macio kuuma guoko-inĩ kwa atũmwo na akĩmathoma. Hezekia agĩcoka akĩambata agĩthiĩ nyũmba-inĩ ya Jehova na akĩmatambũrũkia mbere ya Jehova.+
15 Na Hezekia akĩambĩrĩria kũhoya+ arĩ mbere ya Jehova akiuga atĩrĩ: “Wee Jehova Ngai wa Isiraeli, o wee ũikarĩire gĩtĩ kĩa ũnene igũrũ rĩa* akerubi,+ wee wiki nowe Ngai ũrĩa wa ma harĩ mothamaki mothe ma thĩ.+ Nĩwe wombire igũrũ na thĩ.
16 Tega gũtũ gwaku, wee Jehova ũigue!+ Hingũra maitho maku,+ wee Jehova wone! Thikĩrĩria ciugo iria Senakeribu atũmanĩte nĩguo anyũrũrie Ngai ũrĩa ũtũũraga muoyo.
17 Atĩrĩrĩ Jehova, ti itherũ athamaki a Ashuri nĩ manangĩte ndũrĩrĩ o hamwe na mabũrũri ma cio.+
18 Na nĩ maikĩtie ngai ciao mwaki-inĩ, tondũ itiarĩ ngai+ no ciarĩ mbaũ na mahiga, wĩra wa moko ma andũ.+ Nĩkĩo maahotire gũciananga.
19 No rĩu, Jehova Ngai witũ, twagũthaitha ũtũhonokie kuuma guoko-inĩ gwake, nĩguo mothamaki mothe ma thĩ mamenye atĩ wee wiki nowe Ngai, Jehova.”+
20 Nake Isaia mũrũ wa Amozu agĩtũma ndũmĩrĩri ĩno kũrĩ Hezekia: “Ũũ nĩguo Jehova Ngai wa Isiraeli oigĩte, ‘Nĩ njiguĩte ihoya+ rĩrĩa ũũhoete igũrũ rĩgiĩ Mũthamaki Senakeribu wa Ashuri.+
21 Gĩkĩ nĩkĩo kiugo kĩrĩa Jehova oigĩte kũmwerekera:
“Mũirĩtu gathirange wa Zayuni nĩ akũmenete, nĩ arakũnyũrũria.
Mwarĩ wa Jerusalemu arainainia mũtwe nĩ ũndũ waku.
22 Ũcio wee ũnyũrũrĩtie na ũkaruma-rĩ, nũũ?+
Nũũ ũgũthũkĩire na mũgambo ũcio waku+
Na ũkambararĩria maitho macio maku marĩ na mwĩtĩo?
Nĩ Ũrĩa Mũtheru wa Isiraeli!+
23 Nĩ ũnyũrũrĩtie Jehova+ kũgerera atũmwo aku+ na ũkoiga atĩrĩ,
‘Ngĩhũthĩra ngaari ciakwa nyingĩ cia mbaara
Nĩ ngwambata nginya tũcũmbĩrĩ twa irĩma,
Kũrĩa kũraihu biũ thĩinĩ wa Lebanoni.
Ngũtema mĩtarakwa yakuo ĩrĩa mĩraihu, na mĩthengera yakuo ĩrĩa mĩega biũ.
Nyingĩre nginya thĩinĩ biũ, mĩtitũ-inĩ yakuo ĩrĩa mĩtumanu mũno.
24 Nĩ ngwenja ithima na nyue maĩ ma kũngĩ;
Nĩ ngũhũithia tũrũũĩ* tuothe twa Misiri na makinya ma magũrũ makwa.’
25 Kaĩ ũtarĩ waigua? Ũndũ ũcio nĩ watuĩtwo*+ kuuma o tene.
Kuuma o matukũ marĩa ma tene nĩ ndaũhaarĩrĩirie.*+
Rĩu nĩ ngũhingia ũndũ ũcio.+
Matũũra marĩa marĩ na ũgitĩri ũkaamatua hĩba cia mwanangĩko.+
26 Aikari a kuo matigaakorũo na wa kũmateithia;
Nĩ makaamaka na maconorithio.
Magaatuĩka o ta mĩmera ya mũgũnda na nyeki nduru,+
O ta nyeki ĩmerete nyũmba igũrũ ĩrĩa ĩhoohaga nĩ ũndũ wa rũhuho rwa mwena wa irathĩro.
27 No nĩ menyaga rĩrĩa waikara thĩ, rĩrĩa woimagara, na rĩrĩa wacoka,+
Na rĩrĩa ũndakarĩire,+
28 Tondũ mang’ũrĩ maku kũnjerekera+ na mũraramo waku nĩ ikinyĩire matũ makwa.+
Nĩ ngeekĩra gĩcũhĩ gĩakwa iniũrũ-inĩ rĩaku na njĩkĩre mĩkwa yakwa+ gatagatĩ-inĩ ka mĩromo yaku,
Na nĩ ngaatũma ũcokere njĩra ĩrĩa wokĩire.”+
29 “‘Na gĩkĩ nĩkĩo kĩmenyithia kĩrĩa ngũkũhe:* Mwaka ũyũ nĩ mũkũrĩa maitĩka;* naguo mwaka wa kerĩ, mũkaarĩa ngano* ĩrĩa ĩkaamera kuuma harĩ mo;+ no mwaka wa gatatũ nĩ mũkaahanda mbegũ na mũgethe, na nĩ mũkaahanda mĩthabibũ na mũrĩe maciaro mayo.+
30 Andũ a nyũmba ya Juda arĩa mageethara, arĩa magaatigara,+ nĩ magaaikũrũkia mĩri na thĩ na marute maciaro na igũrũ.
31 Nĩ gũkorũo matigari ma andũ nĩ makooima Jerusalemu na arĩa makaahonoka moime Kĩrĩma gĩa Zayuni. Kĩyo kĩa Jehova mũnene wa ita nĩkĩo gĩgeeka ũguo.+
32 “‘Nĩ ũndũ ũcio, ũũ nĩguo Jehova oigĩte igũrũ rĩgiĩ mũthamaki wa Ashuri:+
“Ndegũtonya itũũra-inĩ rĩrĩ+
Kana aikie mũguĩ kuo
Kana arĩũkĩrĩre arĩ na ngo
Kana athondeke hĩba ya kũrĩrigicĩria.+
33 Njĩra ĩrĩa ookĩire noyo egũcokera;
Ndegũtonya itũũra-inĩ rĩrĩ,” ũguo nĩguo Jehova ekuuga.
34 “Nĩ ngũgitĩra itũũra rĩrĩ+ na ndĩrĩhonokie nĩ ũndũ wakwa+
Na nĩ ũndũ wa Daudi ndungata yakwa.”’”+
35 Ũtukũ o ro ũcio, mũraika wa Jehova agĩthiĩ na akĩũraga arũme 185,000 kambĩ-inĩ ya Aashuri.+ Rĩrĩa andũ mookĩrire rũcinĩ tene, makĩona mĩĩrĩ ya andũ acio othe maakuĩte.+
36 Nĩ ũndũ ũcio Mũthamaki Senakeribu wa Ashuri akĩhũndũka agĩthiĩ Nineve+ na agĩikara kuo.+
37 Na rĩrĩ, rĩrĩa aainamagĩrĩra arĩ nyũmba-inĩ* ya ngai yake Nisiroku, ariũ ake Adarameleku na Sharezeru makĩmũũraga na rũhiũ rwa njora+ na makĩũra magĩthiĩ bũrũri wa Ararati.+ Nake mũrũwe Esari-hadoni+ agĩtuĩka mũthamaki ithenya rĩake.
Tũũhoro twa magũrũ-inĩ
^ Kana “nyũmba ya mũthamaki.”
^ Athuri arĩa meehokeirũo maũndũ.
^ Kana “kũrumwo.”
^ Ũkk., “nĩ tũkinyĩte mũromo-inĩ wa nda.”
^ Ũkk., “roho thĩinĩ wake.”
^ Kana hihi, “gatagatĩ-inĩ ka.”
^ Kana “tũmĩtaro twa Nailo.”
^ Kana “ndaũthondekete.”
^ Ũkk., “nĩ wekĩtwo.”
^ Kana “cairi.”
^ Kana “mĩmera ĩkũrĩte kuuma harĩ thanda cia ngano iria citĩkangĩte.”
^ Nĩ Hezekia ũrerũo.
^ Kana “hekarũ-inĩ.”
