Athamaki wa Kerĩ 21:1-26
21 Manase+ aarĩ na mĩaka 12 rĩrĩa aatuĩkire mũthamaki, na agĩathana mĩaka 55 thĩinĩ wa Jerusalemu.+ Nyina eetagwo Hefiziba.
2 Nake agĩka maũndũ moru maitho-inĩ ma Jehova, akĩrũmĩrĩra mĩtugo ĩrĩ magigi ya ndũrĩrĩ+ iria Jehova aaingatĩte ciehere mbere ya andũ a Isiraeli.+
3 Nĩ aakire rĩngĩ kũndũ gũtũũgĩru kũrĩa ithe Hezekia aanangĩte,+ na agĩakĩra Baali igongona na agĩthondeka mũtĩ wa kũhoywo,*+ o ta ũrĩa Ahabu mũthamaki wa Isiraeli eekĩte.+ O na akĩinamĩrĩra mbũtũ yothe ya igũrũ na akĩmĩtungatĩra.+
4 Ningĩ agĩaka igongona thĩinĩ wa nyũmba ya Jehova,+ ĩrĩa Jehova ooigĩte ũũ ũhoro-inĩ wayo: “Thĩinĩ wa Jerusalemu, nĩ ngaaiga rĩĩtwa rĩakwa.”+
5 Ningĩ agĩakĩra mbũtũ yothe ya igũrũ+ igongona thĩinĩ wa nja igĩrĩ cia nyũmba ya Jehova.+
6 Na akĩhĩtũkĩria mũrũ wake mwene mwaki-inĩ; agĩka maũndũ ma ũgo, agĩcaria imenyithia cia ũragũri,+ na akĩamũra andũ arĩa maragia na maroho na arĩa marathaga mohoro.+ Agĩka maũndũ moru maitho-inĩ ma Jehova na gĩkĩro kĩnene nĩguo amũrakarie.
7 Aaigire mũhianano ũcio wa gwacũhio aathondekire wa mũtĩ wa kũhoywo*+ nyũmba-inĩ ĩrĩa Jehova eerĩte Daudi na akera mũrũ wake Suleimani atĩrĩ: “Thĩinĩ wa nyũmba ĩno na thĩinĩ wa Jerusalemu, o ĩyo thuurĩte kuuma harĩ mĩhĩrĩga yothe ya Isiraeli, nĩ ngaaiga rĩĩtwa rĩakwa rĩtũũre kuo.+
8 Na gũtirĩ hĩndĩ ĩngĩ ngaatũma makinya ma Isiraeli morũre kuuma bũrũri-inĩ ũrĩa ndaheire maithe mao ma tene,+ angĩkorũo nĩ marĩrũmagĩrĩra biũ maũndũ mothe marĩa ndĩmaathĩte,+ marũmĩrĩre Watho wothe ũrĩa Musa ndungata yakwa aamaathire marũmagĩrĩre.”
9 No matiathĩkire, na Manase aathiire na mbere kũmahĩtithia, agĩtũma meke maũndũ moru mũno gũkĩra ndũrĩrĩ iria Jehova aaniinĩte nĩguo ciehere mbere ya Aisiraeli.+
10 Nake Jehova agĩthiĩ na mbere kwaria akĩhũthĩra ndungata ciake anabii,+ akiuga atĩrĩ:
11 “Manase mũthamaki wa Juda nĩ ekĩte maũndũ macio mothe marĩ magigi; ekĩte maũndũ ma waganu gũkĩra Aamori+ othe arĩa maarĩ kuo mbere yake,+ na nĩ atũmĩte Juda ĩhie nĩ ũndũ wa mĩhianano yake ĩrĩ magigi.*
12 Nĩ ũndũ ũcio, ũũ nĩguo Jehova Ngai wa Isiraeli ekuuga: ‘Nĩ ngũrehe thĩna mũnene thĩinĩ wa Jerusalemu+ na Juda, ũtũme matũ meerĩ ma mũndũ o wothe ũkũũigua mararakwo.+
13 Na nĩ ngaatambũrũkĩria Jerusalemu rũrigi rwa gũthima+ rũrĩa rwahũthĩrirũo harĩ Samaria+ na hũthĩre kabirũ karĩa kaahũthĩrirũo harĩ nyũmba ya Ahabu,+ na nĩ ngaahuura Jerusalemu ĩthere, o ta ũrĩa mũndũ ahuuraga mbakũri ĩgathera, akamĩhuura na akamĩkurumania.+
14 Nĩ ngaatiganĩria matigari ma igai rĩakwa+ na ndĩmaneane guoko-inĩ gwa thũ ciao, nao magaatuĩka kĩndũ gĩa gũtunywo na gĩa gũtahwo harĩ thũ ciao ciothe,+
15 tondũ nĩ meekire maũndũ moru maitho-inĩ makwa na maathiire na mbere kũndakaria kuuma o mũthenya ũrĩa maithe mao ma tene mooimire Misiri nginya ũmũthĩ ũyũ.’”+
16 Ningĩ Manase nĩ aaitire thakame nyingĩ mũno ĩtarĩ na mahĩtia nginya akĩmĩiyũria Jerusalemu kuuma mũico ũmwe nginya ũrĩa ũngĩ,+ o hamwe na mehia make ma gũtũma Juda ĩhie na njĩra ya gwĩka maũndũ moru maitho-inĩ ma Jehova.
17 Ha ũhoro wa maũndũ macio mangĩ megiĩ Manase na ũrĩa wothe eekire o na mehia marĩa eekire, na githĩ ti maandĩke ibuku-inĩ rĩa maũndũ ma mahinda ma athamaki a Juda?
18 Thutha ũcio Manase akĩhurũkio hamwe na maithe make ma tene na agĩthikwo mũgũnda-inĩ wa nyũmba yake, mũgũnda-inĩ wa Uza;+ na mũrũwe Amoni agĩtuĩka mũthamaki ithenya rĩake.
19 Amoni+ aarĩ na mĩaka 22 rĩrĩa aatuĩkire mũthamaki, na agĩathana mĩaka ĩĩrĩ thĩinĩ wa Jerusalemu.+ Nyina eetagwo Meshulemethu mwarĩ wa Haruzu kuuma Jotiba.
20 Nake agĩthiĩ na mbere gwĩka maũndũ moru maitho-inĩ ma Jehova, o ta ũrĩa ithe Manase eekĩte.+
21 Agĩkĩrũmĩrĩra njĩra ciothe iria ithe aarũmĩrĩire, na agĩthiĩ na mbere gũtungatĩra na kũinamĩrĩra mĩhianano ĩrĩ magigi ĩrĩa ithe aatungatagĩra.+
22 Kwoguo agĩtiganĩria Jehova Ngai wa maithe make ma tene, na ndaarũmĩrĩire njĩra ya Jehova.+
23 Thutha-inĩ ndungata cia Amoni ikĩbanga njama ya kũmũũkĩrĩra na ikĩũragĩra mũthamaki ũcio thĩinĩ wa nyũmba yake mwene.
24 No andũ a bũrũri ũcio makĩũraga arĩa othe maabangĩte njama ya gũũkĩrĩra Mũthamaki Amoni, na magĩtua mũrũwe Josia mũthamaki ithenya rĩake.+
25 Ha ũhoro wa maũndũ macio mangĩ megiĩ Amoni, ũrĩa eekire, na githĩ ti maandĩke ibuku-inĩ rĩa maũndũ ma mahinda ma athamaki a Juda?
26 Nĩ ũndũ ũcio, makĩmũthika thĩinĩ wa mbĩrĩra yake mũgũnda-inĩ wa Uza,+ na mũrũwe Josia+ agĩtuĩka mũthamaki ithenya rĩake.
Tũũhoro twa magũrũ-inĩ
^ Rora Ũthathaũri wa Ciugo.
^ Rora Ũthathaũri wa Ciugo.
^ Haha kiugo gĩa Kĩhibirania kĩrĩa gĩtaũrĩtwo no kĩringane na kiugo kĩrĩa gĩtaũragwo “mai” na kĩhũthĩkaga kuonania ũhoro wa kĩndũ kĩrĩ magigi.