Athamaki wa Kerĩ 24:1-20
24 Matukũ-inĩ ma Jehoiakimu, Mũthamaki Nebukadineza+ wa Babuloni nĩ ookire kũmũũkĩrĩra, na Jehoiakimu agĩtuĩka ndungata yake ihinda rĩa mĩaka ĩtatũ. No rĩrĩ, nĩ aamũgarũrũkire na akĩmũremera.
2 Nake Jehova akĩambĩrĩria gũtũma ikundi cia atunyani cia Akalidei,+ Asiria, Amoabi, na Aamoni nĩguo imũũkĩrĩre. Agĩthiĩ na mbere gũcitũma ciũkĩrĩre Juda nĩguo cimĩanange, kũringana na kiugo kĩa Jehova+ kĩrĩa aarĩtie kũgerera ndungata ciake anabii.
3 Hatarĩ nganja Jehova nĩwe waathanĩte ũndũ ũcio wĩkĩke harĩ Juda, nĩguo ameherie maitho-inĩ make+ tondũ wa mehia mothe marĩa Manase eekĩte,+
4 ningĩ tondũ wa thakame ĩtarĩ na mahĩtia ĩrĩa aaitĩte,+ nĩ gũkorũo aaiyũrĩtie Jerusalemu thakame ĩtarĩ mahĩtia na Jehova ndeehaarĩirie kuohanĩra.+
5 Ha ũhoro wa maũndũ macio mangĩ megiĩ Jehoiakimu, ũrĩa wothe eekire, na githĩ ti maandĩke ibuku-inĩ rĩa maũndũ ma mahinda ma athamaki a Juda?+
6 Thutha ũcio Jehoiakimu akĩhurũkio hamwe na maithe make ma tene;+ na mũrũwe Jehoiakini agĩtuĩka mũthamaki ithenya rĩake.
7 Mũthamaki wa Misiri ndaacokire kuuma bũrũri-inĩ wake rĩngĩ, tondũ mũthamaki wa Babuloni nĩ ooete indo ciothe iria ciarĩ cia mũthamaki wa Misiri,+ kuuma Mũkuru-inĩ wa Misiri+ nginya Rũũĩ-inĩ rwa Farati.+
8 Jehoiakini+ aarĩ na mĩaka 18 rĩrĩa aatuĩkire mũthamaki, na agĩathana mĩeri ĩtatũ thĩinĩ wa Jerusalemu.+ Nyina eetagwo Nehushita mwarĩ wa Elinathani wa Jerusalemu.
9 Nake agĩthiĩ na mbere gwĩka maũndũ moru maitho-inĩ ma Jehova, kũringana na maũndũ mothe marĩa ithe eekĩte.
10 Ihinda-inĩ rĩu, ndungata cia Mũthamaki Nebukadineza wa Babuloni nĩ ciokire gũũkĩrĩra Jerusalemu, na itũũra rĩu rĩkĩrigicĩrio.+
11 Nake Mũthamaki Nebukadineza wa Babuloni agĩũka itũũra-inĩ rĩu hĩndĩ ĩyo ndungata ciake ciarĩrigicĩirie.
12 Mũthamaki Jehoiakini wa Juda akiuma agĩthiĩ kũrĩ mũthamaki wa Babuloni,+ arĩ hamwe na nyina, ndungata ciake, anene ake, na anene a nyũmba yake;+ nake mũthamaki wa Babuloni akĩmũnyita mĩgwate mwaka-inĩ wa kanana wa wathani wake.+
13 Agĩcoka akĩoya kuuma kũu mĩthithũ yothe ya nyũmba ya Jehova na mĩthithũ ya nyũmba ya mũthamaki.+ Nacio indo ciothe cia thahabu iria Suleimani mũthamaki wa Isiraeli aathondekete hekarũ-inĩ ya Jehova+ agĩcitinangia tũcunjĩ tũcunjĩ. Ũndũ ũcio weekĩkire o ta ũrĩa Jehova aarathĩte.
14 Agĩtwara Jerusalemu yothe ithamĩrio, anene othe,+ njamba ciothe cia ita iria irĩ hinya, na bundi o wothe na mũturi wa cuma* o wothe+—agĩtwara andũ 10,000 ithamĩrio. Gũtirĩ mũndũ watigirũo tiga o andũ arĩa athĩni biũ a bũrũri ũcio.+
15 Kwoguo agĩtwara Jehoiakini+ ithamĩrio Babuloni;+ ningĩ akĩoya nyina wa mũthamaki, atumia a mũthamaki, anene a nyũmba yake, na andũ arĩa marĩ igweta a bũrũri ũcio, akĩmaruta Jerusalemu akĩmatwara ithamĩrio Babuloni.
16 Ningĩ mũthamaki wa Babuloni agĩtwara ithamĩrio njamba ciothe cia ita, andũ 7,000, o hamwe na mabundi na aturi a cuma* 1,000, othe arũme marĩ hinya na mamenyeretio ũhoro wa mbaara.
17 Mũthamaki wa Babuloni agĩtua Matania, mamawe wa Jehoiakini+ mũthamaki ithenya rĩake, na akĩgarũra rĩĩtwa rĩake akĩmwĩta Zedekia.+
18 Zedekia aarĩ na mĩaka 21 rĩrĩa aatuĩkire mũthamaki, na agĩathana mĩaka 11 thĩinĩ wa Jerusalemu. Nyina eetagwo Hamutali+ mwarĩ wa Jeremia kuuma Libina.
19 Nake agĩthiĩ na mbere gwĩka maũndũ moru maitho-inĩ ma Jehova, kũringana na maũndũ mothe marĩa Jehoiakimu eekĩte.+
20 Tondũ wa marakara ma Jehova, nĩkĩo maũndũ macio meekĩkire thĩinĩ wa Jerusalemu na thĩinĩ wa Juda, nginya akĩmaingata mehere maitho-inĩ make.+ Nake Zedekia akĩremera mũthamaki wa Babuloni.+
Tũũhoro twa magũrũ-inĩ
^ Kana hihi, “mwaki wa thingo cia kũgitĩra.”
^ Kana hihi, “aaki a thingo cia kũgitĩra.”
