Samueli wa Kerĩ 24:1-25
24 Na o rĩngĩ marakara ma Jehova makĩrĩrĩmbũkĩra Isiraeli+ rĩrĩa Daudi aacogeirũo kũmerekera akĩrũo atĩrĩ: “Thiĩ ũgatare+ andũ a Isiraeli na Juda.”+
2 Kwoguo mũthamaki akĩra Joabu+ mũnene wa mbũtũ ũrĩa maarĩ nake ũũ: “Thiĩ mĩhĩrĩga-inĩ yothe ya Isiraeli, kuuma Dani nginya Biri-shiba,+ wandĩkithie andũ, nĩgetha menye mũigana wa andũ.”
3 No Joabu akĩra mũthamaki ũũ: “Jehova Ngai waku arotũma andũ mongerereke maita 100, na maitho ma mwathi wakwa mũthamaki maroeyonera ũndũ ũcio, no rĩrĩ, nĩ kĩĩ kĩratũma mwathi wakwa mũthamaki ende gwĩka ũndũ ta ũcio?”
4 Ĩndĩ kiugo kĩa mũthamaki gĩgĩtooria Joabu o hamwe na anene a mbũtũ. Nĩ ũndũ ũcio Joabu na anene a mbũtũ makĩehera mbere ya mũthamaki magĩthiĩ kwandĩkithia andũ a Isiraeli.+
5 Makĩringa Jorodani na makĩamba hema Aroeru,+ mwena wa ũrĩo* wa itũũra rĩrĩa rĩrĩ gatagatĩ ka mũkuru, kwerekera Agadi na magĩthiĩ nginya Jazeru.+
6 Thutha ũcio magĩthiĩ nginya Gileadi+ na bũrũri-inĩ wa Tahatimu-hodishi na magĩthiĩ na mbere nginya Dani-jaani na magĩthiũrũrũka magĩthiĩ Sidoni.+
7 Magĩcoka magĩkinya handũ harĩa hairigĩre ha Turo+ na matũũra-inĩ mothe ma Ahivi+ na ma Akanaani, na marigĩrĩrio-inĩ magĩkinya Negebu+ ya Juda thĩinĩ wa Biri-shiba.+
8 Nĩ ũndũ ũcio magĩthiĩ bũrũri-inĩ ũcio wothe na magĩcoka Jerusalemu mũthia-inĩ wa mĩeri kenda na thikũ 20.
9 Joabu agĩkĩnengera mũthamaki mũigana wa andũ arĩa maandĩkithirio. Andũ a Isiraeli maarĩ njamba cia ita 800,000 irĩ na hiũ cia njora, nao arũme a Juda maarĩ 500,000.+
10 No ngoro ya Daudi ĩkĩĩrira*+ thutha wake gũtara andũ. Daudi agĩkĩra Jehova ũũ: “Nĩ njĩhĩtie+ mũno nĩ ũndũ wa gwĩka ũndũ ũyũ. Na rĩu wee Jehova, ndagũthaitha wohere ndungata yaku mahĩtia mayo,+ nĩ gũkorũo nĩ njĩkĩte ũndũ wa ũrimũ mũno.”+
11 Rĩrĩa Daudi ookĩrire rũcinĩ, kiugo kĩa Jehova gĩgĩkinyĩra mũnabii Gadi,+ ũrĩa warĩ muoni cioneki wa Daudi, akĩmwĩra ũũ:
12 “Thiĩ wĩre Daudi atĩrĩ, ‘Ũũ nĩguo Jehova oigĩte: “Ndĩrakũhe maũndũ matatũ ma gũthuura. Thuura ũndũ ũmwe ũrĩa ũkwenda ngũrehere.”’”+
13 Kwoguo Gadi akĩingĩra harĩ Daudi na akĩmũũria ũũ: “Ũkwenda mĩaka mũgwanja ya ng’aragu yũke bũrũri-inĩ waku-ĩ?+ Kana ũkwenda kũũrĩra thũ ciaku mĩeri ĩtatũ igĩgũteng’eria-ĩ?+ Kana ũkwenda kũgĩe na mũrimũ mũũru thikũ ithatũ bũrũri-inĩ waku?+ Rĩu wĩcũranie wega ũrĩa ũkwenda njokerie Ũrĩa ũndũmĩte.”
14 Nĩ ũndũ ũcio Daudi akĩra Gadi ũũ: “Nĩ ndangĩkĩte mũno nĩ tondũ wa ũndũ ũyũ. Ndagũthaitha, reke tũgwe guoko-inĩ kwa Jehova,+ nĩ gũkorũo tha ciake nĩ nyingĩ;+ no ndũkareke ngwe guoko-inĩ kwa mũndũ.”+
15 Jehova agĩgĩtũma mũrimũ mũũru+ thĩinĩ wa Isiraeli kuuma rũcinĩ o nginya ihinda rĩrĩa rĩatuĩtwo, ũndũ ũrĩa watũmire andũ 70,000 kuuma Dani nginya Biri-shiba+ makue.+
16 Rĩrĩa mũraika aatambũrũkirie guoko gwake erekeirie itũũra-inĩ rĩa Jerusalemu nĩgetha arĩanange, Jehova akĩĩrira* nĩ ũndũ wa mũthiro ũcio,+ na akĩra mũraika ũcio warehagĩra andũ mwanangĩko ũcio ũũ: “Nĩ ũguo rĩu! Rĩu cokia guoko gwaku thĩ.” Mũraika ũcio wa Jehova aarĩ hakuhĩ na kĩhuuhĩro kĩa Arauna+ Mũjebusi.+
17 Rĩrĩa Daudi oonire mũraika ũcio woragaga andũ, akĩra Jehova ũũ: “Niĩ nĩ niĩ njĩhĩtie, na nĩ niĩ njĩkĩte ũndũ mũũru; no ng’ondu ici-rĩ+—nĩ atĩa ciĩkĩte? Ndagũthaitha, reke guoko gwaku kũnjũkĩrĩre niĩ o hamwe na nyũmba ya baba.”+
18 Kwoguo Gadi agĩthiĩ kũrĩ Daudi mũthenya ũcio na akĩmwĩra ũũ: “Ambata, wakĩre Jehova kĩgongona kĩhuuhĩro-inĩ kĩa Arauna Mũjebusi.”+
19 Daudi agĩkĩambata kũringana na uuge wa Gadi, o ta ũrĩa Jehova aathanĩte.
20 Rĩrĩa Arauna aarorire kĩanda na akĩona mũthamaki na ndungata ciake magĩũka kũrĩ we, o rĩo Arauna agĩthiĩ na akĩinamĩrĩra harĩ mũthamaki aturumithĩtie ũthiũ wake thĩ.
21 Arauna akĩũria atĩrĩ: “Nĩ kĩĩ gĩatũma mwathi wakwa mũthamaki oke kũrĩ ndungata yake?” Daudi akĩmũcokeria ũũ: “Nĩgetha ngũre kĩhuuhĩro kuuma kũrĩ wee njakĩre Jehova kĩgongona, nĩguo ihũũra rĩrĩ rĩkorete andũ rĩthire.”+
22 No Arauna akĩra Daudi atĩrĩ: “Reke mwathi wakwa mũthamaki akĩoe na arute igongona rĩa kĩrĩa ekuona kĩagĩrĩire.* Ĩ ici ng’ombe nĩ ũndũ wa igongona rĩa njino o hamwe na rũbaũ rwa kũhũũra ngano na icoki rĩa ng’ombe ituĩke ngũ.
23 Atĩrĩrĩ wee mũthamaki, ici ciothe Arauna nĩ ahe mũthamaki.” Arauna agĩcoka akĩra mũthamaki ũũ: “Ũroetĩkĩrĩka nĩ Jehova Ngai waku.”
24 No rĩrĩ, mũthamaki akĩra Arauna ũũ: “Aca, no mũhaka ndĩkĩgũre kuuma harĩ wee na thogora. Ndikũrutĩra Jehova Ngai wakwa magongona ma njino itarĩ kĩndũ ndutĩte.” Nĩ ũndũ ũcio Daudi akĩgũra kĩhuuhĩro kĩu o hamwe na ng’ombe icio cekeri* 50 cia betha.+
25 Na Daudi agĩakĩra Jehova kĩgongona+ hau na akĩruta magongona ma njino o hamwe na magongona ma ũiguano. Jehova agĩgĩthikĩrĩria mathaithana nĩ ũndũ wa bũrũri ũcio,+ na ihũũra rĩu rĩakorete Isiraeli rĩgĩthira.
Tũũhoro twa magũrũ-inĩ
^ Kana “mwena wa mũhuro.”
^ Kana “No thamiri ya Daudi ĩkĩmũthumbũra.”
^ Kana “akĩigua kĩeha.”
^ Ũkk., “kĩrĩa ekuona arĩ kĩega maitho-inĩ make.”
^ Cekeri ĩmwe yaiganaine na ngiramu 11.4. Rora Ũhoro Muongerere B14.