Samueli wa Kerĩ 21:1-22
21 Na rĩrĩ, nĩ kwarĩ na ng’aragu+ matukũ-inĩ ma Daudi mĩaka ĩtatũ kĩrũmanĩrĩrio, nĩ ũndũ ũcio agĩtuĩria ũhoro harĩ Jehova, nake Jehova akiuga ũũ: “Nĩ kũrĩ na mahĩtia ma ũiti wa thakame harĩ Saulu na harĩ nyũmba yake, nĩ gũkorũo nĩ ooragire Agibeoni.”+
2 Nĩ ũndũ ũcio mũthamaki agĩta Agibeoni+ na akĩaria nao. (Agibeoni matiarĩ Aisiraeli no maarĩ Aamori+ arĩa maatigarĩte, na Aisiraeli nĩ meehĩtĩte kwaga kũmoraga,+ ĩndĩ Saulu nĩ eerutanĩirie kũmoraga nĩ ũndũ wa kĩyo gĩake harĩ andũ a Isiraeli na Juda.)
3 Daudi akĩũria Agibeoni ũũ: “Mũkwenda ndĩmwĩkĩre ũndũ ũrĩkũ, na ingĩka atĩa humbĩre mehia macio, nĩguo mũrathime igai rĩa Jehova?”
4 Agibeoni acio makĩmwĩra atĩrĩ: “Tũtirenda betha kana thahabu+ ũhoro-inĩ wĩgiĩ Saulu na nyũmba yake; na hatirĩ mũndũ o na ũmwe tũngĩũraga thĩinĩ wa Isiraeli.” Nake akiuga ũũ: “Ũrĩa wothe mũkuuga nĩ ngũmwĩkĩra.”
5 Makĩra mũthamaki atĩrĩ: “Mũndũ ũrĩa watũniinire na akĩbanga njama ya gũtweheria biũ tũtige gũikara kũndũ o guothe gĩcigo-inĩ kĩa Isiraeli+—
6 nĩ tũnengerũo ariũ ake mũgwanja. Tũgũcuuria ciimba ciao*+ mbere ya Jehova thĩinĩ wa Gibea+ ya Saulu, ũrĩa mũthuure wa Jehova.”+ Mũthamaki akiuga atĩrĩ: “Nĩ ngũmaneana.”
7 No rĩrĩ, mũthamaki agĩcaĩra Mefiboshethu,+ mũrũ wa Jonathani mũrũ wa Saulu, nĩ ũndũ wa mwĩhĩtwa ũrĩa wehĩtirũo mbere ya Jehova gatagatĩ-inĩ ka Daudi na Jonathani,+ mũrũ wa Saulu.
8 Kwoguo mũthamaki akĩoya Arimoni na Mefiboshethu, ariũ eerĩ a Rizipa+ mwarĩ wa Aia arĩa aaciarĩire Saulu, na ariũ atano a Mikali*+ mwarĩ wa Saulu arĩa aaciarĩire Adirieli+ mũrũ wa Barizilai Mũmeholathu.
9 Agĩcoka akĩmaneana kũrĩ Agibeoni, nao magĩcuuria ciimba ciao kĩrĩma-inĩ mbere ya Jehova.+ Othe mũgwanja maakuire hamwe; mooragirũo matukũ-inĩ ma mbere ma hĩndĩ ya magetha, kĩambĩrĩria-inĩ kĩa magetha ma cairi.
10 Rizipa+ mwarĩ wa Aia agĩkĩoya nguo ya ikũnia na akĩmĩara rwaro-inĩ rwa ihiga kuuma kĩambĩrĩria kĩa magetha o nginya rĩrĩa mbura kuuma igũrũ yoirĩire ciimba icio; ndaarekire nyoni cia rĩera-inĩ ciũmbe ciimba-inĩ icio mũthenya o na kana nyamũ cia gĩthaka ikuhĩrĩrie ũtukũ.
11 Daudi agĩkĩmenyithio ũrĩa Rizipa thuriya ya Saulu, ũrĩa warĩ mwarĩ wa Aia eekĩte.
12 Nĩ ũndũ ũcio Daudi agĩthiĩ na akĩoya mahĩndĩ ma Saulu na mahĩndĩ ma Jonathani kuuma kũrĩ atongoria* a Jabeshi-gileadi,+ arĩa maamaiyĩte kuuma kĩhaaro-inĩ kĩa mũingĩ kĩa Bethi-shani, harĩa Afilisti maamacuurĩtie mũthenya ũrĩa Afilisti mooragĩire Saulu Giliboa.+
13 Akĩruta mahĩndĩ ma Saulu na mahĩndĩ ma mũrũwe Jonathani kuuma kũu, ningĩ magĩcokanĩrĩria mahĩndĩ ma arũme arĩa mooragĩtwo.*+
14 Magĩcoka magĩthika mahĩndĩ ma Saulu na ma mũrũwe Jonathani bũrũri-inĩ wa Benjamini thĩinĩ wa Zela+ mbĩrĩra-inĩ ya ithe Kishu.+ Rĩrĩa meekire ũrĩa wothe mũthamaki aathanĩte, Ngai agĩthikĩrĩria mathaithana mao nĩ ũndũ wa bũrũri ũcio.+
15 O rĩngĩ gũkiumĩra mbaara gatagatĩ-inĩ ka Afilisti na Isiraeli.+ Nĩ ũndũ ũcio Daudi na ndungata ciake magĩikũrũka kũrũa na Afilisti, no Daudi akĩnoga.
16 Mũndũ ũmwe wetagwo Ishibi-benobu wa rũciaro rwa Arefai,+ warĩ na itimũ rĩarĩ na ũritũ wa cekeri 300*+ na wakuuĩte rũhiũ rwerũ rwa njora, eendaga kũũraga Daudi.
17 O rĩo Abishai+ mũrũ wa Zeruia agĩũka kũmũteithia+ na agĩtharĩkĩra Mũfilisti ũcio na akĩmũũraga. Ihinda-inĩ rĩu arũme a Daudi makĩĩhĩta mwĩhĩtwa ũyũ harĩ we: “Ndũgũcoka gũthiĩ mbaara-inĩ hamwe na ithuĩ rĩngĩ!+ Ndwagĩrĩirũo kũhoria tawa wa Isiraeli!”+
18 Thutha wa maũndũ macio, gũkiumĩra mbaara rĩngĩ na Afilisti+ thĩinĩ wa Gobu. Hĩndĩ ĩyo Sibekai+ Mũhushathi akĩũraga Safu, ũrĩa warĩ wa rũciaro rwa Arefai.+
19 Na o rĩngĩ gũkiumĩra mbaara na Afilisti+ kũu Gobu, na Elihanani mũrũ wa Jaare-oregimu Mũbethilehemu akĩũraga Goliathu Mũgiiti, ũrĩa itimũ rĩake rĩarĩ na mũtĩ wahaanaga ta mũtĩ wa atumi a nguo.+
20 Gũkiumĩra mbaara o rĩngĩ thĩinĩ wa Gathu, na kwarĩ na mũndũ warĩ na ũnene ũtarĩ wa ndũire, aarĩ na ciara 6 o guoko na ciara 6 o kũgũrũ, ciothe ciarĩ ciara 24; na o nake aarĩ wa rũciaro rwa Arefai.+
21 Agĩikara akĩnyũrũragia Isiraeli.+ Nĩ ũndũ ũcio Jonathani mũrũ wa Shimei,+ mũrũ wa nyina na Daudi akĩmũũraga.
22 Acio ana maarĩ njiarũa cia Arefai kũu Gathu, na makĩgwa kũgerera guoko kwa Daudi na kũgerera guoko kwa ndungata ciake.+
Tũũhoro twa magũrũ-inĩ
^ Ũkk., “Tũkũmaguũria,” ũguo nĩ kuuga, moinĩtwo moko na magũrũ.
^ Kana hihi, “Merabu.”
^ Kana hihi, “ene itũũra.”
^ Ũkk., “maaguũrĩtio.”
^ Kilo ta 3.42. Rora Ũhoro Muongerere B14.
