Athamaki wa Kerĩ 25:1-30
25 Mwaka-inĩ wa kenda wa wathani wa Zedekia, mweri-inĩ wa ikũmi, mũthenya wa ikũmi wa mweri ũcio, Mũthamaki Nebukadineza+ wa Babuloni nĩ aathiire na mbũtũ yake yothe gũũkĩrĩra Jerusalemu.+ Akĩamba hema nĩguo atharĩkĩre itũũra rĩu na agĩaka rũthingo rwa kũrĩrigicĩria,+
2 na itũũra rĩu rĩgĩikara rĩrĩ irigicĩrie nginya mwaka wa 11 wa Mũthamaki Zedekia.
3 Mũthenya wa kenda wa mweri wa kana, ng’aragu yarĩ nene mũno+ thĩinĩ wa itũũra, na gũtiarĩ na irio cia kũrĩo nĩ andũ a bũrũri.+
4 Rũthingo rwa itũũra rĩu rũgĩtũrĩkio,+ na thigari ciothe ikĩũra ũtukũ igereire kĩhingo-inĩ kĩrĩa kĩarĩ gatagatĩ ga thingo iria igĩrĩ hakuhĩ na mũgũnda wa mũthamaki, hĩndĩ ĩyo Akalidei maarigicĩirie itũũra; nake mũthamaki agĩthiĩ erekeire njĩra-inĩ ya Araba.+
5 No mbũtũ ya Akalidei ĩgĩteng’eria mũthamaki, na ĩkĩmũkinyĩra werũ-inĩ mwaraganu wa Jeriko, nacio thigari ciake ciothe ikĩhurunjũka kuuma harĩ we.
6 Mbũtũ ĩyo ĩkĩnyita mũthamaki+ na ĩkĩmũtwara kũrĩ mũthamaki wa Babuloni kũu Ribila, na makĩmũtuĩra.
7 Makĩũraga ariũ a Zedekia akĩĩyonagĩra na maitho make; Nebukadineza agĩcoka agĩtumumaria maitho ma Zedekia, akĩmuoha na bĩngũ cia gĩcango, na akĩmũtwara Babuloni.+
8 Mweri-inĩ wa gatano, mũthenya wa mũgwanja wa mweri ũcio, ũguo nĩ kuuga, mwaka wa 19 wa Mũthamaki Nebukadineza mũthamaki wa Babuloni, Nebuzaradani+ ũrĩa warĩ mũnene wa arangĩri na ndungata ya mũthamaki wa Babuloni, agĩkinya Jerusalemu.+
9 Agĩcina nyũmba ya Jehova,+ nyũmba ya mũthamaki,+ na nyũmba ciothe cia Jerusalemu;+ ningĩ agĩcina nyũmba ya mũndũ o wothe ũrĩ igweta.+
10 Nacio thingo iria ciathiũrũrũkĩirie Jerusalemu ikĩmomorũo nĩ mbũtũ yothe ya Akalidei ĩrĩa yarĩ hamwe na mũnene wa arangĩri.+
11 Nebuzaradani ũcio mũnene wa arangĩri akĩoya andũ acio angĩ maatigarĩte itũũra-inĩ, andũ arĩa maathiĩte makeneana kũrĩ mũthamaki wa Babuloni, na andũ acio angĩ akĩmatwara ithamĩrio.+
12 No mũnene ũcio wa arangĩri nĩ aatigire andũ amwe arĩa maarĩ athĩni mũno thĩinĩ wa bũrũri nĩgetha marutage wĩra mĩgũnda-inĩ ya mĩthabibũ na marutithagio wĩra wa kũhinyĩrĩrio.+
13 Nao Akalidei makiunanga itugĩ cia gĩcango+ cia nyũmba ya Jehova na tũkaari+ na Karia ga gĩcango,+ o icio ciarĩ thĩinĩ wa nyũmba ya Jehova, na magĩkuua gĩcango kĩu magĩgĩtwara Babuloni.+
14 Ningĩ makĩoya ndoo, icakũri, magathĩ ma kũhoria ndambĩ, ikombe, na indo ciothe cia gĩcango iria ciahũthagĩrũo ũtungata-inĩ wa hekarũ.
15 Mũnene ũcio wa arangĩri akĩoya ngĩo cia mwaki na mbakũri iria ciarĩ cia thahabu+ na betha therie.+
16 Ha ũhoro wa itugĩ iria igĩrĩ, Karia, na tũkaari tũrĩa Suleimani aathondekete nĩ ũndũ wa nyũmba ya Jehova, gĩcango kĩa indo icio ciothe kĩarĩ kĩingĩ ũndũ gĩtangĩathimĩkire.+
17 O gĩtugĩ kĩarĩ kĩa mĩkono* 18 kũraiha na igũrũ,+ na kĩongo kĩrĩa kĩarĩ igũrũ rĩakĩo kĩarĩ gĩa gĩcango; na ũraihu wa kĩongo kĩmwe warĩ mĩkono ĩtatũ, nayo neti hamwe na makomamanga marĩa maathiũrũrũkĩirie kĩongo kĩu, ciothe ciarĩ cia gĩcango.+ Gĩtugĩ gĩa kerĩ na neti yakĩo ciatariĩ o ta kĩu kĩngĩ.
18 Mũnene ũcio wa arangĩri ningĩ akĩoya Seraia+ mũnene wa athĩnjĩri-Ngai, Zefania+ mũthĩnjĩri-Ngai wa kerĩ, na aikaria atatũ a mĩrango.+
19 Na akĩoya kuuma itũũra-inĩ mũnene ũmwe wa kwa mũthamaki ũrĩa warũgamĩrĩire thigari, arata atano a hakuhĩ a mũthamaki arĩa moonekire itũũra-inĩ, o hamwe na mwandĩki wa mũnene wa mbũtũ, ũrĩa wacokanagĩrĩria andũ a bũrũri nĩ ũndũ wa mbaara, na andũ 60 kuuma harĩ andũ arĩa mataarĩ igweta arĩa moonekire itũũra-inĩ.
20 Nebuzaradani+ mũnene wa arangĩri akĩmoya na akĩmatwara kũrĩ mũthamaki wa Babuloni kũu Ribila.+
21 Nake mũthamaki wa Babuloni akĩmoragĩra kũu Ribila bũrũri-inĩ wa Hamathu.+ Andũ a Juda magĩgĩtwarũo ithamĩrio makĩehera bũrũri-inĩ wao.+
22 Mũthamaki Nebukadineza wa Babuloni agĩthuura Gedalia+ mũrũ wa Ahikamu+ mũrũ wa Shafani+ arũgamĩrĩre andũ arĩa aatigĩte bũrũri-inĩ wa Juda.+
23 Rĩrĩa anene othe a mbũtũ hamwe na andũ ao maaiguire atĩ mũthamaki wa Babuloni nĩ aathuurĩte Gedalia, o hĩndĩ ĩyo magĩthiĩ kũrĩ Gedalia kũu Mizipa. Nao maarĩ Ishumaeli mũrũ wa Nethania, Johanani mũrũ wa Karea, Seraia mũrũ wa Tanihumethu ũrĩa Mũnetofathi, na Jaazania mũrũ wa Mũmaakathi, hamwe na andũ ao.+
24 Nake Gedalia akĩĩhĩta mwĩhĩtwa harĩ o na harĩ andũ acio ao akĩmeera atĩrĩ: “Mũtigetigĩre gũtuĩka ndungata cia Akalidei. Tũũrai thĩinĩ wa bũrũri na mũtungatĩre mũthamaki wa Babuloni, na maũndũ manyu nĩ megũthiĩ wega.”+
25 Na rĩrĩ, mweri-inĩ wa mũgwanja, Ishumaeli+ mũrũ wa Nethania mũrũ wa Elishama, ũrĩa warĩ wa rũciaro rwa ũthamaki,* agĩũka arĩ hamwe na arũme angĩ ikũmi, na magĩtharĩkĩra Gedalia makĩmũũraga, o hamwe na Ayahudi na Akalidei arĩa maarĩ hamwe nake kũu Mizipa.+
26 Thutha ũcio andũ othe, kuuma ũrĩa mũnini nginya ũrĩa mũnene hamwe na anene a mbũtũ, magĩũkĩra magĩthiĩ Misiri,+ tondũ nĩ meetigagĩra Akalidei.+
27 Na mwaka wa 37 kuuma rĩrĩa Mũthamaki Jehoiakini+ wa Juda aatwarirũo ithamĩrio, mweri wa 12, mũthenya wa 27 wa mweri ũcio, mwaka ũrĩa Mũthamaki Evili-merodaki wa Babuloni aatuĩkire mũthamaki, mũthamaki ũcio nĩ aarekereirie* Mũthamaki Jehoiakini wa Juda akĩmũruta njera.+
28 Akĩmwarĩria na njĩra ya ũtugi na akĩiga gĩtĩ gĩake kĩa ũnene igũrũ gũkĩra itĩ cia ũnene cia athamaki arĩa angĩ maarĩ hamwe nake kũu Babuloni.
29 Nĩ ũndũ ũcio Jehoiakini akĩruta nguo ciake cia njera, na aarĩaga kuuma metha-inĩ ya mũthamaki matukũ mothe ma ũtũũro wake.
30 Aaheagwo irio kuuma kũrĩ mũthamaki o mũthenya, matukũ mothe ma ũtũũro wake.
Tũũhoro twa magũrũ-inĩ
^ Mũkono ũmwe waiganaine na centimita 44.5 (inji 17.5). Rora Ũhoro Muongerere B14.
^ Ũkk., “mbeũ ya ũthamaki.”
^ Ũkk., “aambararirie mũtwe wa.”
