Marũa ma Gatatũ ma Johana 1:1-14
1 Nĩ niĩ mũthuri mũkũrũ,* kũrĩ Gayo mũrata wakwa, wee nyendete mũno.
2 Mũrata wakwa, ndĩrahoya atĩ maũndũ-inĩ mothe ũthiĩ na mbere kũgaacĩra na gũkorũo na ũgima mwega wa mwĩrĩ, o ta ũrĩa rĩu ũgaacĩrĩte.
3 Nĩ gũkorũo nĩ ndakenire mũno rĩrĩa ariũ a Ithe witũ mookire na makĩheana ũira wa ũhoro wa ma ũrĩa wee ũrũmĩtie, o ũgĩthiaga kũringana na ũhoro ũcio wa ma.+
4 Ndirĩ na gĩkeno kĩngĩ* gĩkĩrĩte gĩkĩ: atĩ njiguage ciana ciakwa nĩ irathiĩ na mbere kũrũmĩrĩra ũhoro ũrĩa wa ma.+
5 Mũrata wakwa, nĩ wonanagia wĩhokeku waku kũgerera maũndũ marĩa wĩkaga nĩ ũndũ wa ariũ a Ithe witũ, o na gũtuĩka ndũmoĩ.+
6 Nĩ marutĩte ũira wĩgiĩ wendo waku mbere ya kĩũngano. Ndagũthaitha atĩ magĩthiĩ ũmarũmbũiye na njĩra ĩrĩa yagĩrĩire Ngai.+
7 Nĩ gũkorũo mooimagarire nĩ ũndũ wa rĩĩtwa rĩake, matekwamũkĩra kĩndũ+ kuuma kũrĩ andũ a ndũrĩrĩ.
8 Nĩ ũndũ ũcio, nĩ twagĩrĩirũo kũnyitaga andũ ta acio ũgeni,+ nĩguo tũtuĩke arutithania wĩra ũhoro-inĩ ũrĩa wa ma.+
9 Nĩ harĩ ũndũ ndandĩkĩire kĩũngano, no Diotrefe, ũrĩa wendete gũkoragwo arĩ wa mbere gatagatĩ-inĩ kao,+ ndarĩ ũndũ amũkagĩra kuuma kũrĩ ithuĩ na gĩtĩo.+
10 Na nĩkĩo ingĩũka, nĩ ngaamenyithania ciĩko iria areka cia gũtheremia ndeto njũru itwĩgiĩ.*+ Na nĩ ũndũ wa kwaga kũiganĩra na ũguo, nĩ aregaga kũnyita ariũ a Ithe witũ ũgeni+ na gĩtĩo; na arĩa marenda kũmanyita ũgeni, akageria kũmagirĩrĩria na akamaingata kuuma kĩũngano-inĩ.
11 Mũrata wakwa, ndũkegerekanie na ũndũ ũrĩa mũũru, no wĩgerekanagie na ũndũ ũrĩa mwega.+ Mũndũ ũrĩa wĩkaga maũndũ mega oimanĩte na Ngai.+ Ũrĩa wĩkaga maũndũ moru ndarĩ ona Ngai.+
12 Demetrio nĩ agaathĩrĩirio nĩ andũ othe o na nĩ ũhoro wa ma guo mwene. O na ithuĩ nĩ tũraruta ũira ũmwĩgiĩ, na nĩ mũĩ atĩ ũira ũrĩa tũrutaga nĩ wa ma.
13 Ndĩrarĩ na maũndũ maingĩ ma gũkwandĩkĩra, no ndirenda gũthiĩ na mbere gũkwandĩkĩra na karamu na rangi.
14 O na kũrĩ ũguo, nĩ ndĩrerĩgĩrĩra gũkuona ica ikuhĩ, na nĩ tũkwaria ũthiũ kwa ũthiũ.
Ũrogĩa na thayũ.
Arata gũkũ nĩ makũgeithia. Ngeithĩria arata kũu o mũndũ na rĩĩtwa.
Tũũhoro twa magũrũ-inĩ
^ Kana “Mũthuri wa kĩũngano.”
^ Kana hihi, “gĩtũmi kĩngĩ gĩa gũcokia ngatho.”
^ Ũkk., “kwaria ũhoro witũ na ciugo njũru.”
